Abanyeshuri ba UR bahanze udushya tuvugurura ubucukuzi bw’amabuye y’agaciro

  • ZIGAMA THEONESTE
  • Ukuboza 7, 2023
  • Hashize amezi 6
Image

Mu rwego rwo gukomeza kunoza imyigishirize y’ibijyanye n’ubucukuzi bw’amabuye y’agaciro na Gewoloji muri Kaminuza y’u Rwanda (UR), aho tumwe mu dushya abanyeshuri biga muri iri shami bakoze tugamije guhindura urwego rw’ubucukuzi mu Rwanda.

Ni imishinga ijyanye no guhanga ibishya byazamura imikorere inoze mu rwego rw’ubucukuzi bw’amabuye y’agaciro mu Rwanda aho abiga muri iri shami bakora ibikorwa bitandukanye bigamije kongera ubumenyi muri uru rwego.

Udushya twahanzwe twamurikiwe mu Mujyi wa Kigalin  ya 6 Ukuboza 2023.

Uwimpuwe Odile, wiga mu mwaka wa kane w’ishami ry’ubucukuzi bw’amabuye y’agaciro (Mining Engineering), we na bagenzi be bakoze ikoranabuhanga rikoresha umwambaro (Jullet) wambarwa n’abacukuzi ushyirwamo akuma (device) kamenyesha abari imusozi ko ucukura yahuye n’ikibazo ari mu kirombe imbere.

Uwimpuhwe asobanura ko mu gukora uyu mushinga babishingiye ku kuba hari abantu bagira ibibazo mu kirombe bakabura uko batabaza bityo ubu buryo ni bugera henshi bizanoza ibi bikorwa byo gucukura amabuye y’agaciro.

Yagize ati: “Niba umuntu ageze mu kirombe ahantu hatabona atabona n’uburyo bwitumanaho, rero naravuze nti reka nkore nibura icyo gikoresho gituma umuntu ashobora kumenyesha abari hanze ikibazo agize.”

Prof. Rwabuhungu Rwatangabo Digne Edmond, Umuyobozi w’Ishami rya Mine na Jewoloji muri UR, yavuze ko abo bakira cyane muri iyi Kaminuza ari abafite ubumenyi buhagije muri siyansi bakabategura kugira ngo bazasohoke bafite ubuhanga buhagije muri uru rwego.

 Yagize ati: “Hari uburyo bubiri bw’abantu bakora muri Mine, hari abacukura hari abayobora abacukura, basubiza ibisubizo bahura na byo, abo rero ni bo turera. Twebwe tubategura nk’abaje gukemura ibibazo bihari, iyo uhaye umuntu nk’uwo akazi ugomba kumuha n’abacukura kuko ntabwo bo bacukura ahubwo baragenzura.”

Yakomeje agira ati: “Icyo nakubwira ni uko abantu twoherereza abarangije aya masomo badushimira ko ari abantu bazi akazi, duhindura gahunda yo kwigisha ibidukikije, kwita ku mutekano w’abacukura, ibyo byose baba barabyize.”

Anavuga ko ibigo by’ubucukuzi bikwiye kugirira icyizere abarangiza kwiga muri Kaminuza kuko ubumenyi bafite bwizewe, kandi banabaha inama bakazubaha.

Ati: “Muhe nibura nk’amezi atandatu mubanze mukorane, hanyuma muganire kandi niba akubwiye ngo gura iki cyuma kigure, we aba yarabyize, turizera ko uko abo turera bagenda binjira mu murimo uzagenda uhinduka.”

Umuyobozi Mukuru wa Kaminuza y’u Rwanda wungirije ushinzwe Iganamigambi n’Imiyoborere, Dr Rymond Ndikumana avuga ko iri shuri bateganye kuryongerera ubushobozi kugira ngo ritanga umusaruro kurushaho.

Yagize ati: “Ntitwari twagera aho tugomba kugera, mwumvishe nk’ibyo twavuze bijyanye no gushongesha buriya biba bikenewe kugira ibuye ry’agaciro rize ribyazwe ikintu cyangwa cyongererwe agaciro. Ibyo tubikoze umusaruro w’amabuye y’agaciro wakwikuba kabiri. Guhunda dufite ni nyinshi harimo gutanga amasomo y’igihe gito ku basanzwe babikora ariko no guhura n’inzego zibikora ngo turebe ni iki twakongeramo, ndetse n’aba bana ni ukubashyigikira tukabatera ingufu ngo bakomereze aho”.

Umuyobozi Mukuru Ikigo gishinzwe Mine, Peteroli na Gazi mu Rwanda (RMB) Amb. Yamina Karitanyi, yasabye abo banyeshuri gukomeza gushyiramo imbaraga mu byo biga kugira ngo bizabagirire akamaro n’igihugu muri rusange.

Yagize ati: “Muzi icyo mumaze kugeraho, ibyo mwize nimubishyire mu bikorwa kandi mugaragaze ko uru rwego ruzateza imbere Igihugu cyacu. Ndetse munagaragarize abashoramari ko bakwiye kubagirira icyizere ndetse munagaragaze n’impamvu iri shuri ryagiyeho.”

Yakomeje yemeza ko iryo shami ririmo kubakirwa inyubako izatahwa mu mwaka utaha. Yasabye abayobozi ba UR gukomeza gushyira imbaraga mu guteza imbere iri shuri.

Yagize ati: “Ntabwo mukwiye gutegereza ko habaho icyumweru cyahariwe ubucukuzi bw’amabuye y’agaciro gusa. Nk’ikigo cya RMB iyo gikeneye abantu bafite ubumenyi dutekereza mwe UR na IPRC; rero turashaka ko habaho amahugurwa ahagije kugira ngo abantu bamenye kubikora neza.”

Kugeza uyu munsi Kaminuza y’u Rwanda ni yo ifite Ishuri ryigisha Mine n’isuzuma ry’ahari amabuye y’agaciro (Mining and Geology), aho abarirangizamo bahabwa impamyabumenyi y’icyiciro cya kabiri cya Kaminuza (A0).

Kugeza ubu, muri iryo shuri hamaze kurangiza abanyeshuri 267, mu gihe abakirimo kwiga ari 235 mu myaka yose.

UR ivuga ko iryo shuri ryakira abanyeshuri bake kubera ko risaba ibikoresho bihenze na Laboratwari zikomeye zifasha abanyeshuri mu bumenyi ngiro.

Ibi bikorwa byo kumurika ibyakozwe n’aba banyeshuri byakozwe mu cyumweru cyahariwe ubucukuzi bw’amabuye y’agaciro (Rwanda Mining Week) cyatangiye takiri ya 04 Ukuboza hizihizwa Umunsi wahariwe ubucukuzi bw’amabuye y’agaciro ku Isi.

  • ZIGAMA THEONESTE
  • Ukuboza 7, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE