Abavuye muri FDLR barashima Kagame wanze igihugu cya “vamo njyemo”

  • NGABOYABAHIZI PROTAIS
  • Ukuboza 8, 2023
  • Hashize amezi 3
Image

Bakiri mu mashyamba ya Repubulika Iharanira Demokarasi ya Congo (RDC), ababayoboye bababwiraga ko intego yabo ari iyo kuzataha bakirukana Abatutsi mu Rwanda kuko bari batarasogongera ku byiza u Rwanda rugezeho byashibutse ku kwimakaza ubumwe bw’Abanyarwanda.

Abo ni bamwe mu bahoze mu mutwe w’iterabwoba wa FDLR, batahutse bazi ko bataribumare kabiri ariko bahageze bakiranwa yombi ndetse basanga bafite uburenganzira bungana n’ubw’abo basanze mu gihugu n’uruhare rungana mu guharanira iterambere ry’igihugu.

Bavuga ko batakaje umwanya wo kugambirira gusenya ubumwe bw’Abanyarwanda, bagashimira Perezida wa Repubulika y’u Rwanda Paul Kagame waharaniye kubaka Igihugu aho Abanyarwanda bose bashyize hamwe, akanga kubaka Igihugu cy’amakimbirane ya ‘vamo njyemo, cyangwa sohoka ninjire’.

Abavuganye n’Imvahon Nshya, bagaragaje ko nyuma yo kumva umugambi wa Guverinoma y’u Rwanda wo gucyura abana b’u Rwanda bari baraheze ishyanga ku bw’imyumvire mibi, bahisemo gutahuka batifitiye icyizere ariko icyabashimishije ni uko basanze imvugo ari yo ngiro.

Mu buhamya bwabo bagaragaje ko u Rwanda rukwiye kubaho umutekano usesuye kuko abaturage bose bafite agaciro kangana nta vangura iryo ari ryo ryose, bakicuza igihe bamaze gucura imigambi mibisha yo kurubuza amahwemo.

Maj. Kubwayo Peter ni umwe muri abo bahoze muri FDLR uvuga ko kimwe cya kabiri cy’ubuzima bwe yakimaze mu mashyamba kuko yamazemo imyaka 25, ubu akaba ari mu kigero cy’imyaka 48.

Yagize ati: “Imyaka namaze mu mashyamba najyaga numva Radio Rwanda idushishikariza gutaha, twe ntitubyumve kubera ko abaduhaga amasomo batubwiraga ko nta mpamvu yo gutaha umwanzi akiri mu Rwanda, ubwo nawe urumva yari Umututsi muzi namwe imyaka bamaze batotezwa kugeza ubwo bakorerwa Jenoside mu 1994. Mu gihe Perezida Paul Kagame yahagaritse Jenoside, Abanyarwanda bamwe barimo ba twebwe twahisemo guhungira muri Congo, abari badukuriye badutegurira natwe kuzaza tukongera tukirukana abarimo.”

Nyuma yo kwakiranwa urugwiro mu rwamubyaye ndetse agahabwa amasomo y’uburere mboneragihugu n’ay’imyuga imufasha kwiteza imbere no gutanga umusaruro mu iterambere ry’Igihugu, Maj. Kubwayo avuga ko yasanze akwiriye gushyigikira gahunda yagutse ya Perezida Kagame yo kubanisha abantu bose mu mahoro.

Yagize ati: “Nyuma y’aya masomo tubonera hano muri Mutobo ni bwo natekereje ku mugambi wa Kagame nsanga nta gihugu cya ‘vamo njyemo, injira nsohoke’, ibi akaba ari byo Perezida Kagame adashaka”.

Maj. Kubwayo akomeza anenga bamwe mu Banyarwanda bacyifuza ko u Rwanda rwahora mu ngeso ya “vamo njyemo” bakomeza kubiba urwango n’amacakubiri bifashishije ibihangano, imbuga nkoranyambaga n’ibindi bigamije gusenya ubumwe bw’Abanyarwanda bwubatswe mu myaka igera kuri 30 ishize.

Ati: “Haracyari bamwe mu Banyarwanda bari hanze bacyumva ko u Rwanda ari nka ka kenda bavuga ngo “kampe nkabyinane”, ibi ntaho byageza u Rwanda, abandi ngo “rwigere urumpe”. Bishatse kuvuga ngo u Rwanda duhore duhunga abandi binjira mbese duhore muri ibyo. Ibi rero Perezida Kagame yasanze bidakwiye we ubwe ahitamo gucyura buri mpunzi yose; ndetse yemerera buri wese ubishaka kuba mu gihugu ashaka ariko atitwa impunzi nta gihugu arimo ahubwo ari Umunyarwanda”.

Nkurunziza Patrick na we avuga ko yatahutse 2011, kuri we ngo n’ubwo yamaze imyaka myinshi mu mashyamba ya Congo yizezwa kuzarwana bagakuramo Abanyarwanda barurimo maze bagatura bonyine nawe asanga ngo bidakwiye ko u Rwanda ruhora rumeze nk’inzu umuntu ajyamo ntakinge urugi.

Yagize ati: “Njye navukiye muri Congo numvaga ko kugira ngo nzatahe iwacu kuko bambwiraga u Rwanda mu mateka kugeza ubwo njya mu mitwe igamije gukuraho ubutegetsi bw’u Rwanda yemwe n’abarimo bakavamo, ibi bintu rero nanjye ubu maze kujijuka nsanga atari byiza guhora bamwe bahunga abandi binjira nabwo hamenetse amaraso, iki gihugu icyemezo n’intego Perezida Kagame yafashe cyo guca ubuhunzi ni ingirakamaro buri wese akwiye kumva ibyiza by’igihugu”.

Abava mu mashyamba ya Congo bavuga ko bashingiye ku byiza bagenda babona mu Rwanda bijyanye n’iterambere kimwe n’amahoro; bidakwiye ko abantu bahora bahunga igihugu cyabo bakaba barafashe ingamba zo gushishikariza bagenzi babo bakiri mu mashyamba ya Congo Kinshasa gutahuka.

Amateka y’u Rwanda agaragaza neza ko kuva mu 1959, buri mwaka bamwe mu banyarwanda bahungaga igihugu kugeza mu 1994 ubwo Jenoside yakorewe Abatutsi yahagarikwaga, naho Leta y’Ubumwe bw’Abanyarwanda yiyemeje kurwanya ikitwa ubuhunzi ku Munyarwanda iyo ava akagera.

  • NGABOYABAHIZI PROTAIS
  • Ukuboza 8, 2023
  • Hashize amezi 3
TANGA IGITEKEREZO
UZABUMWANA JEAN PAUL says:
Ukuboza 8, 2023 at 4:39 pm

Good ideas 💡💡💡💡💡

UZABUMWANA JEAN PAUL says:
Ukuboza 8, 2023 at 4:42 pm

Good ideas 💡💡💡💡💡

Andika igitekerezo

AMATEGEKO AGENGA IYANDIKA RY'IGITEKEREZO CYAWE