Abanduye Ebola muri RDC bageze kuri 8 067

Minisiteri y’Ubuzima muri Repubulika Iharanira Demokarasi ya Congo (RDC) yatangaje ko abantu bamaze kwemezwa ko banduye Ebola bageze ku 8 067, mu gihe 3 901 muri bo bamaze guhitanwa n’iki cyorezo.

Iyi mibare yatangajwe kuri uyu wa Mbere, tariki ya 28 Nzeri 2026 mu gihe Ebola ikomeje gukwirakwira mu ntara zo mu Majyaruguru ashyira Uburasirazuba bw’iki gihugu.

Iki cyorezo cyatewe n’ubwoko bwa virusi ya Ebola buzwi nka Bundibugyo, kimaze kugera mu ntara esheshatu no mu turere tw’ubuzima 61.

Iki cyorezo cyatangiye muri Gicurasi 2026, kikaba ari icya kabiri gikomeye cya Ebola kimaze kwibasira RDC.

Cyakwirakwiye ku muvuduko udasanzwe, kuko mu minsi 100 ya mbere gusa cyari kimaze kwandurwa n’abantu bagera ku 5 000.

Virusi ya Bundibugyo itera iki cyorezo itandukanye n’ubwoko bwa Zaire bwateye ibyorezo byinshi bikomeye bya Ebola mu bihe byashize.

Ibi byatumye ibikorwa byo guhangana nacyo bigorana, kuko inkingo n’imiti byifashishijwe mu byorezo byabanje byari byarakorewe cyane cyane kurwanya ubwoko bwa Zaire.

Iki cyorezo ni icya 17 cya Ebola cyibasiye iki gihugu, mu gihe Ishami ry’Umuryango w’Abibumbye ryita ku Buzima, OMS, ryagishyize mu rwego rw’ibibazo by’ubuzima rusange bihangayikishije Isi.

Kurwanya iyi virusi bikomeje kugorana cyane mu Majyaruguru ashyira Uburasirazuba bwa RDC, kubera intambara zimaze imyaka myinshi, kwimurwa kw’abaturage n’akajagari muri zimwe muri serivisi z’ubuzima.

Ku rwego rwa Afurika iki Cyorezo kiri ku mwanya wa kabiri mu byorezo bya Ebola byahitanye abantu benshi nyuma y’ikibasiye Afurika y’Uburengerazuba hagati ya 2014 na 2016 aho abarenga ibihumbi 28 600 banduye Ebola mu gihe abarenga ibihumbi 11 bahitanwe nacyo mu bihugu bya Guniea, Liberia na Sierra Leone.