Bamwe mu bangirijwe n’ikorwa ry’umuhanda Ngoma-Bugesera babuze ingurane

  • NSHIMIYIMANA FAUSTIN
  • Werurwe 8, 2024
  • Hashize amezi 2
Image

Abaturiye ahari kubakwa umuhanda Ngoma-Bugesera mu Karere ka Ngoma, bararira ayo kwarika bitewe n’imitungo yabo yangiritse bakaba bamaze umwaka bategereje ingurane ariko amaso yaheze mu kirere.

Abatuye mu Karere ka Ngoma bavuga ko ibyangombwa birimo ibyangombwa by’ubutaka, udutabo twa banki batswe n’ubuyobozi bw’Akarere bwabijyanye ariko umwaka ukaba ushize barabuze uwabarenganura ngo bahabwe ingurane y’ibyangijwe n’ikorwa ry’umuhanda.

Abaturage babwiye Imvaho Nshya ko babeshywe kuko mu mwaka wa 2023 bagiye basiragizwa basabwa n’ubuyobozi bw’Akarere ka Ngoma ngo bajye gufotoza ibyangombwa ngo bahabwe amafaranga ariko na n’ubu bakaba barabuze igisubizo n’uwabishyura.

Umwe muri aba baturage yagize ati: “Ibyangombwa na dosiye badusabaga kuzuza babijyanye mu ntangiriro z’umwaka wa 2023 ariko n’ubu ntegereje ko amafaranga aza narahebye. Turasaba ubufasha bwo kugira ngo tumenya niba ayo mafaranga yarageze kuri konti zacu ntitubimenye kuko duhora kuri SACCO no kuri banki tubaza niba amafaranga yaje. Icyo nsaba ubuyobozi ni uko bwakwihutisha dosiye zacu, amafaranga natwe tukayabona.”

Undi nawe yagize ati: “Mu kwezi kwa Kanama bansabye gufotoza ibyangombwa birimo ibyangombwa by’ubutaka, indangamuntu n’udutabo twa SACCO inshuro zirenze ebyiri mu bihe bitandukanye ndabikora ariko nubu narayabuze. Dukeneye gukorerwa ubuvugizi no kurenganurwa kugira ngo natwe tubone ayo mafaranga.”

Yakomeje avuga ko hari bamwe bishyuwe mbere y’uwo mwaka ushize none bob amaze umwaka bagitegereje.

Gusa avuga ko ubuyobozi bwamubwiye ko dosiye ye itusuye kubera ko yari isinyweho na nyina gusa kandi na se atakiriho.

Ati: “Bahora batwaka ibyangombwa buri munsi ariko na ho twabyujurije byose umwaka urashize. Batubwira ko ibyangombwa byose twatanze ari byuzuye ariko nabwo iminsi ntarengwa twari twahawe n’ubuyobozi ko mu mpera z’umwaka wa 2023 tuzaba twabonye amafaranga n’ubu twarahebye.”

Umuyobozi w’Akarere ka Ngoma Niyonagira Nathalie, yasobanuye ko mu kwishyura imitungo y’aba baturage hagiye hagaragaramo ibibazo ariko akabizeza ko ingurane yabo bazayihabwa kuko bari kubikurikirana.

Yagize ati: “Ibikorwa byo kubaka umuhanda bikurikiranwa n’Akarere na RTDA kandi iyo bikorwa hari ibyishyurwa mbere kuko abaturage baba barabariwe. Gusa ariko iyo imirimo igikomeje hari aho abubaka bagera bakagaragaza ko hakenewe gushyirwa ibikorwa cyangwa hari aho bakeneye kwimuraho, abo baturage nabo bahita babarirwa.”

Yemeza ko abenshi mu baturiye umuhanda Ngoma-Bugesera bishyuwe, yemeza ko bagiye gukurikirana icyatumye batishyurwa kugira ngo  abadafite ibibazo bishyurwe ingurane zabo.

Ati: “Habaye hari umuturage waba waracikanywe ntabone amafaranga kandi yujuje ibisabwa twamuha ubutumwa bw’uko yakwegera ibiro by’Umurenge ibikorwa bye birimo nabwo bukaduha iyo raporo, natwe tukabafasha gukurikirana kuko ibikorwa dufatanya kubikurikirana na RTDA.”

Uyu muhanda wa kaburimbo Ngoma- Bugesera ureshya na kilometero 52, watangiye kubakwa mu kwezi k’Ukwakira 2021, aho uzuzura utwaye miliyari 64 z’amafaranga y’u Rwanda. Biteganyijwe mu Kwakira 2024 uzaba warangiye.

  • NSHIMIYIMANA FAUSTIN
  • Werurwe 8, 2024
  • Hashize amezi 2
TANGA IGITEKEREZO
Dipine says:
Werurwe 8, 2024 at 1:44 pm

Niharebwe icyakorwa abobaturage bahabwe ingururane yabo kuko ndumvahashize igihe cyirekire bagitegereje ingurane yabo gose inzego zubuyobozi nababishinzwe nibahagurukire icyocyibazo kuko aboba turage barababaje.

Andika igitekerezo

AMATEGEKO AGENGA IYANDIKA RY'IGITEKEREZO CYAWE