Al Ittihad yo mu Misiri na Rivers Hoopers yo muri Nigeria zabonye itike yo kwerekeza mu mikino ya nyuma ya Basketball Africa League (BAL) izabera i Pretoria nyuma yo kuyobora itsinda ryiswe Kalahari Conference.
Imikino y’iri tsinda yari imaze icyumweru ibera i Rabat muri Morocco yasojwe ku Cyumweru tariki ya 13 Mata 2025, aho yitabiriwe na Al Ittihad yo mu Misiri, Rivers Hoopers yo muri Nigeria, FUS Rabat yo muri Morrocco ndetse na Stade Malien yo muri Mali.
Nkuko byangeze mu mwaka ushize, iri rushanwa ryakinwe mu buryo bw’umukino ubanza ni uwo kwishyura. Mu mikino ya nyuma yakinwe, Al Ittihad yatsinze FUS Rabat amanota 98-74, Rivers Hoopers yo muri Nigeria itsinda Stade Malien yo muri Mali amanota 79-59.
Muri rusange muri iri tsinda hakinwe imikino itandatu yasojwe Al Ittihad yo mu Misiri iyoboye nyuma yo gutsinda imikino itandatu yose. Rivers Hoopers yatsinze ine, itsindwa ibiri iri ku mwanya wa kabiri.
FUS Rabat iri ku mwanya wa gatatu, yatsinze imikino ibiri, itsindwa ine, mu gihe Stade Malien iri ku mwanya wa nyuma yatsinzwe imikino itandatu yose yakinnye.
Bivuze ko amakipe abiri ya mbere yabonye itike yo kuzakina imikino ya nyuma izabera i Pretoria tariki 4 kugeza 14 Kamena 2025.
Ni mu gihe FUS Rabat ya gatatu igomba gutegereza umwanya umwe uzatangwa nyuma yo kureba uko amakipe yose azitwara mu matsinda abiri arimo Nile Conference na Sahara Conference.
Iya Sahara Conference izakinirwa i Dakar muri Senegal niy o igiye gukurikira kuko iteganyijwe kuva tariki 26 Mata kugeza tariki ya 4 Gicurasi 2025.
Itsinda Abanyarwanda bahanze amaso cyane ni rya Nile Conference rizabera i Kigali tariki ya 17 kugeza 25 Gicurasi 2025 ririmo APR BBC ihagarariye u Rwanda aho iri kumwe na Al Ahli Tripoli yo muri Libya, Nairobi City Thunder muri Kenya na Made by Basketball yo muri Afurika y’Epfo.
Nta gitekerezo kiratangwa. Ba uwa mbere gutanga igitekerezo.
Andika igitekerezo
AMATEGEKO AGENGA IYANDIKA RY'IGITEKEREZO CYAWE