AgDF mu masezerano ya miliyari 34.6 Frw avugurura uruhererekane rw’ibiribwa

  • ZIGAMA THEONESTE
  • Ugushyingo 23, 2023
  • Hashize amezi 3
Image

Ikigega Agaciro Devolopment Fund (AgDF) cyinjiye mu masezerano n’Umushinga Hinga Wunguke afite agaciro ka miliyoni 28 z’Amadolari y’Amerika, ni ukuvuga asaga miliyari 34.6 z’amafaranga y’u Rwanda, agamije kunoza uruhererekane rw’ibiribwa mu Gihugu.

Binyuze muri ubwo bufatanye, Umushinga Hinga Wunguke uterwa inkunga n’Ikigo cy’Abanyamerika gishinzwe Iterambere Mpuzamahanga (USAID) ugiye gufatanya na AgDF kongera serivisi z’ubuhinzi zigera ku bahinzi bo mu Turere 13 uwo mushinga ukoreramo.

Utwo Turere Umushinga Hinga Wunguke ukoreramo kugeza mu mwaka wa 2028 ni Bugesera, Burera, Gakenke, Gatsibo, Karongi, Kayonza, Ngoma, Nyabihu, Nyamagabe, Nyamasheke, Ngororero, Rubavu, ndetse na Rutsiro.

Mu gusinya aya masezerano AgDF yari ihagarariwe n’Umuyobozi Mukuru wayo Tesi Rusagara, mu gihe  Hinga Wunguke yari ihagarariwe n’Umuyobozi wayo Daniel Gies.

Ayo masezerano yashyizweho umukono ku wa Gatatu tariki ya 22 Ugushyingo i Kigali, yitezweho gufasha bimwe mu bigo bikora muri urwo rwego no guhuza abahinzi bato n’amasoko y’abongerera agaciro umusaruro wabo.

Nanone kandi azafasha gushakira hamwe amahirwe mashya bafatanyamo mu ishoramari rishyigikira abahinzi n’abatunganya umusaruro wabo mu kubona amasoko, kugira ubumenyi mu gufata neza umusaruro no kubaka ibikorwa remezo bifasha mu kugabanya ibihombo bya nyuma y’isarura n’ibibera mu nganda.

Ni amahirwe afunguriwe kandi abafite ubucuruzi bushingiye ku buhinzi, azabafasha guhaza ibyifuzo by’abakiliya babo no gushyiraho ingamba zibafasha gutunganya umusaruro wujuje ubuziranenge n’intungamubiri.

Ntare Jelly, ushinzwe ibikorwa mu Kigega  Agaciro Development Fund(AgDF) yagaragaje ko ubusanzwe bafite ibikorwa byo guteza imbere Kompanyi z’ubuhinzi, bityo ko gukorana na  Hinga Wunguke bizarushaho kungerera umusaruro ibyo bigo basanzwe bakorana.

Yagize ati: “Dusanzwe dufite Kompanyi zikora mu buhinzi kandi zikeneye ubufasha; twajyaga tuzifasha ariko aba baje kugira ngo tuzifashe biruseho atari gufasha Kompanyi gusa, ahubwo n’amakoperative akeneye imbaraga kugira ngo izo kompanyi zikore neza.”

Yakomeje agira ati:”Aya masezerano tugiranye ni ukugira ngo tubashe kugera kuri wa muhinzi wo hasi kugira ngo tumufashe na we azagere kuri kompanyi, bizatange umusaruro ugaragara uzagera ku gihugu no ku byo twohereza mu mahanga.”

Umuyobozi Mukuru wa AgDF na we yagize ati: “Tunejejwe cyane no kwagura ubufatanye bugamije gukemura imbogamizi mu ruhererekane rw’ibiribwa kugira ngo abahinzi barusheho kongera umusaruro, bagere ku masoko menshi ariko binjiza n’amafaranga.”

Ku ruhande rwa Hinga Wunguke na bo bavuga ko gukora na Agaciro Development Fund bizabafasha kugena neza gahunda izateza imbere ubuhinzi mu Rwanda.

Daniel Gies, Uhagarariye Hinga Wunguke yagaragaje ko ubusanzwe uyu mushinga usanzwe ufite intego yo kuzamura ubuhinzi bityo bo bakorana n’abahinzi umunsi ku munsi.

Yagize ati: “Ubufatanye bwacu na Agaciro Development Fund bizadufasha kunoza imikorere mu ishoramari ry’ubuhinzi kuko basanzwe bakora ubukanguramba mu ishoramari mu kongerera agaciro ibikomaka ku buhinzi, gufasha abahinzi kubona amasoko.

Yakomeje ashimangira ko AgDF yiteguye gushora imari ifatika muri Kompanyi zikora mu ruhererekane rw’ubuhinzi harimo  uruganda rukora ifumbire rwa Rwanda Fertaliser Campany, urutunganya ifu y’imyumbati Kinazi Casava Plant n’izindi.

 Ati: “Gukorana na bo bizafasha abahinzi kubona ifumbire, bazagire ubumenyi kurushaho mu byo kongera umusaruro, tuzakorana  n’inzego za Leta  n’iz’abikorera dufasha abahinzi kugera ku mafaranga”.

Muri iyi myaka itanu uzamara, biteganyijwe ko Umushinga Hinga Wunguke uzashyira imbaraga mu gufasha nibura 30% by’abagore bafite imyaka yo kubyara kubonera ku gihe indyo yuzuye, mu rwego rwo guhangana n’imirire mibi ndetse n’igwingira mu bana bari munsi y’imyaka itandatu.

  • ZIGAMA THEONESTE
  • Ugushyingo 23, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE