Abakekeraga Afurika inganda z’inkingo mu myaka 30 baribeshye- Perezida Kagame

  • NTAWITONDA JEAN CLAUDE
  • Ukuboza 18, 2023
  • Hashize amezi 2
Image

Icyorezo cya COVID-19 cyatunguye Isi ariko kikababaza cyane umugabane w’Afurika, kubera ko wari utiteguye haba mu bikorwa remezo by’ubuzima no kuba wakwikorera imiti n’inkingo, ariko cyasize isomo rikomeye ndetse kiba n’umusemburo wo gukora ibyo amahanga yabonaga ko bidashoboka.

Perezida wa Repubulika y’u Rwanda Paul Kagame, yahishuye uburyo nyuma y’igihe gitoya Afurika yungutse uruganda rwa mbere rukoresha ikoranabuhanga rigezweho rya mRNA mu gukora inkingo, mu gihe byabanje no kugorana kugira ngo Abanyafurika bahabwe doze zakozwe muri ubwo buryo.

Ubwo hatangizwaga ikoranabuhanga rigezweho rya mRNA mu gukora inkingo, zari zigenewe abo mu bihugu byateye imbere gusa Afurika yo igacibwa intege ko kugira ngo iryo koranabuhanga irigereho byasaba igihe kitari munsi y’imyaka 30.

Mu ijambo Pererezida Kagame yagejeje ku bitabiriye itahwa ry’uruganda rw’inkingo rwa BioNTech rwuzuye i Masoro mu Mujyi wa Kigali, yavuze ko abacaga intege Abanyafurika bagitangira urugendo rwo kwikorera inkingo bibeshyaga kuko kuri ubu byashobotse.

Yagize ati: “Mushobora kwibuka ko ku ikubitiro byari bizwi ko inkingo za mRNA zidashobora no gutangwa muri Afurika. Byavugwaga ko bigoye cyane ku rwego rwacu rw’ubuzima. Igihe twatangiraga uru rugendo rwo gukora izi nkingo ku mugabane wacu, twabwiwe ko bizatwara nibura imyaka 30. Ibyo byose ntibyari byo. Birashoboka. Kandi kuko bishoboka, biranakenewe.”

Perezida Kagame yahaye ikaze Abakuru b’Ibihugu na Guverinoma, abahagarariye Imiryango Mpuzamahanga n’abandi banyacyubahiro bitabiriye uyu muhango w’ingenzi cyane ku Mugabane w’Afurika no ku Isi muri rusange.

By’umwihariko, yashimye itsinda rya BioNTech ryakoze ubutaruhuka kugira ngo uyu mushinga ube ugeze igihe cyo gutahwa ku mugaragaro.

Yavuze ko icyo gikorwa remezo cyateguriwe kuba mu  bigezweho kurusha ibindi ku Isi yose, kandi umubare munini w’ababonyemo akazi ngo ni abaturuka muri Afurika.

Yashimye inzego zose zikomeje guharanira ubuziranenge bw’imiti, inkingo n’ibindi bikoresho by’ubuvuzi bikorerwa muri Afurika, ashimangira ko ubufatanye n’inzego zinyuranye uhereye kuri BioNTech n’Umuryango w’Ubumwe bw’u Burayi muri Rusange ari wo musemburo w’impinduka nshya zije mu rwego rw’ubuzima ku Mugabane w’Afurika.  

Yashimye Perezida wa Komisiyo y’Umuryango w’Ubumwe bw’u Burayi (EU) Ursula von der Leyen wagaragaje ubwitange budasanzwe mu guharanira ko iyi mikoranire na BioNTech igerwaho.

Yanahishuye kandi ko EU ikomeje gufasha u Rwanda kubaka ubushobozi bwo gukora ubugenzuzi, kongera ubumenyi ndetse n’amahugurwa no gutera inkunga ubushakashatsi binyuze muri Banki y’u Burayi n’Ishoramari.

Yashimye kandi ubuyobozi bw’Ishami ry’Umuryango  w’Abibumbye ryita ku Buzima (WHO), ubuyobozi bwa Komisiyo y’Umuryango w’Afurika Yunze Ubumwe (AU), ubwa Banki Nyafurika Itsura Amajyambere n’abandi bafatanyabikorwa batandukanye bakomeje guhuza imbaraga ngo Afurika yubake ubushobozi bukenewe mu guhangana n’ibyorezo.

Madamu Ursula von der Leyen yavuze ko uru ruganda rwuzuye i Kigali rufite ubushobozi bwo gukora doze miliyoni 50 ku mwaka, bityo rukaba ruzafasha guhangana n’indwara zikomeye  nk’igituntu, Malaria na Kanseri.

Yagize ati: “Izi ni zo mbaraga zo gushyira hamwe ndetse n’ikoranabuhanga.”

Prof. Dr. Uğur Şahin washinze akaba n’Umuyobozi Mukuru wa BioNTech, yavuze ko bagambiriye kubaka uruhererekane rwo gukora inkingo n’indi miti ruramba kandi rufite ubudahangarwa ku Mugabane w’Afurika.

Ati: “Intego yacu muri Afurika iragaragara. Inkingo z’ahazaza zikwiriye gukorerwa muri Afurika, zigakorerwa Abanyafurika kandi zikaba zujuje ibisabwa n’ibikenewe mu Karere no ku rwego mpuzamahanga.”

Urwo ruganda rwatashwe i Kigali rugizwe n’ibyiciro bibiri bishyirwamo Kontineri (BioNTainers) ziza ari uruganda rwuzuye, aho icya mbere gikorerwamo inkingo cyageze mu Rwanda ari na cyo cyamaze kubakirwa.

Ni mu gihe icyiciro cya kabiri kizakora imiti cyitezweho kuzaba cyubakiwe cyanageze mu Rwanda bitarenze mu mpera z’umwaka wa 2024.

  • NTAWITONDA JEAN CLAUDE
  • Ukuboza 18, 2023
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE