Kuri uyu wa Gatatu taliki ya 11 Gicurasi 2022, Urukiko rw’Ibanze rwa Kicukiro ruherereye mu Murenge wa Kagarama mu Karere ka Kicukiro, rwasubitse urubanza ubushinjacyaha buregamo Micomyiza Jean Paul ukurikiranyweho ibyaha bya Jenoside yakorewe Abatutsi mu yakoze ari Perefegitura ya Butare.
Uyu mugabo amaze ibyumweru bibiri yoherejwe mu Rwanda n’ubutabera bwa Suwede, kugira ngo akurikiranwe ku byaha bitatu bifitanye isano na Jenoside yakorewe Abatutsi mu Karere ka Huye.
Micomyiza w’imyaka 50 y’amavuko avuka mu Karere ka Gisagara mu yari Komini Kigembe, ibyaha bitatu akurikiranyweho bikaba byarakozwe ubwo yari umunyeshuri muri Kaminuza Nkuru y’u Rwanda i Butare mu 1994.
Bivugwa ko icyo gihe yabarizwaga mu itsinda ryitwaga comite de crise ryagize uruhare muri Jenoside yakorewe i Butare, ubu ni mu Karere ka Huye.
Ibyaha bitatu ashinjwa birimo icyo kwica nk’icyaha cya Jenoside, gusambanya ku ngufu nk’icyaha cya Jenoside, ubufatanyacyaha muri Jenoside no gutera ubumuga bw’umubiri n’ubwo mu mutwe nk’icyaha cya Jenoside.
Nyuma yo gusomerwa imyirondoro akayemera, Micomyiza n’abunganizi be 3 bagaragarije urukiko ko batiteguye kuburana kuko batararangiza gutegura ubwiregure, ubushinjacyaha bwemera ko bwatinze kubagezaho dosiye imushinja.
Urukiko rw’Ibanze rwa Kicukiro rwemeye kubongerera iminsi 5 nk’uko bari babyifuje, iburanisha ku ifunga n’ifungurwa rwimurirwa ku wa Mbere taliki 16 Gicurasi 2022.
