Baguze imbuto y’ibishyimbo ku 2000 Frw, bejeje bagurisha kuri 400 Frw

  • NSHIMIYIMANA FAUSTIN
  • Mutarama 2, 2024
  • Hashize amezi 2
Image

Bamwe mu bahinzi bo mu Turere twa Kayonza, Ngoma na Rwamagana barinubira igiciro bari kugurirwaho ibishyimbo bitewe nuko baguraga imbuto y’ibishyimbo ku mafaranga y’u Rwanda 2,000 kuri mironko, none ubu bari kubagurira hagati y’amafaranga 400 na 500.

Abahinzi bavuganye n’Imvaho Nshya, bagaragaje ubwo biteguraga igihembwe cy’ihinga 2024, igiciro cy’imbuto y’ibishyimbo cyari hejuru cyane, none mu gihe byeze babona barimo kugwa mu gihombo gikomeye cyiyongera ku cyo batewe n’imvura yatumye umusaruro ugabanyuka ntiwagera ku wo bari biteze.

Gusa ngo ikibahangayikishije ni uburyo baguze ibishyimbo ku 2000 kuri mironko (igipimo kirengaho ikilo) ubwo bahingaga ariko igiciro kiriho ubu kikaba kiri hasi nyuma y’uko ubu byeze, bakifuza ko inzego bireba zabafasha.

Aba baturage bavuga ko biterwa n’uko nta handi bari gukura amafaranga bigatuma bajyana ibishyimbo ku masoko ku giciro gito.

Mutarambirwa Tharcisse avuga ko ubusanzwe iyo yahinze mironko 25 asarura imifuka ibiri y’ibishyimbo y’ibilo 100, ariko ngo bitewe n’imvura nyinshi yaguye yatumye asarura umufuka umwe.

Nubwo umusaruro w’ibishyimbo wabaye muke ariko ngo babangamiwe n’igiciro kikiri hasi kuko bishobora gutuma bahura n’ikibazo cy’inzara.

Yagize ati: “Njye ngura imbuto nayiguraga amafaranga y’u Rwanda 2000 ariko kuri ubu utwaye ibishyimbo ku isoko ashaka umunyu, isabune, amavuta n’ibindi ni 400 cyangwa 500 kandi umusaruro w’ibishyimbo wabaye muke. Badufashe bongere igiciro kuko urebye uko twabiguze bihenze n’uburyo bihendutse ubu birahabanye cyane.”

Nubwo umusaruro utabaye mwinshi nk’uko bari biteze, ibishyimbo byakomeje kugurwa make cyane

Mukarushema Viviane na we yagize ati: “Ibishyimbo hano i Ngoma twabiguze ku mafaranga 1700 dutera, none uyu munsi turi kubigurisha 500. Ibi biduteza igihombo kuko twabiguze bihenze none birahendutse cyane. Ubu biri kugura amafaranga make cyane rwose nibadutabare bashyireho igiciro gihuriweho.”

Ubuyobozi bw’Intara y’Iburasirazuba busaba abaturage kwirinda gusesagura umusaruro no kuwangiza, hakarebwa uburyo bawuhunika bagamije kugera ku ntego yo kwihaza mu biribwa no kubungabunga imyaka yeze.

Guverineri w’Intara y’Iburasirazuba Rubingisa Pudence, ubwo yasuraga Akarere ka Ngoma mu minsi ishize, yasabye abayobozi bo mu Nzego z’ibanze kwegera abaturage bakabakangurira gufata neza umusaruro w’ibihingwa birimo kwera muri iki gihe bakirinda kubyotsa no kugurisha umusaruro wose.

Yagize ati: “Nk’ibishyimbo byatangiye gusarurwa kandi twiteze umusaruro mwinshi w’ibigori, ni gahunda ikorwa n’inzego z’ubuyobozi ndetse na Leta muri rusange kugira ngo turebe imbaraga zashyizwemo mu gutegura igihembwe cy’ihinga, ari inyongeramusaruro no guhuza ubutaka bikaba bizatanga umusaruro kandi biragaragara.”

Yakomeje agira ati: “Twaganiriye n’abayobozi bo mu Turere twose gutegura ubwanikiro n’ubuhunikiro, kureba ahakiri imbogamizi ndetse bukeneye ubuvugizi no gukora uburyo buhuriweho bwo kureba uko Uturere twiteguye kubungabunga umusaruro mbere yuko wose bawusarura. Ni gahunda turi gushyiramo imbaraga kandi dutekereza ko izagenda neza abaturage bakishimira imbaraga bakoresheje bahinga zikababyarira umusaruro.”

Byitezwe ko umusaruro w’ubuhinzi uzazamuka mu gihembwe cy’ihinga 2024 A, bitewe n’uko Minisiteri y’Ubuhinzi n’Ubworozi yasabye abafite ubutaka bwagenewe ubworozi nibura gusigarana 30% bw’inzuri, ubundi ubuso bw’inzuri bungana na 70% bugahingwaho.

Hari n’izindi ngamba zagiye zifatwa zigamije kongera umusaruro w’ubuhinzi mu Ntara y’Iburasirazuba, zirimo n’izijyanye no guhangana n’imihindagurikire y’ibihe no kubungabunga ubutaka.  

  • NSHIMIYIMANA FAUSTIN
  • Mutarama 2, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE