APR WFC yegukanye igikombe cya shampiyona y’icyiciro cya 2 

  • SHEMA IVAN
  • Werurwe 24, 2024
  • Hashize ibyumweru 3
Image

Ikipe ya APR y’Abagore (APR WFC) yegukanye igikombe cya shampiyona mu cyiciro cya kabiri mu mupira w’amaguru, nyuma yo gutsinda Forever WFC ibitego 3-0 mu mukino wa nyuma usoza shampiyona ya 2023-2024.

Uyu mukino wabaye kuri iki Cyumweru tariki 24 Werurwe 2024, kuri Kigali Pele Stadium, witabirwa n’Umugaba Mukuru w’Ingabo z’u Rwanda akaba n’Umuyobozi w’icyubahiro wa APR WFC, Gen. Mubarakh Muganga,  hamwe na Perezida wa FERWAFA Munyantwali Alphonse, Umuyobozi wa Rwanda Premier League Hadji Mudaheranwa na Chairman wa APR FC Col Richard Karasira.

Ukwishaka Zawadi ni we watsinze ibitego bitatu byose byabonetse muri uyu mukino afasha APR WFC kwegukana iki gikombe mu mwaka wa kabiri ikina Shampiyona y’Icyiciro cya Kabiri idatsizwe umukino n’umwe.

APR FC y’abagore yagaruwe mu cyiciro cya kabiri umwaka ushize, ntabwo yanyuze inzira imwe na mukeba Rayon Sports baziye rimwe, dore ko yo yahisemo kubaka ikipe y’abato byanayiviriyemo gusezererwa mu mikino ya ½ uwo mwaka ari na ko ibura itike yo gukina icyiciro cya mbere.

APR WFC yabaye iya mbere mu itsinda A ifite amanota 34/36, aho mu mikino 12 yakinnye mu itsinda yatsinze 11 inganya 1 ntiyigera itsindwa bityo ihita ibona itike yo gukina 1/4 hamwe n’andi makipe atatu yayikurikiye.

Muri 1/4 yagombaga guhita ihura n’iyabaye iya 4 mu itsinda B ari yo Bridge WFC. Iyi ariko ntiyashobora kugaragara ku kibuga mu mukino ubanza ari na byo byayiviriyemo guhita isezererwa mu irushanwa hadakinwe uwo kwishyura.

Mu mikino ya ½ APR FC isezereye Kayonza WFC ihita izana “Derby” nshya muri uyu mukino dore ko mukeba Rayon Sports we imaze gufatisha muri iki cyiciro ikaba kandi yatwaye shampiyona y’icyiciro cya mbere ku wa Gatandatu tariki 23 Werurwe 2024 itsinze Muhazi United WFC igitego 1-0.

APR WFC na Forever WFC ni yo makipe mashya azakina icyiciro cya mbere mu mupira w’amaguru wa 2024-2025 mu bagore, asimbuye Rambura WFC na Freedom WFC zamanutse mu cyiciro cya kabiri.

  • SHEMA IVAN
  • Werurwe 24, 2024
  • Hashize ibyumweru 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE