Abayobozi ba Polisi zo mu bihugu 10 mu Rwanda ku ihame ry’uburinganire

Umuyobozi Mukuru Wungirije wa Polisi y’u Rwanda ushinzwe Ubutegetsi n’Abakozi, DIGP Jeanne Chantal Ujeneza, yibukije abapolisi bitabiriye amahugurwa ya EAPCCO i Kigali, kuyakoresha neza baharanira ko abaturage bashima serivisi bagenerwa n’inzego z’umutekano, mu gihe cy’iminsi itanu, baziga ku birebana no guteza imbere imikorere y’amategeko ashingiye ku ihame ry’uburinganire.

DIGP Chantal Ujeneza yabitangarije i  Kigali, ku ya 20 Ukwakira ubwo yatangizaga amahugurwa yagenewe abazahugura abandi, akaba agamije guteza imbere imikorere y’amategeko, yitabiriwe n’abapolisi n’abandi bakozi b’inzego zishinzwe kubahiriza amategeko baturutse mu bihugu 10 bigize Umuryango uhuza abayobozi bakuru ba Polisi bo mu Karere ka Afurika y’Iburasirazuba (East African Police Chiefs Organisation)

Ibihugu by’ibinyamuryango bya EAPCO byitabiriye iyo nama ni u Burundi, Comoros, Djibouti, Ethiopia, Kenya, Somalia, Sudani y’Epfo, Sudani, Uganda n’u Rwanda rwakiriye amahugurwa.

Polisi y’Igihugu yatangaje ko ari amahugurwa agamije kungura  abayobozi ba Polisi no gusuzuma ikoreshwa ry’igitabo cy’amabwiriza agenga imikorere y’inzego zishinzwe kubahiriza amategeko ashingiye ku ihame ry’uburinganire n’igitabo cyifashishwa n’abahugura abandi.

Ni ibitabo byateguwe mu mushinga wo gushyigikira buri ntambwe yatewe mu buringanire, ikaba ishyirwa mu bikorwa ku bufatanye n’Ibiro by’Umuryango w’Abibumbye bishinzwe kurwanya ibiyobyabwenge n’ibyaha (UNODC)  hamwe n’Ishami ry’Umuryango w’Abibumbye ryita ku bagore (UN Women) ku nkunga n’ubufatanye bya Guverinoma y’u Budage.

Mu butumwa yahaye abo bayobozi mu bihugu bigize EAPCO, DIGP Ujeneza yasabye abitabiriye ayo mahugurwa ko ubumenyi n’ubushobozi bazatahana bazabyifashisha mu nzego bakorera, bakabisangiza bagenzi babo kandi bagaharanira ko ibyo bitabo bishyirwa muri gahunda z’amahugurwa y’inzego za Polisi zo mu bihugu bakomokamo.

Ati   ati: “TOT ari yo mahugurwa y’abazahugura abandi azafasha guhindura ubumenyi bwanyu mufite mubukoreshe mu birebana no kuzamura ubushobozi bw’inzego mushinzwe binyuze mu kubaha ubumenyi, ubushobozi n’uburyo bwo guhugura bagenzi banyu mu bihugu byanyu ku buringanire, gutanga serivisi zishingiye ku buringanire no kurengera uburenganzira n’agaciro bya kiremwa muntu mu bihugu byacu.”

Yakomeje asobanura ko umusaruro w’icyo bungutse uzagaragarira ku buryo abaturage banyurwa na serivisi bahabwa n’ubushobozi bw’abapolisi bwo kumenya, gukumira, gukurikirana no gutanga ubufasha bukwiye mu bibazo by’ihohoterwa rishingiye ku gitsina n’ibindi bibazo bijyanye n’uburinganire.

Umuyobozi Mukuru w’Ubunyamabanga bwa EAPCCO, akaba n’Umuyobozi w’Ibiro bya Interpol mu Karere k’Afurika y’Ibirasirazuba, Apollo S. Africa, asanga ayo mahugurwa ari ingenzi kandi aje akenewe mu rwego rwo kugira ngo hasuzumwe ibyo bitabo mbere y’uko inzego zibyifashisha mu buryo bwagutse mu bihugu bya EAPCO.

Ati: “Twasanze igitabo cy’amabwiriza gusa kidahagije, kuko byari ngombwa ko gisobanurirwa n’abandi bapolisi batagize uruhare mu kucyandika.”

Akomeza asobanura ko ari yo mpamvu hateguwe n’igitabo cy’imfashanyigisho kizifashishwa n’abapolisi bazahugura bagenzi babo, aboneraho gusaba abitabiriye aya mahugurwa gutanga ibitekerezo byabo ku byerekeranye n’uburyo ibyo bitabo bikoreshwa hashingiwe ku miterere ndetse n’umwihariko wa buri gihugu.