Abanyarwanda baba mu Buhinde bashimiwe gukomera ku muco  

  • NTAWITONDA JEAN CLAUDE
  • Ukuboza 7, 2023
  • Hashize amezi 6
Image

Minisitiri w’Ububanyi n’Amahanga n’Ubutwererane Dr. Biruta Vincent, yashimiye Abanyarwanda baba mu Buhinde kuba bakomeye ku muco nyarwanda aho bimakaza indangagaciro na kirazira.

Yabigarutseho kuri uyu wa Kane tariki ya 7 Ukuboza, ubwo yagezaga ijambo ku Banyarwanda baba mu Buhinde, mu ruzinduko rw’akazi arimo rugamije kurushaho gushimangira umubano mwiza usanzwe urangwa hagati y‘u Rwanda n’u Buhinde.

Yasabye abo Banyarwanda biganjemo urubyiruko gukomeza kugira indangagaciro za Kinyarwanda, ababwira ko u Rwanda rukomeje gutera imbere kandi rutekanye.

Yakomeje abashishikariza kudatezuka ku byo biyemeje byo gusigasira indangagaciro n’umuco nyarwanda, agira ati: “Mukomere ku muco, mugire intego kandi mugire indangagaciro za Kinyarwanda”.

Umubano w’u Rwanda n’u Buhinde ukomeje gukura no kongera imbaraga uko imyaka ishira indi igataha.

Mu mwaka wa 1999 ni bwo u Rwanda rwafunguye ambasade yarwo i New Delhi mu Murwa Mukuru w’u Buhinde, maze runahashyira uhagarariye inyungu zarwo kugeza mu 2001 ubwo rwoherezagayo Ambasaderi wa mbere.

Umubano wafashe indi ntera mu kwezi kwa Mutarama 2017 ubwo Perezida wa Repubulika Paul Kagame yagiriraga uruzinduko rw’akazi mu Buhinde atumiwe na Minisitiri w’Intebe w’icyo Gihugu Narendra Modi.

Mu mwaka wakurikiyeho wa 2018, Minisitiri w’Intebe Narendra Modi, na we yagiriye uruzinduko rwa mbere rw’akazi mu Rwanda.

Muri urwo ruzinduko, ibihugu byombi byasinye amasezerano y’ubufatanye (MoUs) mu nzego zirimo umutekano, ubucuruzi, ubufatanye mu kongera umusaruro w’amata, ubufatanye mu kuzamura umusaruro w’impu, ubuhinzi ndetse n’umuco.

Icyo gihe Modi yageneye u Rwanda impano y’inka 200, zahawe abaturage bo mu Karere ka Bugesera mu Burasirazuba bw’u Rwanda.

Icyo gihe Perezida Kagame na Modi bagiranye ibiganiro byibanze ku ngingo zinyuranye zifitiye akamaro ibihugu byombi, ndetse baniyemeza kurushaho kwagura ubutwererane bakabugeza ku rwego rwisumbuye kandi rutanga umusaruro.   

Ubwo bufatanye burihariye kandi ni ubw’agaciro ku Rwanda kuko ari cyo gihugu cya kabiri cy’Afurika cyagiranye ubufatanye bw’umwihariko n’u Buhinde nyuma y’Afurika y’Epfo.

Ubutwererane hagati y’u Rwanda n’u Buhinde bwarushijeho gutera imbere mu nzego zitandukanye zirimo iterambere ry’ibikorwa remezo, ingufu, ubuhinzi, uburezi, amahugurwa no kubaka ubushobozi.

Ubwo butwererane bwavuye mu nzego z’iterambere bugera no mu rwego rw’umutekano n’ibya gisirikare.

Kugeza uyu munsi, u Buhinde bwafunguye  Ambasade yabwo mu Rwanda aho Ambasaderi wabwo wa mbere ari Amb. Oscar Kerkettahas akaba yaranamaze kwemezwa na Guverinoma y’u Rwanda.

Ni mu gihe hari hashize imyaka myinshi u Buhinde buhagarariwe mu Rwanda n’Ambasade yabwo ibarizwa i Kampala muri Uganda. Bityo gufungura Ambasade i Kigali bibonwa nk’intambwe y’ingirakamaro mu kurushaho kwimakaza umubano w’ibihugu byombi.

Ambasaderi w’u Rwanda mu Buhinde uyu munsi ni Mukangira Jacqueline, ari na we uhagarariye inyungu z’u Rwanda muri Sri Lanka, Maldives, Bangladesh na Nepal.

Kugeza uyu munsi u Rwanda rutumiza mu Buhinde ibicuruzwa bifite agaciro ka miliyoni zisaga 130 z’amadolari y’Amerika, birimo imiti, ibyuma, imashini n’ibindi bikoresho.

Mu Buhinde hagaragara amahirwe y’isoko ryagutse ku ikawa y’u Rwanda, icyayi, urusenda n’ibindi birungo, amavuta yo kurya ndetse n’ibinyamisogwe, bityo rikaba rikeneye kubyazwa umusaruro mu buryo bufatika.

Minisitiri Dr. Biruta na Ambasaderi Mukangira baganirije Abanyarwanda baba mu Buhinde
  • NTAWITONDA JEAN CLAUDE
  • Ukuboza 7, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE