Ayra Starr arasabira ubutabera umunyashuri wishwe 

Umuhanzi w’icyamamare muri Afrobeats, Ayra Starr, yamaganye ubwicanyi bwakorewe Idowu Christianah, umunyeshuri wigaga muri Kaminuza Nkuru y’Ubuhinzi muri Nigeria, Federal University of Agriculture Abeokut (FUNAAB).

Bivugwa ko Christianah yaba yarishwe n’inshuti ye, Ayomide Adeleye, nubwo hataramenyekana impamvu yaba yarabimuteye.

Ayra Starr abinyujije ku rubuga rwe rwa X yamaganye icyo gikorwa anasaba ubutabera bwihuse kuri Christanah wahohotewe.

Uyu muhanzikazi yashimangiye ko byihutirwa gukemura ibibazo by’ihohoterwa rikorerwa abagore n’abakobwa, yemeza ko bakwiye kurindwa no kuvurwa neza.

Yagize ati: “Muhagarike kutwica! Muhagarike kudufata ku ngufu! Abagore bakwiriye ibyiza, Ubutabera kuri Christianah.”

Ibi Ayra Starr abikoze nyuma y’uko haherutse gutangazwa ibyavuye mu iperereza rigikomeje ryerekanye ko Adeleye, yamushimuse, akamwica akanashyingura umurambo iwe mu rugo.

Byagaragaye kandi ko Adeleye yari yarigeze kugira uruhare mu rupfu rw’uwahoze ari umukunzi we na mushiki we mu bihe bitandukanye muri 2018 na 2020.