Paraguay: Perezida Santiago Peña yafungiwe iwe mu rugo asimbuzwa Visi Perezida Pedro Alliana

Perezida Santiago Peña, wayoboraga Paraguay kuva mu 2023, yegujwe ku buyobozi ku wa Gatanu tariki ya 6 Ugushyingo 2026, afungirwa iwe mu rugo, ubwo urubanza rwe muri Sena rwasozwaga rujyanye no guteza ibihombo amabanki bikagira ingaruka ku bwizigame bw’ababitsaga hafi miliyoni 3. Yari yatanze ubwegure bwe mbere ho umunsi umwe.

Umushinjacyaha yategetse ko afungirwa mu rugo. Pedro Alliana, wari umaze igihe ari Visi Perezida, yarahiriye kuba Perezida mushya wa Paraguay.

Perezida wa Sena Basilio Nuñez yagize ati: “Sena yahamije Santiago Peña icyaha cy’imyitwarire mibi mu gusohoza inshingano ze aho 44 muri 45 bari bahari batoye. Kubera iyo mpamvu, yakuwe ku mwanya we wa perezida.”

Visi Perezida Pedro Alliana, w’imyaka 52, wo mu ishyaka rya Colorado yarahiriye kuba perezida.

Manda ya Santiago Peña, inshuti ya hafi y’ubutegetsi bwa Amerika, yagombaga kurangira mu mpera za 2028. Pedro Alliana, na we yakurikiranyweho uruhare mu kibazo cy’amabanki, ariko mu rubanza, Inteko Ishinga Amategeko ntiyigeze yemeza ko yakwirukanwa.

Uhagarariye ibiro by’umushinjacyaha Silvia Margarita Gonzalez Vester yatangaje ko Santiago Peña yafungishijwe ijisho nyuma gato yo kwirukanwa kwe. Ati: “Uwahoze ari Perezida azakomeza gufungirwa mu rugo mu ijoro ryose.”

Yongeyeho ko Perezida wakuweho ahatwa ibibazo kuri uyu wa Gatandatu saa tanu ku isaha yo muri ako gace mu biro by’umushinjacyaha ku byaha bivugwa byo gucuruza no kunyereza umutungo wa Leta.

Perezida mushya, Pedro Alliana, nyuma yo kurahira, mu ijambo rye rya mbere rigufi yagejeje kuri Sena, yagize ati: “Abaturage bacu banyuze mu bihe bigoye cyane kubera ibibazo mu bijyanye n’imari, gusa bazahabwa amafaranga yabo mu buryo bwuzuye.Ntituzabasiga bonyine.”

Kwirukanwa kwa Santiago Peña ku butegetsi byakiranywe ibyishimo n’amajwi y’abantu amagana bari bateraniye mu busitani bw’Inteko Ishinga Amategeko, umunsi wose bategereje icyemezo cy’urubanza, bafite ibyapa byanditseho ngo Peña afungwe.

Umukozi w’imyaka 32, Jessica Aquino yabwiye Ibiro Ntaramakuru by’Abafaransa (AFP) ati: “Amaherezo Santiago Peña yaragiye hatanzwe ubutabera, burarangiye, noneho turashaka ko adusubiza amafaranga yacu, hanyuma we akajya muri gereza.”