Abimukira bagera ku 8,600 bapfiriye mu nzira bashaka ubuhungiro

Umuryango Mpuzamahanga ushinzwe Abimukira, (IOM) watangaje ko mu mwaka wa 2023, abimukira bagera ku 8,565 bapfiriye mu nzira berekeza mu bihugu bitandukanye bashaka ubuhungiro.

Uyu mubare uri hejuru cyane ugereranyije n’umwaka wa 2022 aho impfu ziyongereyeho 20%. 

Mu bapfuye hari abarohamye mu nyanja  abakoze impanuka ndetse n’abashimuswe. 

Umuryango Mpuzamahanga ushinzwe Abimukira (IOM) utangaza ko hakwiye kugira igikorwa ngo hakumirwe izi mfu.

Ugochi Daniels, Umuyobozi Mukuru wungirije muri uyu Muryango IOM, yagize ati: “Iyi mibare yakusanyijwe n’umushinga w’Abimukira babura  iteye ubwoba. Iratwibutsa ko tugomba gusaba ko hajyaho ingamba zikomeye zishobora kwimura abantu mu mutekano.”

Imyaka icumi irashize hatangijwe umushinga wo gushaka abimukira babura. Ubu ni bwo hapfuye abimukira benshi kuva 2014.

Mu mwaka wa 2022 abimukira bapfiriye mu nzira bari 7,141, mu 2021 bari 6,201, mu 2020 bari 4,302, mu 2019 bari 5,318, mu 2018 bari 5,008, mu 2017 bari 6,290, mu 2016 bari 8,084, 2015 bari 6,750 mu gihe mu 2014 abapfuye bari 5,548.

Inzira  zemewe zo kujya gushakira ubuzima mu bindi bihugu zikomeza kuba nke bigatuma abantu ibihumbi banyura mu nzira zishyira ubuzima bwabo mu kaga.

Hafi ya kimwe cya kabiri cy’abantu bapfuye bazize kurohama, icyenda ku ijana bazize impanuka z’imodoka, naho barindwi ku ijana bakorewe ihohoterwa.