APR FC yegukanye shampiyona ya gatanu yikurikiranya

  • SHEMA IVAN
  • Mata 20, 2024
  • Hashize ibyumweru 4
Image

APR FC yegukanye igikombe cya shampiyona 2023-2024 nyuma yo gutsinda Kiyovu Sports igitego 1-0 mu mukino w’Umunsi wa 27 wa Shampiyona, kiba igikombe cya gatanu kikurikiranya APR FC itwaye kuva mu 2020.

Uyu mukino wabaye kuri uyu wa Gatandatu tariki 20 Mata 2024, kuri Kigali Pele Stadium.

Mbere y’uko umukino utangira, habanje gufatwa umunota wo kwibuka ku nshuro ya 30 Jenoside yakorewe Abatutsi mu 1994.

Mu minota ibanza y’umukino amakipe yombi yatangiye akinira hagati mu kibuga, ntakipe itera mu izamu ry’indi.

Ku munota wa 13 Kiyovu Sports yabonye uburyo bwa mbere imbere y’izamu rya APR FC ku ishoti ryageragejwe na Kilongozi Richard, Umunyezamu Ndzila agorwa no kurikuramo ukurwaho na bagenzi be.

Ku munota wa 15 APR FC yabonye uburyo bwo gufungura amazamu ku mupira mwiza Ruboneka Jean Bosco yahinduye uturutse iburyo, Ndizeye Eric awushyira muri koruneri itagize icyo itanga.

Ku munota wa 26 APR FC yongeye kubona andi mahirwe yo gufungura amazamu ku ishoti rikomeye Ruboneka Jean Bosco yateye asize ab’inyuma ba Kiyovu Sports iburyo, umupira ukubita umutambiko w’izamu nyuma yo gukorwaho na Nzeyurwanda.

Ku munota wa 29 Kiyovu Sports nayo yongeye kugera imbere y’izamu rya APR FC ku ishoti ryatewe Alfred Leku anyuze ku ruhande mbere y’uko na Karim Makenzi atera undi umupira unyuze hejuru y’izamu.

Iminota 45 y’igice cya mbere yarangiye amakipe yombi anganyije ubusa ku busa.

Mu gice cya kabiri APR FC yagarutse ishaka igitego ngo yizere kwegukana igikombe APR FC yagarutse ishaka igitego ngo yizere kwegukana igikombe cya shampiyona ariko na Kiyovu Sports inyuzamo nayo igasatira. 

Ku munota wa 51 APR FC yafunguye amazamu ku igitego cyatsinzwe na Mugisha Gilbert ku ishoti rikomeye yatereye inyuma y’urubuga rw’amahina nyuma yo kureba uko Nzeyurwanda Djihad ahagaze umupira uruhukira mu rushundura.

APR FC yarı hejuru muri iyo minota yatsinze igitego cya kabiri ku munota wa 56 ku mupira Ruboneka Jean Bosco yinjiranye, awuha Mugisha Gilbert ateye ishoti rikomeye, Umunyezamu Nzeyurwanda awukoraho uramurenga, Mbaoma awushyize mu izamu, Umusifuzi Karangwa Justin agaragaza ko habayeho kurarira.

Ku munota wa 59 Kiyovu Sports yabonye uburyo ku izamu rya APR FC ku mupira Niyonzima Olivier Seif yahinduye mu rubuga rw’amahina, usanga Tansele wateye ishoti ari ku murongo, umupira ujya hejuru y’izamu.

Kiyovu Sports yakinaga neza muri iyo minota yongeye kubona andi mahirwe ku izamu rya APR FC ku mupira mwiza Kilongozi Richard yahinduye, ubwugarizi bwa APR FC bwarimo Yunussu na Clement bugorwa no kuwukuraho, uhura n’Umunyezamu Ndzila akiza izamu.

Ku munota wa 82 yongeye kugera imbere y’izamu ishaka igitego cya kabiri ku mupira Niyibizi Ramadhan yagerageje ku ishoti yateye ari inyuma y’urubuga rw’amahina, umupira uwuteye ukurwamo na Nzeyurwanda Djihad awushyira muri koruneri itagize icyo itanga.

Umukino warangiye APR FC yatsinze Kiyovu Sports igitego 1-0 yegukana igikombe cya gatanu cya shampiyona yikurikiranya mu gihe habura imikino itatu ngo shampiyona ya 2023-2024 irangire.

Ikipe y’Ingabo z’Igihugu yahise igira amanota 63 mu mikino 27 idatsinzwemo n’umwe, aho irusha 12 Rayon Sports ya kabiri.

Iki gıkombe ni icya mbere APR FC itwaye kuva isubiye kuri politiki yo gukinisha abanyamahanga, yasubiye muri uyu mwaka w’imikino wa 2023-2024, yaherukagamo mu mwaka w’imikino wa 2011-2012.

APR FC ni yo izahagararira u Rwanda mu mikino nyafurika ya CAF Champions League 2024-2025.

APR FC yashinzwe mu 1993, igatangira guhatana muri Shampiyona nyuma y’imyaka ibiri, ni yo imaze kwegukana ibikombe byinshi by’icyiciro cya mbere aho kuri ubu yujuje ibikombe 22 nyuma y’imyaka 30 ishinzwe.

Igikombe cy’uyu munsi gisanze icyo mu 1995, 1996, 1999, 2000, 2001, 2003, 2005, 2006, 2006/07, 2008/09, 2009/10, 2010/11, 2011/12, 2013/14, 2014/15, 2015/16, 2017/18, 2019/20 na 2020/2021, 2021/22 na 2022/23.

APR FC isigaje imikino itatu irimo uwo izakirwamo na Gasogi United, uwo izakiramo Gorilla FC n’uwo izakiramo Amagaju FC.

Undi mIkino yabaye uyu munsi Rayon Sports yatsinze Bugesera FC ibitego 2-1, Amagaju yatsinzwe na Etoile de l’Est igitego 1-0 naho Marines itsinda Police FC ibitego 2-1.

Imikino iteganyijwe ku Cyumweru tariki 21 Mata 2024

Mukura VS izakira AS Kigali saa cyenda kuri Stade Mpuzamahanga ya Huye.

Gorilla FC izakira Musanze FC saa cyenda kuri Kigali Pele Stadium

Etincelles izakira Muhazi United saa cyenda kuri Stade Umuganda

  • SHEMA IVAN
  • Mata 20, 2024
  • Hashize ibyumweru 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE