Abagore bafite ubushobozi n’uburenganzira nk’abagabo- Jeannette Kagame

  • NTAWITONDA JEAN CLAUDE
  • Nyakanga 17, 2023
  • Hashize amezi 10
Image

Madamu Jeannette Kagame yashimangiye ko uburinganire ari uburenganzira abagore bavukana ari na yo mpamvu avuga ko bukwiye kubungabungwa, cyane ko iyo ubwisanzure bw’umugore butsikamiwe, ubuzima bwe bukabangamirwa, usanga amahitamo amureba ayamburwa.

Yabigarutseho kuri uyu wa Mbere taliki ya 17 Nyakanga 2023, mu ijambo yagejeje ku bitabiriye ibiganiro bibanziriza Inama Mpuzamahanga yiga ku iterambere ry’abagore izwi nka “Women Deliver” iteraniye i Kigali, byateguwe n’Ishami ry’Umuryango w’Abibumbye ryita ku mibereho myiza y’abaturage ku Isi (UNFPA).

Iyo nama yitabiriwe n’abayobozi b’abagore basaga 6000 baturutse mu bice bitandukanye by’Isi uhereye ku Bakuru b’ibihugu na Guverinoma, abayobozi b’Imiryango Mpuzamahanga abayoboye ibigo by’Abikorera n’abandi bahagarariye inzego zitandukanye.

Madamu Jeannette Kagame yavuze ko iyo abagore bambuwe uburenganzira bwo guhitamo, usanga rimwe na rimwe bafatwa nk’abana ndetse bakagirwa ibikoresho.

Yagize ati : “Icyakora, nk’uko twaremwe kimwe tuvuka, abagore bafite ubushobozi n’uburenganzira bungana n’ubw’abagabo, bwo gufata umwanzuro ku mibereho yabo bwite no kugira amahitamo meza arebana n’imibereho myiza y’imiryango yabo.”

Yakomeje agaragaza ko amahitamo y’abagore agira umumaro kimwe n’ay’abagabo mu kugeza umuryango mugari ku ntego z’iterambere, ariko hakaba hakiri imyumvire ikomeza kwimakazwa kandi itsikamira ubwo bushobozi bw’abagore.

Yagaragaje ko kurwanya iyo myumvire n’ibikorwa bisigaza inyuma abagore ari urugamba UNFPA yahisemo kurwana iharanira ko bagira uburenganzira bungana n’ubw’abagabo ku buzima, ku mibiri yabo, ku mibereho myiza no gusigasira uburenganzira bwabo ku mutekano w’imibereho yabo barindwa ububabare butari ngombwa bushobora gukumirwa.

Yavuze kandi ko UNFPA iharanira gukuraho imfu z’ababyeyi babyara, ihohoterwa rishingiye ku gitsina ndetse n’ibindi bikorwa byangiza ubuzima n’imibereho myiza y’abagore, aboneraho guhishura ko ibikorwa byayo bijyanye n’intumbero y’u Rwanda yo kubaka abaturage bashoboye, bubashywe kandi barinzwe hatitawe ku bo bari bo.

Yavuze kandi ko gukorana na UNFPA bikomeje gutanga umusaruro, yongeraho ko kugira ngo ababyeyi bagire amagara mazima bisaba kuba hari inzego z’ubuzima zikomeye kandi zubatswe uko bikwiye.

Umuyobozi Nshingwabikorwa wa UNFPA, Natalia Kanem, yasobanuye ko ubwisanzure ku mubiri w’umuntu bujyana n’ubushobozi bwo gufata ibyemezo ndetse n’ubwo kuvuga uti: “umubiri ni uwanjye.”

Yavuze ko UNFPA ikomeje gukorana n’abakobwa bakiri bato by’umwihariko, aboneraho gusaba ibigo by’ikoranabuhanga gukura amashusho ashotora n’atesha agaciro abagore ku mbuga zayo, inzego zibishinzwe na zo azisaba gutangira guhana abakoresha ayo mashusho.

Yagaragaje ko ubushakashatsi bwa UNFPA bwerekana ko 44% by’abagore batabasha gufata icyemezo ku buzima bwabo bw’imyororokere, ku kuboneza urubyaro cyangwa ku kuba bakora cyangwa ntibakore imibonano mpuzabitsina.

Ubwo bushakashatsi kandi bwerekana ko hafi kimwe cya kabiri cy’inda ziterwa abakobwa cyangwa abagore ku Isi ziba zidateganyijwe, bityo inyinshi muri zo bikarangira zikuwemo mu buryo bushyira mu kaga ubuzima bw’umubyeyi n’umwana.

Iyo ngo ni imwe mu mpamvu z’ibanze zitera imfu z’ababyeyi UNFPA yiyemeje kurwanya, aho Kanem yemeza ko kwambura amahitamo abagore bamwe na bamwe birangira bibatwaye ubuzima.

Ati: “Dukwiye kurwanya imyumvire y’uko abagabo ari bo bayoboye mu nzego zose, kandi niteguye kubona n’abagabo badufasha kuyirwanya, dusaba kandi turinda uburenganzira ku mubiri wa buri wese. Reka twese dutahirize umugozi umwe.”

Harjit S. Sajjan, Minisitiri w’Iterambere Mpuzamahanga wa Canada, yavuze ko mu gihugu cye kugira ubwisanzure ku mubiri, amahitamo ku buzima bw’imyororokere n’imikoreshereze y’ibitsina ari bimwe mu bigize uburenganzira bwa buri wese muri serivisi z’ubuvuzi rusange.

Yasabye ko kugira ngo ibyo bigerweho ku Isi yose hakenewe ibiganiro byeruye ku buryo bwo gutera inkunga izo serivisi hamwe n’imiryango iharanira uburenganzira bw’abagore ku Isi.

  • NTAWITONDA JEAN CLAUDE
  • Nyakanga 17, 2023
  • Hashize amezi 10
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE