Abimukira 5 bapfuye ubwo  bambukaga bagana mu Bwongereza 

  • KAMALIZA AGNES
  • Mata 23, 2024
  • Hashize ibyumweru 4
Image

Abimukira batanu baguye mu mpanuka y’ubwato ubwo bageragezaga kwambuka bagana mu Bwongereza nyuma y’uko ejo ku wa 22 Mata 2024, u Bwongereza bwemeje umushinga w’itegeko ryo kohereza abimukira mu Rwanda bajyayo mu buryo bunyuranyije n’amategeko. 

Ibitangazamakuru byo mu Bufaransa birimo Voix du Nord, byatangaje ko imirambo yabonetse ku mucanga wa Wimereaux mu Majyaruguru y’u Bufaransa kuri uyu  wa Kabiri tariki ya 23 Mata. 

Ibikorwa by’ubutabazi biracyakomeje aho abagera ku 100 barokowe n’ubwato bw’u Bufaransa ndetse hashyizweho kajugujugu zo kwifashishwa mu butabazi. 

Inteko Ishinga Amategeko y’u Bwongereza yemeje umushinga w’itegeko ryo kohereza abimukira basaba ubuhungiro binjirayo mu buryo bunyuranyije n’amategeko mu Rwanda ku wa Mbere.

Minisitiri w’Intebe w’u Bwongereza, Rishi Sunak, yatangaje ko indege ya mbere izageza abimukira mu Rwanda mu byumweru biri imbere  hagati y’icya  10 na 12.

Rishi Sunak  yagaragaje ko izi ari ingamba   zo kurwanya abimukira binjira muri iki gihugu aho baba baturutse hose bambutse umuyoboro w’u Bwongereza mu twato duto.

Ubwo yari mu kiganiro n’abanyamakuru ejo tariki 22 Mata 2024, Rishi Sunak, yatangaje ko Guverinoma y’u Bwongereza yamaze gutunganya ibisabwa byose birimo gutegura ikibuga cy’indege bazahagurukiraho ndetse ko indege yateguwe, n’abantu 500 bazabaherekeza baje mu Rwanda.

Kuzana abimukira mu Rwanda bikubiye mu masezerano yasinywe mu 2022 hagati y’u Rwanda n’u Bwongereza akaba akubiyemo ubufatanye mu iterambere no gukemura ibibazo by’Abimukira.

Hagati aho u Rwanda rwashyizeho Komite ikurikirana ishyirwa mu bikorwa ry’aya masezerano, hakazanashyirwaho urwego rushinzwe kumva ibibazo by’aba bimukira  igihe haba hari uvuga ko bitakozwe neza.

  • KAMALIZA AGNES
  • Mata 23, 2024
  • Hashize ibyumweru 4
TANGA IGITEKEREZO
Bazungu Izabayo Themistocres says:
Mata 23, 2024 at 5:20 pm

Yego , nibyiz cyane igihugu cyacu gikomerezaho

Jeandamour says:
Mata 24, 2024 at 11:17 am

Twishimiye ishyirwamubikorwa ryuwo mushinga.kandi tubahaye ikaze lwacu haragendwa .

Andika igitekerezo

AMATEGEKO AGENGA IYANDIKA RY'IGITEKEREZO CYAWE