Amb. Busingye yanyomoje abashinja u Rwanda kuba rudatekanye ku mpunzi

  • NTAWITONDA JEAN CLAUDE
  • Nyakanga 14, 2023
  • Hashize amezi 11
Image

Nyuma y’uko Urukiko rw’Ubujurire mu Bwongereza rutangaje ko kohereza mu Rwanda by’agateganyo abimukira binyuranyije n’amategeko mpuzamahanga, bamwe mu biyita abasesenguzi babogamiye ku basebya urw’imisozi Igihumbi bababajwe n’uko urwo rukiko rutemeje ko u Rwanda rudatekanye ku kwakira impunzi n’abasaba ubuhungiro.

Muri abo basesenguzi harimo Margaret Owen, Perezida w’Umuryango w’Abapfakazi uharanira Amahoro binyuze muri Demokarasi, wanditse ibaruwa agaragaza ko yishimiye umwanzuro w’urukiko ariko akaba atarishimiye kuba rutaranavuze ko u Rwanda rudatekanye ku mpunzi n’abasaba ubuhungiro.

Uwo mudamu wiyemerera ko yasuye Repubulika Iharanira Demokarasi ya Congo (RDC), yabogamiye ku bashinja u Rwanda kugaba ibitero mu Burasirazuba bw’icyo gihugu n’ibindi binyoma byenyegezwa n’abatarushakira ibyiza birimo “kuba rusahura amabuye y’agaciro” n’ibindi.

Ntiyatinye no kuvuga ko abasaba ubuhungiro bakoherezwa n’u Bwongereza “bashobora guhatirwa kwinjira mu mitwe yitwaje intwaro, agaragaza n’imibare idafitiwe gihamya y’uko 53% by’Abanyarwanda badakora.

Ambasaderi w’u Rwanda mu Bwongereza Busingye Johnston, yasubije iyo baruwa yasohotse mu kinyamakuru The Guardian ku ya 6 Nyakanga ishimangira ko u Rwanda rudatekanye ku mpunzi n’abasaba ubuhungiro, yemeza ko rwizewe kandi rucumbikiye impunzi n’abasaba ubuhungiro barenga 140,000 bishimira amahoro n’umutekano baburiye mu bihugu byabo.

Yavuze ko iyo baruwa ishinja u Rwanda ari urundi rugero rufatika rw’imyumvire ishaje kuri Afurika, aho bamwe bakiyibona nk’ubutaka bw’umwijima kandi bwugarijwe n’ibyago by’urudaca.

Ashishikariza Margaret Owen n’abandi bose bafite imyumvire nk’iyo gusura u Rwanda, ati: “Mujye mu Rwanda maze mwirebere Igihugu kigezweho, gitanga icyizere kandi gitera imbere turimo kubaka. Uburyo twakiramo impunzi byashimwe n’Ishami ry’Umuryango w’Abibumbye ryita ku Mpunzi (UNHCR) n’abandi barubona nk’intangarugero.”

Yakomeje atanga urugero rw’uburyo u Rwanda rwatoranyirijwe kwakira impunzi n’abasaba ubuhungiro baturutse muri Libya, abakobwa bavuye muri Afghanistan bakaba bakomeje amasomo mu Rwanda nta nkomyi ndetse n’impunzi zirenga 130,0000 zavuye mu bihugu bitandukanye nko mu Burundi, RDC n’ahandi.

Yanavuze kandi ko u Rwanda ruza ku mwanya wa gatatu muri Afurika mu kugira ubwisanzure ku bukungu, urwa mbere mu kugira ijanisha rinini ry’abagore mu Nteko Ishinga Amategeo (61.3%), aho usanga no mu zindi nzego abagore bahagarariwe ku rwego rwo hejuru.

Ivangura no guheza mu Rwanda byajyanye n’amateka mabi yaranze u Rwanda mu myaka ikabakaba 30 ishize

Icyizere cyo kubaho mu Rwanda cyavuye ku myaka 49 mu mwaka wa 2000 kigera ku myaka ikabakaba 70 uyu munsi, nk’uko bigaragaza n’ikigo cy’Igihugu cy’Ibarurishamibare mu Rwanda (NISR). Intego yo kugeza serivisi z’ubuvuzi n’iz’uburezi kuri bose na yo ngo irimo gukozwaho imitwe y’intoki.

Ati: “U Rwanda ni igihugu gitekanye. Umutekano muke uri mu gihugu cy’abaturanyi cya Repubulika Iharanira Demokarasi ya Congo (RDC) ni ikibazo kiri imbere hagati yabo. U Rwanda rukora ibikwiye byose mu guharanira ko icyo kibazo kitagira ingaruka ku mutekano w’abaturage barwo cyangwa undi uwo ari we wese uhawe ikaze ku butaka bwacu. Nyuma y’amateka mabi twanyuzemo, iyo izahora ari intego y’ibanze.”

Yakomeje agaragaza ko Leta ya RDC n’ingabo zayo (FARDC) bananiwe guha umutekano usesuye abaturage babo ahubwo bagahitamo gutangiza ubufatanye bupfuye n’imitwe y’iterabwoba nka FDLR, umwe mu mitwe yitwaje intwaro irenga 130 ibarizwa mu Burasirazuba bw’icyo Gihugu.  

Yagaragaje ko umutwe w’iterabwoba wa FDLR ugizwe kandi washinzwe n’abiganjemo abagize uruhare muri Jenoside yakorewe Abatutsi mu 1994, ariko ngo ikibabaje ni uko abawuvugaho bagerageza uko bashoboye bakagabanya uburemere bw’ingengabitekerezo y’ubuhezanguni yabasaritse n’umugambi wo gutsemba Abanyekongo b’Abatutsi bamaranye imyaka ikabakaba 30.

Yashimangiye ko Leta y’u Rwanda izakomeza gukora ibisabwa byose mu gusigarira amahoro, umutekano, imibereho myiza n’iterambere rirambye ry’abaturage bayo.

  • NTAWITONDA JEAN CLAUDE
  • Nyakanga 14, 2023
  • Hashize amezi 11
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE