Abagore bakwiye ijambo ahafatirwa ibyemezo by’ubuzima- Jeannette Kagame 

  • NTAWITONDA JEAN CLAUDE
  • Nyakanga 19, 2023
  • Hashize amezi 10
Image

Madamu Jeannette Kagame yasabiye abagore umwanya ku meza afatirwaho ibyemezo birebana n’ubuzima bwabo, ndetse bakagira uruhare mu bushakashatsi no gukora imiti n’ibindi bikoresho by’ubuvuzi. 

Yabigarutseho ku wa Kabiri taliki ya 18 Nyakanga, mu kiganiro cyavugaga ku bushakashatsi bukorwa mu birebana n’imiti, inkingo n’ibindi bikoresho byo kwa muganga cyatanzwe mu Nama Mpuzamahanga y’iminsi ine yiga ku iterambere ry’abagore Women Deliver iteraniye i Kigali.

Yagize ati: “Ni ngombwa, birumvikana, birakwiye, kandi birakenewe cyane, ko abagore bagomba kwicara ku meza mu gihe ibyemezo bifatwa ku bijyanye n’ubuvuzi bwabo.”

Yakomeje ashimangira ko ubushakashatsi no gukora imiti n’ibikoresho by’ubuvuzi bifite uruhare rukomeye rudashobora kwirengagizwa, agaragaza ko binyuze mu bufatanye abagore bakongererwa imbaraga mu rwego rwo gukora ubushakashatsi no gukora ibikoresho by’ubuvuzi. 

Yakomeje agira ati: “Niba iterambere, ubutabera bw’imibereho myiza n’ubuzima kuri bose ari intego, reka twiyemeze gukomeza ubumwe mu gusabira abagore umwanya, kubumva no kubazamura buri wese ku giti cye, binyuze mu buvugizi no mu gushyiraho Politiki.”

Yavuze ko igihe hariho Politiki zikwiye, imikorere y’inzego ikaba ihamye, usanga abagore n’abagabo bose barindwa mu bibazo byose uko byaba bifite uburemere kose. Yaboneyeho gusaba abayobozi guharanira ko iyo mikorere yaba umusingi wa serivisi zihabwa abaturage. 

Yashimye umusanzu ukomeye abagore batanze mu gihe cy’icyorezo cya COVID-19, bakaba kandi batanga umusanzu ukomeye mu bijyanye n’inganda zikora imiti, inkingo n’ibikoresho byo kwa muganga muri iki gihe.

Yagize ati: “Abagore bafashije mu kuvumbura, gukora no gukwirakwiza inkingo, igikorwa cyari gutwara nk’imyaka 10, cyakozwe mu gihe kitageze ku mwaka, abo bagore bafashije kurengera ubuzima, bafasha mu rwego rw’ubukungu kandi bakomeza kwita ku muryango muri rusange batirengagije izindi nshingano basanganywe, zaba izirebana n’urugo n’akandi kazi kenshi bagize muri ibyo bihe bigoye.”

Yagaragaje ko mu Rwanda, abagore barii ku ruhembe rw’imbere mu nzego zose z’ubuyobozi, aho 30% by’imyanya yo mu bigo ibamo abagore, mu Nteko Ishinga Amategeko bangana na 61.3% mu gihe 50% by’abagize Guverinoma ari abagore na ho mu Nzego z’Ubutabera bikaba bari kuri 53%. 

Minisitiri w’Ubuzima Dr. Nsanzimana Sabin, yavuze ko gushyiriraho abagore ikirere cyiza bishobora kugerwaho binyuze mu gushora imari mu burezi aho abana b’abakobwa batangira kwigishwa siyansi y’ibanze bagafungurwa no ku bindi bintu nk’ibikorwa remezo, ubuyobozi, gushora imari mu bumenyi, guhanga ibishya n’ubushakashatsi. 

Yavuze ko ari ingenzi kubona abagore barara muri za Laboratwari bakora ubushakashatsi kandi ntibagire ababahutaza bitewe n’uko ari abagore cyangwa abakobwa. 

Ati: “Mfashe urugero, kanseri y’inkondo y’umura ni kanseri yibasira cyane abagore, ariko mu kuyihashya uruhare rw’abagabo na rwo ni ngombwa cyane, ibyo kandi ni ko bimeze ku bijyanye na kanseri ya prostate yibasira abagabo, hagomba kubaho ubufatanye [n’abagore] niba twifuza guca ukubiri n’izo ndwara.”

Aneto Okeke uhagarariye ishami rya BionTech mu Rwanda, yavuze ko urwo ruganda rugeze kure muri gahunda yo kwimakaza uburinganire aho abagore bakora mu nganda za BionTech barenga 50%.

Yavuze ko na hano mu Rwanda abagore barimo gukoresha ari 50%; ati: “Iyo turebye akazi, ntabwo tuvuga ngo aka gakwiye gukorwa n’umugabo, aka gakwiye gukorwa n’umugore, icyo twitaho ni ukuba umuntu yujuje ibyangombwa. 

Dufite abagore bayobora ibijyanye n’ubwubatsi n’abandi bakora indi mirimo inyuranye, ibi rero iyo abagore cyangwa abakobwa bakiri kwiga babibonye bibabera urugero rwiza bakumva ko hari icyo na bo bashobora gukora.”

  • NTAWITONDA JEAN CLAUDE
  • Nyakanga 19, 2023
  • Hashize amezi 10
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE