Amata y’ifu akorerwa mu Rwanda agiye kujya aboneka mu maduka mato

Ubuyobozi bw’Uruganda Inyange Industries, rukora amata y’ifu, bwatangaje ko mu minsi iri mbere azatangira kuboneka mu maduka hose ku buryo buri wese azashobora kuyagura.

Ni ibyatangajwe tariki 27 Kamena 2025, ubwo urwo ruganda rwasinyanaga amasezerano y’ubufatanye n’ikigo gitunganya ibiryo bifasha abana gukura neza (Africa Improved Food: AIF).

Umuyobozi w’uruganda rutunganya amata y’ifu, James Kagaba, avuga ko bateganya gukora ku buryo mu minsi iri mbere yazaba yageze mu maduka yose.

Ati: “Hari na gahunda y’uko tugiye gutangira gukora amata mato guhera ku magarama 400 kugeza ku bilo 5kg, ku buryo umuntu yayagura, ni igikorwa kirimo gukorwa vuba kizaba cyarangiye.”

Uruganda rumaze igihe kigera mu mezi 11 rukora, rukaba rwakoraga amata agurwa n’inganda, ibigo binini n’amahoteli.

Aborozi bo mu Karere ka Nyagatare ari naho uruganda rwubatse, bavuga ko kurugira byabagiriye akamaro kuko babonye isoko ry’umukamo wabo nkuko bisobanurwa na Gakire Elias.

Ati: “Kera aborozi muri rusange babonaga umukamo bakabura aho bawugemura bitewe no kubura amasoko ariko ubu amata turayagurisha tukabona amafaranga, tukikura mu bukene, tukiteza imbere.”

Umuyobozi w’uruganda AIF, Abraham Mathai, avuga ko amata bakora arimo intungamubiri zituma abana batandukana burundu n’ibibazo by’igwingira.

Ati: “Impamvu tuyakeneye ni uko akungahaye ku ntungamubiri zinyongera zikenewe n’abana cyane cyane abakiri bato, kugira ngo bakure nta mirire mibi bafite.”

Avuga ko ibiryo bitunganywa n’uruganda abereye umuyobozi bivanzemo ayo mata bizagenda bigezwa mu bigo no mu miryango itishoboye.

Kugeza ubu urwo uruganda rukora amata y’ifu rw’Inyange rufite abakiliya icumi b’imbere mu gihugu, batatu bo muri Tanzania, Kenya, Turkia, Ghana n’ahandi.

Nubwo bimeze bityo ariko, haracyakenewe abafatanyabikorwa benshi kuko uruganda rufite ubushobozi bwo gukora toni 40 z’amata ku munsi baracyakora toni 25 ku munsi kubera isoko rikiri rito.