APR FC yanyagiye Marines FC 5-2, Froger avugirizwa induru n’abafana 

  • SHEMA IVAN
  • Gashyantare 7, 2024
  • Hashize amezi 3
Image

APR FC yaturutse inyuma, yatsinze Marines FC ibitego 5-2 mu mukino w’umunsi wa 16 wa shampiyona utarabereye igihe kubera ko iyi kipe yari Mapinduzi Cup 2024.

Uyu mukino wabaye ku mugoroba wo kuri uyu wa Gatatu tariki 7 Gashyantare 2024, kuri Kigali Pele Stadium.

Uyu mukino ntiwabaye hagati muri Mutarama kubera ko APR FC yari yitabiriye Mapinduzi Cup muri Zanzibar.

Amakipe yombi yatangiye asatirana ku mpande zombi.

Ku munota wa kabiri Marines FC yafunguye amazamu ku gitego cyatsizwe na Byamungu Raoul ku mupira yahawe, ubwugarizi bwa APR FC burasigana, abuterana ishoti rikomeye umunyezamu Ndzila ntiyabasha kuwuhagarika.

Ku munota wa Gatanu APR FC yabonye amahirwe yo kwishyura igitego ku mupira Shaiboub Ali yacomekeye Mugisha Gilbert ateye ishoti rikomeye hejuru y’izamu, nubwo umusifuzi wo ku Ruhande yari yamaze kugaragaza ko habayeho kurarira.

 Ku munota wa 15 Marines yabonye amahirwe yo gutsinda igitego cya kabiri ku mupira Usabimana Olivier yinjiranye acenga Nshimiyimana Yunussu, awuhinduye mu izamu Nzu Ginola awutera hejuru y’izamu.

Iminota 30 ya mbere yahiriwe na APR FC isatira ishaka igitego cyo kwishyura ariko abakinnyi bayo bakagorwa no gutera imipira ya nyuma.

Marines FC na yo yanyuzamo  igasatira, ikoresheje uruhande rwa Tuyishime Benjamin uri kunganirwa na Usabimana Olivier.

Ku munota wa 38 Marines FC yabonye andi mahirwe yo gutsinda igitego cya kabiri ku ishoti rikomeye 

Muganuza Jean Pierre yagerageje inyuma y’urubuga rw’amahina nyuma ya coup-franc yari itewe, Umunyezamu Ndzila afata umupira neza.

Ku munota wa 43 APR FC yabonye igitego cyo kwishyura cyatsizwe na Kwitonda Alain ‘Bacca’ ku mupira wamusanze mu rubuga rw’amahina nyuma yo guhindurwa na Ishimwe Christian.

Mbere y’uko igice mbere kirangira Umusifuzi wa Kane yongeyeho iminota ibiri y’inyongera.

Ku munota wa 45+1 APR FC yatsinze igitego cya kabiri kirangwa ku mupira Omborenga yahinduye Bacca ananirwa ku wukina, usanga Shaiboub ateye ishoti rikurwamo na myugariro wa Marines FC, umupira usanga Bosco Ruboneka ateye n’umutwe, ukurwamo n’Umunyezamu Matabaro, ugarukiye uyu mukinnyi wa APR FC atsinda igitego ariko umusifuzi wo ku ruhande agaragaza ko hari habayeho kurarira.

Igice cya mbere cyarangiye amakipe yombi anganyije igitego kimwe kuri kimwe

Mu gice cya kabiri Marines yakoze impinduka Ishimwe Jean Rene asimbura Byiringiro Gilbert.

Ku munota 51, APR FC yakinaga neza muri iyo minota, yahushije uburyo bwiza ku mupira watewe na Niyomugabo Claude, ukubita igiti cy’izamu uvamo.

Ku munota wa 53′ APR FC yabonye ubundi buryo bwiza bwo gutsinda igitego ku mupira Kwitonda Alain yahinduye Shaiboub ashatse gutsindisha agatsitsino, umupira  ujya hanze.

Ku munota wa 62 ‘ APR FC yabonye igitego cya kabiri cyatsinzwe na Ruboneka Jean Bosco ku mupira wari uteretse inyuma gato y’urubuga rw’amahina.

Nyuma y’iminota ibiri gusa ku munota wa 64′ APR FC yatsinze igitego cya gatatu cyatsizwe na Shaiboub Ali arobye umunyezamu Matabaro Assouman wasohotse agiye gufata umupira wari utewe na Bacca.

Ku munota wa 66′ APR FC yatsinze igitego cya kane kirangwa ku mupira mwiza wahinduwe na Bacca, ushyizwe mu izamu na Niyomugabo Claude, Umusifuzi wo ku Ruhande agaragaza ko hari habayeho kurarira.

Muri iyi minota Marines yagowe no kugera imbere y’izamu rya APR FC.

Ku munota wa 75 APR FC yatsinze igitego cya yane cyatsizwe na Shaiboub Ali ku mupira yateye hasi, aroba Umunyezamu Matabaro, wari uhinduwe na Omborenga Fitina.

Marines FC yabonye igitego cya kabiri ku munota wa 82 ku mupira Ishimwe Jean Rene yambuye umupira Mugisha Gilbert, atera ishoti rikomeye hejuru mu nguni, Umunyezamu Ndzila ntiyamenya uko bigenze. 

Mbere yuko umukino urangira umusifuzi wa kane yongeyeho iminota ine y’inyongera.

Ku munota wa 90+1′ APR FC yatsinze igitego cya gatanu ku mupira 

Bizimana Yannick yananiwe kuroba  umunyezamu Matabaro wari wasohotse, awukuyemo usanga Omborenga Fitina awuboneza mu izamu, ba myugariro ba Marines FC bananirwa kuwuhagarika.

Umukino warangiye APR FC inyagiye Marines FC Ibitego 5-2  mu mukino w’ikirarane w’umunsi wa 17 wa shampiyona.

Ikipe y’Ingabo yayoboye Shampiyona n’amanota 42, irusha atandatu Rayon Sports ya kabiri, yo yatsinze Amagaju FC igitego 1-0 kuri uyu wa Gatatu.

Musanze FC ni iya gatatu n’amanota 34 nyuma yo kunganya na Sunrise FC ubusa ku busa.

Muri uyu mukino abafana ba APR FC Yasezereho  Umunya-Cameroun Salomon Bindjeme Banga waguzwe na Al-Shorta SC yo muri Iraq, yashimiwe n’ubuyobozi bwa APR FC nyuma y’amezi atandatu yari amaze muri iyi Kipe y’Ingabo.

Nubwo atakinaga, uyu myugariro wo hagati yari akunzwe cyane n’abafana ba APR FC bamuririmbye ndetse baramuterura.

  • SHEMA IVAN
  • Gashyantare 7, 2024
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE