Abafite ubumuga barishimira aho bavuye mu myaka 30

  • KAYITARE JEAN PAUL
  • Werurwe 27, 2024
  • Hashize ibyumweru 4
Image

Inama y’Igihugu y’Abantu bafite ubumuga, NCPD, iratangaza ko mu myaka 30 ishize, abantu bafite ubumuga hari aho bavuye, hari n’aho bageze. Bavuga ko aho bageze babikesha imiyoborere myiza idaheza uwo ari we wese.

Byagarutsweho kuri uyu wa Gatatu tariki 27 Werurwe 2024, mu nama ya 14 y’inama y’igihugu y’abantu bafite ubumuga yabereye mu Mujyi wa Kigali.

Mu myaka 30 ishize kugira ubumuga byabaga ari ikibazo mu muryango aho byafatwaga nk’ishyano ryaguye.

Ndayisaba Emmanuel, Umunyamabanga Nshingwabikorwa wa NCPD, yagize ati: “Kugira ubumuga byari umusaraba, byari umutwaro ku muryango bagahisha ufite ubumuga kugira ngo iryo shyano ritamenyekana mu muryango.”

Avuga ko uretse Padiri Fraipont Ndagijimana wagize umutima wo gufasha abantu bafite ubumuga ariko ngo ntacyo Leta yigeze igerageza kugira icyo ikora.

Ati: “Muri rusange nta tegeko rirengera abafite ubumuga ryari rihari”.

Dr. Mukarwego Betty, Chairperson w’Ihuriro ry’Imiryango Nyarwanda y’Abantu bafite Ubumuga, NUDOR, ahamya ko abafite ubumuga uyu munsi hari aho bavuye hari n’aho bageze.

Avukira mu Rwanda nta mahirwe yo kwiga abantu bafite ubumuga bari bafite ariko agiye kwiga hanze asanga hari ibihugu byita ku bantu bafite ubumuga.

Mu buhamya bwe avuga ko mu rwego rw’uburezi hari byinshi byahindutse harimo kuba abafite ubumuga barashoboye kwiga kandi bakagira ku rwego rwa dogitora.

Dr. Nicodemu Hakizimana avuga ko mu myaka 30 ishize ikintu gikomeye cyo kwishimira, ari uko Politiki yahindutse.

Agira ati: “Kwiga kwanjye amashuri abanza n’ayisumbuye byarangoye ariko ngeze muri Kaminuza nibwo byoroshye yaba ibizamini n’ibindi, kwiga biroroha.”

Ibi ngo byamuteye umwete wo kwiga agera ku rwego rwa dogitora bityo bimuha umukoro wo gutangiza Umuryango ukorera ubuvugizi abantu bafite ubumuga bw’uruhu, OIPPA.

Ahamya ko kuba Leta yarashyizeho amahirwe kuri bose, byatumye agira umusanzu we atanga.

Byari bigoye kubona abantu bafite ubumuga bashoboye kwihangira imirimo ariko igihe iyo Politiki yashyirwagaho ibintu ngo byarahindutse.

Bob ufite ubumuga bwo kutumva no kuvuga yagaragaje ko abatumva batanavuga basa n’abari barapfukiranywe.

Ashima aho Politiki yo guteza imbere abantu bafite ubumuga igeze, agasaba Leta ko hashyirwa isomo ry’ururimi rw’amarenga mu mashuri bityo rugafatwa nk’izindi ndimi.

NCPD ivuga ko mu myaka 30 ishize habonetse abantu bafite ubumuga bize Kaminuza kandi ko hari abatinyutse bakiyamamaza bityo bakajya mu nama njyanama z’Uturere.

Ingengo y’imari yakoreshejwe na NCPD mu mwaka wa 2023 – 2024, ni miliyoni 895 z’amafaranga y’u Rwanda.

Hamaze gukoreshwa miliyoni 726 z’amafaranga y’u Rwanda, bivuze ko ngo bageze ku gipimo cya 81% cy’ingengo y’imari imaze gukoreshwa.

Ingengo y’imari ya 2024 – 2025 izakoreshwa muri gahunda zo guteza imbere abantu bafite ubumuga, NCPD itangaza ko izaba ingana na miliyoni 892,111,151 FRW.

Amafoto: Cécile Uwamaliya

  • KAYITARE JEAN PAUL
  • Werurwe 27, 2024
  • Hashize ibyumweru 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE