Enzo Maresca yirukanywe muri Chelsea 

Uwari umutoza wa Chelsea, Enzo Maresca, yamaze kwirukanwa muri izi nshingano kubera umusaruro mubi yagize mu mikino itatu iheruka muri Shampiyona y’u Bwongereza.

Kuri uyu wa Kane, tariki ya 1 Mutarama 2026, ni bwo Ubuyobozi bwa Chelsea  bwakoze inama igaruka ku hazaza h’uyu mutoza byarangiye yirukanywe.

Mu itangazo ry’ikipe yagize iti: “Enzo Maresca yamaze kuva mu nshingano nk’umutoza wa Chelsea. Dushimiye Enzo ku kazi gakomeye yakoreye ikipe mu gihe ayimazemo, tumwifuriza ishya n’ihirwe ku hazaza he.”

Enzo Maresca yari amaze umwaka n’igice muri Chelsea ndetse yayifashije kwegukana UEFA Conference League n’Igikombe cy’Isi cy’amakipe.

Maresca asize The Blues ku mwanya wa gatanu n’amanota 30, iri kwitegura Manchester City mu mukino w’Umunsi wa 20 wa Premier League uzaba ku Cyumweru, tariki ya 4 Mutarama 2026.