Bigoranye, Liverpool yatsinze Atletico Madrid muri UEFA Champions League

Imikino y’Umunsi wa mbere wa UEFA Champions League wakinwe mu Ijoro wo ku wa Gatatu tariki 17 Nzeri 2025, yasize Liverpool itsinze Atletico Madrid ibitego 3-2 naho PSG inyagira Atlanta ibitego 4-0.

Umwe mu mikino yari itegerejwe n’abakunzi ba ruhago wabereye mu Budage hagati ya Bayern Munchen na Chelsea yo mu Bwongereza. 

Ku munota wa 20, Trevoh Chalobah wa Chelsea yitsinze igitego cya mbere cyabonetse muri uyu mukino, Harry Kane ashyiramo icya kabiri cya Bayern Munich kuri penaliti yagiyemo ku munota wa 27.

Nyuma y’iminota ibiri gusa Cole Palmer wa Chelsea yishyuye igitego kimwe ari na cyo cyabonetse mbere y’uko amakipe yombi ajya mu karuhuko. 

Mu gice cya kabiri, Harry Kane yashyizemo icya gatatu cya Bayern Munich ku munota wa 63.

Bituma iyi Kipe yegukana intsinzi y’ibitego 3-1, itangira neza irushanwa rya UEFA Champions League.

Undi mukino wari ukomeye cyane ni uwa Liverpool yo mu Bwongereza na Atletico Madrid yo muri Espagne zakiniye ku kibuga cya Anfield cyo mu Mujyi wa Liverpool.

Uyu wari umukino wa mbere wa rutahizamu wa Liverpool, Alexander Isak, wari utegerejwe na benshi. 

Iyi kipe yo mu Bwongereza yatangiye neza bidatinze ku munota wa kane yafunguye amazamu ku  igitego cyatsinzwe na Andrew Robertson.

Ku munota wa gatandatu, Liverpool yabonye igitego cya kabiri cyatsinzwe na Mohamed Salah nyuma yo guhabwa umupira na Ryan Gravenberch, icyizere gitangira kuzamuka.

Gusa ntiyakijyanye mu karuhuko k’igice cya mbere kuko mbere y’uko umusifuzi akirangiza, ku munota wa gatatu w’inyongera Marcos Llorente yashyizemo igitego cya mbere cyo kwishyura cya Atletico Madrid.

Uyu mukinnyi kandi yinjije igitego cyiza cya kabiri ku munota wa 80 w’umukino, nyuma y’ishoti rikomeye yatereye inyuma y’urubuga rw’amahina, bikangura Liverpool.

Koruneri yabonywe n’iyi kipe yari iwayo ku munota wa kabiri w’inyongera kuri 90, yavuyemo igitego cya gatatu cyashyizwe mu izamu na myugariro akanaba kapiteni wa Liverpool, Virgil van Dijk. Umukino wahise urangira ibonye amanota ya mbere.

PSG ifite igikombe giheruka yatangiye neza inyagira Altanta yo mu Butaliyani ibitego 4-0 byinjijwe na Marquinhos, Kvaratskhelia, Nuno Mendes na Goncalo Ramos. 

Indi mikino Olympiacos na Pafos banganyije 0-0, Slavia Praha inganya ibitego 2-2 na Bodo Glimint ni mu gihe Inter Milan yatsinze Ajax ibitego 2-0 byinjijwe na Marcus Thuram.

Imikino iteganyijwe kuri uyu wa Kane:

Club Brugge vs AS Monaco 

København vs Bayern Leverkusen 

Frankfurt vs Galatasaray

Manchester City vs Napoli

Newcastle vs FC Barcelona 

Sporting CP vs Kairat Aimaty