Bonheur, Buregeya na Fiacre mu matsinda: Uko Abanyarwanda bakina hanze bitwaye

Mu bihugu bitandukanye imikino ya Shampiyona yarakomeje mu mpera z’icyumweru gishize, bamwe mu bakinnyi b’Abanyarwanda bakomeje gufasha amakipe yo kwitwara neza.

Imvaho Nshya igiye kubagezaho uko bamwe muri bo bitwaye mu mpera z’icyumweru, baba abakina muri Afurika cyangwa hanze yayo.

Impera z’icyumweru zari nziza kuri Mugisha Bonheur ukinira Al Masry yo mu Misiri nyuma yo kubona itike yo gukina amatsinda ya CAF Confederation Cup basezereye Al lttihad SC yo muri Libya bayitsinze ibitego 2-1 mu mukino wo kwishyura wabaye ku Cyumweru.

Impera z’icyumweru zari nziza kandi kuri myugariro Buregeya Prince ukinira Nairobi United yo muri Kenya yanditse amateka yo kugera bwa mbere mu matsinda ya CAF Confederation Cup yitabiriye iri rushanwa Nyafurika ku nshuro ya mbere.

Iyi kipe yabigezeho nyuma yo gutsinda Etoile Sprotive de Sahel yo muri Tunisia Penaliti 7-6 nyuma amakipe yombi anganyije ibitego 2-2 mu mikino yombi.

Al Aly Tripoli ikinamo Manzi Thierry na Djihad Bizimana yanganyije igitego 1-1 na RS Berkane yo muri Maroc mu mukino ubanza w’ijonjora rya kabiri rya CAF Champions League. Umukino wo kwishyura uteganyijwe ku wa Gatandatu tariki ya 1 Ugushyingo 2025.

Zire FK ikinamo Mutsinzi Ange muri Azerbaijan yatsinze Sumqayit FK igitego 1-0 mu mukino w’umunsi wayo wa cyenda wa Shampiyona y’icyiciro cya mbere, ifata umwanya wa gatatu n’amanota 16 irushanwa na Turan Tovuz ya mbere amanota abiri.

Uyu myugariro w’Umunyarwanda yakinnye umukino wose.

Sabah FK ikinamo Rutahizamu Joy Lance Mickels muri iyi Shampiyona   we na bagenzi be Araz Naxcivan ibitego 2-2.

Muri uyu mukino Joy Lance Mickels yatsinze cya kabiri kuri Penaliti ku munota wa 73.

Jamus SC yo muri Sudani y’Epfo ikinamo Muhire Kevin yatsinze Olympic Renk ibitego 4-1 mu mukino w’Umunsi wa gatanu wa shampiyona, ifata umwanya wa kabiri n’amanota 12.

Uyu Munyarwanda ukina hagati asatira ntiyari mu bakinnyi bakoreshejwe muri uyu mukino.

Ni mu gihe El-Merreikh Bentiu yo muri icyo gihugu ikinamo Ishimwe Saleh yatsinze Holy Family ibitego 3-0 ifata umwanya wa kane n’amanota 10.

Hakim Sahabo ukina muri Standard de Liège iri mu cyiciro cya mbere mu Bubiligi, yabanje mu kibuga asimburwa ku munota wa 46 mu mukino w’Umunsi wa 12 wa Shampiyona, ikipe yanyagiwemo na Gent ibitego 4-0.

RAAL La Louvière na yo ikina muri iyi Shampiyona yanganyije na Genk igitego 1-0 mu mukino Umunyarwanda Samuel Gueulette yakinnye Iminota yose.

Myugariro Emmanuel Imanishimwe ukinira AEL Limassol yo mu cyiciro cya mbere muri Cyrus, yakinnye umukino wose ikipe ye itsinda Enosis Neon Ypsona FC igitego 1-0 mu mukino w’umunsi wa Munani wa Shampiyona, ifata umwanya wa munani n’amanota 10.

Olympique Beja yo mu cyiciro cya mbere muri Tunisia ikinamo Ishimwe Annicet, yahuye na Espérance Sportive de Zarzis ikinamo Rutahizamu w’Amavubi, Nshuti innocent.

Aba bombi bahuriye mu mukino w’Umunsi wa 11 wa Shampiyona ya Tunisia ariko birangira Espérance Sportive de Zarzis itsinze Olympique Beja ibitego 3-0.

Harimo bibiri byatsinzwe na Nshuti Innocent winjiye mu kibuga asimbuye ku munota wa 62 mu gihe Ishimwe Annicet yasimbuwe ku munota wa 46.

Kwizera Jojea ukinira Rhode Island yabanje mu kibuga asimburwa ku munota wa 77 ikipe ye itsindwa New Mexico United ibitego 2-1 mu mukino wa Shampiyona y’icyiciro cya kabiri muri Leta Zunze Ubumwe za Amerika.

Phanuel Kavita ukinira Birmingham Legion muri icyo cyiciro, yahawe ikarita itukura ku munota wa 53 mu mukino ikipe yatsinzwemo na Charleston Battery ibitego 2-1.

Umunyezamu w’Amavubi, Ntwari Fiacre, akomeje kurwana no kubona umwanya wo gukina muri Kaizer Chiefs yo muri Afurika y’Epfo, ntiyari mu bakinnyi bakoreshejwe batsinda AS Simba yo muri Repubulika Iharanira Demokarasi ya Congo ibitego 3-0 mukino wo kwishyura w’ijonjora rya kabiri rya CAF Confederation Cup ibona itike yo gukina imikino y’amatsinda muri iri rushanwa nyafurika.

Rutahizamu Abbedy Biramahire ukinira ES Setif yo mu cyiciro cya mbere muri Algeria we na bagenzi ntibakinnye mu mpera z’icyumweru ahubwo bakomeje kwitegura umukino wa USM Alger uteganyijwe ku wa 29 Ukwakira 2025.