Samuel Gueulette yongereye amasezerano muri RAAL La Louvière kugeza mu 2029

Umunyarwanda Samuel Gueulette ukinira RAAL La Louvière yo mu cyiciro cya mbere mu Bubiligi yongereye amasezerano y’imyaka ine azamugeza mu 2029.

Ni amakuru yatangajwe n’iyi kipe mu gitondo cyo kuri uyu wa Kane, tariki ya 4 Nzeri 2025, ibinyujije ku mbuga nkoranyambaga zayo.

Samuel Gueulette ukinira iyi kipe mu kibuga hagati, ni umwe mu bayifashije cyane mu kuzamuka mu cyiciro cya mbere, aho mu mwaka ushize w’imikino wa 2024/25, yakinnye imikino 25 muri 28 yakinwe na RAAL La Louvière muri Shampiyona, isoreza ku mwanya wa kabiri bituma ibona itike yo kuzamuka mu cyiciro cya mbere.

Muri uyu mwaka mushya w’imikino wa 2025/26, Gueulette ntiyahiriwe n’intagiriro zawo kuko yagize ikibazo cy’imvune bituma hari imikino adakina.

Uyu mukinnyi w’imyaka 25 yageze muri RAAL La Louvière mu 2021 iri mu cyiciro cya Gatatu, avuye muri KSV Roeselare yo muri iki Gihugu.

Gueulette kandi yakiniye Ikipe y’Igihugu ‘Amavubi’ mu byiciro bitandukanye nko mu batarengeje 20 na 23 ndetse no mu ikipe nkuru.

Kugeza ubu ku munsi wa Gatandatu wa Shampiyona y’icyiciro cya mbere mu Bubiligi RAAL La Louvière iri ku mwanya wa 14 n’amanota ane.