APR FC yatsinze Etincelles biyongerera amahirwe yo kwegukana Shampiyona

  • SHEMA IVAN
  • Werurwe 2, 2024
  • Hashize amezi 2
Image

APR FC yatsinze Etincelles igitego 1-0 mu mukino w’umunsi wa 23 wa shampiyona, biyongerera amahirwe yo kwegukana igikombe cya Shampiyona.

Uyu mukino wabaye ku mugoroba wo kuri uyu wa Gatandatu tariki 02 Werurwe 2024, kuri Kigali Pele stadium.

Ku munota wa kabiri gusa, APR FC yahushije igitego ubwo Kwitonda Alain yari aherejwe umupira ari mu rubuga rw’amahina ariko ashatse kuroba Umunyezamu wa Etincelles FC, Arakaza Marc Arthur awushyira hejuru yaryo.

Ruboneka Jean Bosco wa APR FC yongeye kohereza umupira ashaka bagenzi be bari mu rubuga rw’amahina rwa Etincelles FC, ariko Fitina Omborenga awufashe, awutera mu izamu adahagaritse, birangira Arakaza awufashe.

Etincelles FC yabonye uburyo bwa mbere ubwo Bendeka Gédéon yazamukanaga umupira ku munota wa 13 agasiga Niyigena Clément, ariko ateye mu izamu Pavelh Ndzila aratabara.

Iyi kipe yahise yinjira mu mukino ndetse itangira no kubona imipira y’imiterekano irimo na koruneri mu kibuga cya APR FC.

Myugariro akanaba Kapiteni wa Etincelles FC, Nshimiyimana Abdou, yagize ikibazo hakiri kare cyane ku buryo yababaye mu itako bituma umutoza wayo Bizumuremyi Radjab amusimbuza ku munota wa 31, ashyiramo Iraguha Awad.

Nyuma y’izi mpinduka Etincelles FC yari yigaranzuye APR FC mu guhererekanya imipira, yahushije ikindi gitego ubwo Niyonkuru Sadjat yaherezaga umupira Bendeka ariko ashatse gutera mu izamu ntiwafata ku kirenge neza.

Mu minota ya nyuma y’igice cya mbere yihariwe na Etincelles FC kuko yakiniye mu kibuga cya APR FC ndetse ikabona n’amahirwe menshi ariko amakosa ya ba rutahizamu bayo agatuma batabona igitego.

Igice cya mbere cyongeweho iminota ibiri cyarangiye amakipe yombi akinganya 0-0.

Igice cya kabiri kigitangira, Kakule Mukata Justin yahereje umupira Bendeka wari kumwe na ba myugariro ba APR FC barangaye, ariko arobye Pavelh Ndzila uca hejuru y’izamu.

Umutoza wa APR FC, Thierry Froger, yahise akora impinduka akuramo Niyomugabo Claude na Tadeo Lwanga, ashyiramo Mugisha Gilbert na Niyibizi Ramadhan.

Izi mpinduka zagize umumaro ku munota wa 55 ubwo Kwitonda Alain yakinanaga neza na Fitina Omborenga wahise ahereza Shaiboub Ali areba uko umunyezamu Arakaza ahagaze, amutsinda igitego mu ruhande yari yasize.

Nyuma yo gutsinda igitego ku munota wa 70 Shabioub yasimbuwe na rutahizamu wa Victor Mbaoma wari ukumbuwe n’abafana.

Kwinjiramo kwa Mbaoma abakinnyi bahise bazamura urwego bagerageza gushaka ikindi gitego ariko amahirwe akomeza kuba make. Hari n’aho Mugisha Gilbert yirukankanye umupira wenyine, ashaka gucenga Iraguha Awad, ariko ahita awumukuraho nubwo abafana bari bamaze kubara igitego.

Umukino warangiye APR FC itsinze Etincelles igitego 1-0 biyongerera amahirwe yo kwegukana igikombe cya shampiyona hacyiri kare.

APR FC yagumye ku mwanya wa mbere igira amanota 52 irusha amanota icumi Rayon Sports ya kabiri.

Etincelles yagumye ku mwanya wa 15 n’amanota 22.

APR FC izagaruka mu kibuga ku wa Kabiri tariki 05 Werurwe 2024 yakira Etoile de l’Est mu mukino w’ikirarane saa kumi n’ebyiri z’umugoroba kuri Kigali Pele Stadium.

Indi mikino yabaye uyu munsi yasize Bugesera FC itsinzwe na Mukura VS ibitego 2-0, Gorilla FC yanganyije n’Amagaju igitego 1-1, mu gihe Musanze FC yatsinze Muhazi United igitego 1-0.

Imikino iteganyijwe ku Cyumweru tariki 03 Werurwe 2024

Gasogi United izakira Marines FC saa cyenda kuri Kigali Pele Stadium.

Sunrise FC izakira Rayon Sports saa cyenda kuri Stade ya Nyagatare.

  • SHEMA IVAN
  • Werurwe 2, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE