Nyamasheke: Ntihinyurwa witeguraga ikizamini cya Leta yaguye mu kibuga ahita apfa

Umuhungu w’imyaka 12 wigaga mu wa 6 w’amashuri abanza muri GS Makoko mu Murenge wa Kagano, Akarere ka Nyamasheke witwaga Ntihinyurwa Pierre, ubwo bari mu isomo rya siporo yikubise hasi mu kibuga ahita yitaba Imana.

Amakuru Imvaho Nshya yahawe n’umuyobozi wa GS Makoko Ntagwabira Silas, ni uko hari saa cyenda n’iminota 50 z’igicamunsi, ubwo umwarimu w’isomo rya siporo yajyanaga abanyeshuri muri iryo somo, bagiye ku kibuga cy’umupira w’amaguru basanzwe bakiniraho kiri hafi y’ishuri, uwo mwana Ntihinyurwa akikubita hasi agapfa.

Avuga ko bageze mu kibuga abakobwa mwarimu abaha imikino yabo bakina, abahungu bakina umupira w’amaguru. Mbere yo gukina yabajije niba nta waba arwaye, abavuze ko barwaye bajya ku ruhande ntibakina.

Ati: “Uwo nyakwigendera Ntihinyurwa igihe yari ari mu kibuga, umupira uri ku rundi ruhande, agerageza guhamagara ngo bamuhereze, mwarimu abona yikubise hasi, ari wenyine, ajya muri koma.”

Yakomeje ati: “Bahise bampamagara turebye tubona ameze nk’uwapfuye ariko umutima ugitera, mpamagara nyina kuko ari we babana, banatuye hafi y’ishuri na mukuru we wiga mu wa 3 w’ayisumbuye baraza tumujyana kwa muganga mu bitaro bya Kibogora.”

Avuga ko bamugejejeyo muganga akababwira ko yapfuye, ubwonko n’umutima byari byahagaze.

Avuga ko ari ababyeyi be ari n’ishuri nta ndwara yindi bazi nyakwigendera yari afite.

Ati ”Twabajije umubyeyi we na mukuru we niba hari indwara baba bazi yari afite, batubwira ko ntayo bazi, tubifata nk’impanuka yabaye ibindi bizagaragazwa n’isuzuma rya Muganga. Nyakwigendera yari ari mu mwaka wa 6 yiteguraga ikizamini cya Leta.”

Yihanganishije umuryango wabuze uwawo avuga ko bakomeza kuwufata mu mugongo no kuwufasha mu muhango wose ujyanye n’ishyingura.

Umuyobozi w’Akarere ka Nyamasheke Mupenzi Narcisse yemereye Imvaho Nshya aya makuru.

Ati: “Ni byo. Amakuru dufite ni ayo twahawe n’ubuyobozi bw’ishuri, ko umwana yari mu isomo rya siporo n’abandi bana mu kibuga, yikubita hasi bimuviramo urupfu.”

Kuri uyu wa Gatandatu tariki ya 20 Mata ni ho biteganyijwe ko umurambo wa nyakwigendera ushyingurwa.