Amajyepfo: Haracyakwiye kongera imbaraga mu buhinzi bwa kawa

  • Imvaho Nshya
  • Kanama 10, 2023
  • Hashize amezi 10
Image

Intara y’Amajyepfo ikorwamo ubuhinzi bw’ibihingwa  bitandukanye harimo n’ubwa kawa, ariko kuba ibiti byayo bishaje byagaragaye ko bigabanya umusaruro, hakaba hagenda hashyirwamo imbaraga ngo umusaruro uzamuke.

Nk’uko byatangajwe na Guverineri w’Intara y’Amajyepfo, Kayitesi Alice, yavuze ko ubuhinzi n’ubworozi bufatwa nk’inkingi ya mwamba, ariko kwesa umuhigo w’umusaruro wa kawa utagezweho.

Yagize ati: “Mu bijyanye n’ubuhinzi, ntitwabashije kugera ku rugero mu bijyanye n’ibitumbwe bya kawa, kuko intego twari twarihaye  ntitwayigezeho twagarukiye kuri 86%, bikaba byaraduhaye umukoro wo kumva ko hari igikwiye gukorwa havugururwa ubuhinzi bwa kawa by’umwihariko twita ku guhinga ibiti bishya, kuko ibishaje  bigaragaza ko umusaruro ugenda ugabanyuka, tukazabifashwamo n’umushinga wo kuvugurura kawa dufatanyijemo na NAEB uzakorera mu Turere twinshi tugize Intara y’Amajyepfo”.

Ku rundi ruhande ariko nubwo umusaruro wo mu gihembwe cy’ihinga 2003A utabaye mwiza kubera izuba, hagenda hashakishwa uburyo bwo kubikemura abahinzi bakuhira imyaka aho amaziashobora kuboneka kimwe no kubungabunga ubutaka.

Yagize ati: “Intego twari twarihaye twazigezeho, Ubuhinzi nk’inkingi ya mwamba dushingiyeho, bwibanda ku bihingwa byatoranyijwe ari byo ibishyimbo, ibigori, soya, imyumbati, ibirayi, umuceri, ingano, ni byo dushyiramo imbaraga cyane nubwo hari n’ibindi bihingwa duhinga. Intego twihaye ingana na Hegitari 388 518 twageze kuri Hegitari zisaga 399 000 n’umusaruro wari uteganyijwe twawugezeho”.

Nubwo habayeho imbogamizi y’izuba, igihembwe cya kabiri cyakuyemo icyo cyuho, abahinzi barerejeje.

Ati: “Nubwo twagize imbogamizi z’izuba mu gihembwe cya A ariko mu cya 2 byagenze neza  ibitaragezweho mu cya mbere bigerwaho ndetse byunganirwa n’inyunganizi ya Leta yahaye abaturage mu kuzamura umusaruro”.

Igikorwa cyafashije Intara y’Amajyepfo kuzamura umusaruro w’ubuhinzi kijyanye n’imashini zuhira zatanzwe ku nkunga y’Ishami ry’Umuryango w’Abibumbye ryita ku Buhinzi FAO, zigera kuri 296 zaje kunganira mu kurwanya izuba, ahegereye amazi abaturage  bakabasha kuhira kandi abahinzi baziherewe ubuntu.

Umusaruro w’ibitumbwe bya kawa waragabanyutse kubera ibiti bishaje, harateganywa kubisimbuza

Mu kubungabunga ubutaka hagamijwe kuzamura umusaruro w’ubuhinzi haciwe amaterasi, hanarwanywa isuri. 

At: “Uyu mwaka hakozwe amaterasi y’indinganire twayazamuyeho Hegitari 688 ndetse kurwanya isuri hagezwe kuri 90,3% kandi ini igikorwa kigikomeza”.

Umukamo ntuhuye n’umubare w’amatungo ahari

Mu bworozi naho haracyarimo ikibazo cyo kuba umubare w’inka uhari ari munini ugereranyije n’umukamo zitanga, bikaba bisaba kongeramo imbaraga aborozi bakorora inka zitanga umukamo.

Guverineri Kayitesi yagize ati: “Mu bworozi, urugendo tugomba kugenda ruracyari rurerure kuko iyo tugereranyije umukamo dufite n’amatungo dufite tubona  bitarahura neza. Mu nka 408 000 zibarurwa mu Ntara y’Amajyepfo dufitemo umukamo  wa litiro 212 900, ukusanywa mu makusanyirizo 24 ari hirya no hino mu Turere tukaba nibura twaragerageje kuzamuka, kuko ayakusanyirizwaga hirya no hino muri za makusanyirizo, twavuye kuri 27% tugera kuri 50% ariko birumvikana ko tugomba kongeramo imbaraga nyinshi”.

Abafatanyabikorwa bashimirwa uruhare bagira mu kuzamura umusaruro, aho muri iyi Ntara y’Amajyepfo hakorera nk’imishinga ya SAIP ikorera mu Karere ka Nyanza, CIDAT ikorera hafi mu Turere twose tw’Intara y’Amajyepfo, RDDP ikorera muri Ruhango, Nyanza na Huye, PRISM isa n’aho ikorera mu Turere twose tw’Intara y’Amajyepfo,  umushinga wa Green Amayaga ukorera mu Turere dutanu n’indi.

Yanditswe na NYIRANEZA JUDITH

  • Imvaho Nshya
  • Kanama 10, 2023
  • Hashize amezi 10
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE