Abakobwa baravuga imyato “Cotex” imeswa

  • NTAWITONDA JEAN CLAUDE
  • Kanama 29, 2022
  • Hashize imyaka 2
Image

Abana b’abakobwa baravuga imyato KosmoPad (Kotegisi/Cotex imeswa) bitewe nuko yababereye igisubizo. KosmoPad ni umwenda w’isuku wifashishwa mu gihe umukobwa cyangwa umugore ari mu mihango cyangwa imugongo.

Ubuyobozi bw’Ikigo cya Kosmotive ikora KosmoPad, busobanura ko KosmoPad ari agakoresho gakozwe mu myenda isanzwe yambarwa, kakagira umwihariko wo gukoreshwa inshuro irenze imwe kandi ngo nta ngaruka ku bagakoresha.

Irumva Keza Benitha w’imyaka 18 uvuka mu karere ka Burera mu ntara y’Amajyaruguru, ashima abagize igitekerezo cyo gukora iyi myenda y’isuku kuko ngo yamuhinduriye ubuzima.

Ati: “KosmoPad zaramfashije cyane ugereranije n’izindi pad (Cotex). Najyaga ngira ikibazo cyo kubabuka mu gihe nabaga nambaye ziriya zikoreshwa rimwe nkahita njugunya.

Aho ntangiye gukoresha KosmoPad ntabwo nongeye guhura n’icyo kibazo”.

Ikamba Amene Divine wo mu Karere ka Gicumbi mu Murenge wa Byumba, na we agaragaza ko KosmoPad ari igikoresho k’isuku cyiza ashingiye ku giciro n’imikoreshereze yacyo.

Yagize ati: “Ku kijyanye n’ubukungu turafasha cyane kuko urebye nk’utundi dukoresho dusanzwe abandi basanzwe bakoresha, utwo ukoresha mu mezi 6 ndacyeka twaba tudukubye nk’inshuro nk’enye KosmoPad bagura uwo munsi”.

Bitewe n’aho ibiciro bigeze bya kotegisi (pad) zisanzwe, Ikamba agaragaza ko mu mezi atandatu akoresha amafaranga ari hejuru y’ibihumbi icumi.

Akomeza avuga ko KosmoPad yaguze iy’amafaranga ibihumbi bibiri azakoresha mu mezi atandatu. Gukoresha KosmoPad byamufashije kwizigamira binamufasha kwiyitaho.

Umuziranenge Blandine, watangije ikigo Kosmotive ikora KosmoPad, asobanura ko Kosmotive yayitangiye mu 2014 akora ubuvugizi bw’abagore n’abana abinyujije mu kwandika.

Mu 2017 yanditse ku kibazo cy’abana b’abakobwa n’abagore basiba ishuri cyangwa akazi kubera ko batabona ibikoresho by’isuku mu gihe bari mu mihango.

Yagize ati: “Icyo gihe nandika hari mu 2017, umubare wari wagaragaye mu bushakashatsi wagaragazaga ko ari 18%, dukora ubuvugizi uwo mwaka wose”.

Umugiraneza yafashe umwanzuro wo kudakomeza kuvuga ahubwo ashaka icyo yakora cyaramba cyaba gihendutse kurusha ibindi. Ati: “Ni icyo ngicyo cyatumye dutangira KosmoPad”.

Asobanura ko KosmoPad zikorwa mu mwenda usanzwe kandi ufite ubuziranenge. Agira ati: “Icyo twibandaho cyane ni ukureba ni ba nta cyo byatwara uruhu, kuba nta miti y’inganda irimo”.

Umuyobozi Mukuru ushinzwe iterambere ry’uburinganire no guteza imbere abagore muri MIGEPROF, Ngayaboshya Silas, avuga ko Leta yakoze byinshi kuri iki kibazo gihangayikishije cy’impapuro z’isuku.

Ashimangira ko Leta yakuyeho imisoro ku mpapuro z’isuku cyane cyane ku bakobwa n’abagore bari mu mihango.

Ati: “Iki ni kimwe mu bisubizo nka Ministeri y’Uburinganire n’iterambere ry’Umuryango tubona ko bizaba igisubizo kirambye”.

Avuga ko hakiri ikibazo cyo kwigisha no kuzamura ubumenyi n’imyumvire mu ikoreshwa ryazo. Umuziranenge avuga ko yahaye akazi abakobwa 100. Mu myaka ibiri bazakora KosmoPad zishobora guhabwa abagore n’abakobwa bagera kuri miliyoni ebyiri mu Rwanda.

Ku munsi bafite ubushobozi bwo gukora KosmoPad udupaki 1000, buri paki irimo KosmoPads eshanu.

  • NTAWITONDA JEAN CLAUDE
  • Kanama 29, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE