Argentine yanyagiye Brazil ibona itike y’igikombe cy’Isi cya 2026

Ikipe y’igihugu ya Argentine yanyagiye iya Brésil ibitego 4-1 mu mukino wo gushaka itike y’Igikombe cy’Isi kizaba mu 2026. Uyu mukino w’ishiraniro wabaye mu rukerera rwo kuri uyu wa Gatatu tariki ya 26 Werurwe 2025, kuri Estadio Mas Monumental mu gihugu cya Argentine.

Muri uyu mukino Argentine yari mu rugo ni yo yatangiye ifungura amazamu ku munota wa kane ku gitego cyatsinzwe na Julian Alvarez.

Ku munota wa 12 Argentine yarushaga cyane Brazil yabonye igitego cya kabiri cyatsinzwe na Enzo Fernandez.

Ku munota wa 26, Brazil yishyuye igitego gitsinzwe na Matheus Cunha ku burangare bwa ba myugariro.

Ku munota wa 37, Argentine yatsinze igitego cya gatatu cyinjijwe na Alexis Mac Allister ku mupira mwiza yahawe na Enzo Fernandez, aroba Umunyezamu.

Igice cya mbere cyarangiye Argentine yatsinze Brazil ibitego 3-1.

Ku munota wa 71, Argentine yatsinze igitego cya kane cyatsinzwe na Giuliano Simeone ku mupira mwiza yahawe na Nicolas Tagliafico.

Umukino warangiye Argentine inyagiye Brazil ibitego 4-1.

Uyu mukino wabaye uwa gatanu wikurikiranya Brésil idatsinda uyu mukeba.

Argentine ifite igikombe giheruka cya 2022 yabaye ikipe ya kane yabonye itike y’Igikombe cy’Isi nyuma y’u Buyapani, Iran na Nouvelle-Zélande.

Igikombe cy’Isi cya 2026 kizabera mu bihugu bitatu ari byo Leta Zunze Ubumwe za Amerika, Canada na Mexico.