Minisitiri w’Imari n’Igenamigambi yagaragaje uruhare rw’ubuhinzi mu bukungu bw’igihugu

  • Imvaho Nshya
  • Nyakanga 22, 2023
  • Hashize amezi 10
Image

Dr Ndagijimana Uzziel, Minisitiri w’Imari n’Igenamigambi (MINECOFIN), yagaragaje uruhare rw’ubuhinzi mu bukungu bw’igihugu.

Yabikomojeho ubwo yatangizaga ku mugaragaro Imurikabikorwa ry’ubuhinzi n’Ubworozi, kuri uyu wa Gatanu taliki 21 Nyakanga 2023 mu Karere ka Gasabo ku Mulindi.

Iri murikabikorwa ryitabiriwe na Minisitiri w’Imari n’Igenamigambi Dr Uzziel Ndagijimana ari na we Mushyitsi Mukuru, Minisitiri w’Ubuhinzi n’Ubworozi muri Zimbabwe, Dr Anxious Jongwe Masuka. 

Insanganyamatsiko y’uyu mwaka igira iti ‘Kuvugurura ubuhinzi n’ubworozi binyuze mu ikoranabuhanga, guhanga ibishya n’ishoramari’. 

Asobanura ko nka Guverinoma y’u Rwanda yahisemo iyi nsanganyamatsiko yo kuvugurura ubuhinzi binyuze mu ikoranabuhanga no guhanga udushya.

Ibiherutse gutangazwa n’Ikigo cy’Ibarurishamibare mu gihembwe cya mbere cy’uyu mwaka, bigaragaza ko ubuhinzi bwagize uruhare rungana na 27% by’umusaruro mbumbe w’igihugu.

Minisitiri Dr Ndagijimana yagize ati “Ibi biratwereka ko dukwiye kongera imbaraga mu buhinzi bwacu kuko bugira uruhare rukomeye mu kuzamura umusaruro mbumbe w’igihugu cyacu”.

Yasabye abahinzi bo mu Rwanda kwigira kuri bagenzi babo baturutse mu bindi bihugu kugira ngo na bo barusheho guteza imbere ibyo bakora.

Akomeza agira ati “Guverinoma y’u Rwanda ikomeje guteza imbere no gukora ibishoboka byose kugira ngo umusaruro w’ubuhinzi n’ubworozi ukomeza kwiyongera mu buryo bufatika bityo tubashe kwihaza mu biribwa ndetse no gusagurira amasoko”.

Yasabye abakora ubuhinzi n’ubworozi bigamije ubucuruzi kurushaho kwita ku buryo batunganyamo umusaruro kuko ngo byagaragaye ko hari umusaruro mwinshi batakaza iyo bidakozwe neza.

Ati “Guverinoma yiteguye gukorana namwe hifashijwe ikoranabuhanga rigezweho mu buhinzi, mu rwego rwo kugabanya umusaruro wononekara no kurushaho kongera ubwiza n’ubwinshi bwawo”.

Mu rwego rwo kongera umusaruro no korohereza abahinzi kubona inyongeramusaruro, Guverinoma yongereye ibihingwa izunganira ifumbire n’imbuto mu gihembwe cy’ihinga cya 2024 A.

Ibihingwa bizunganirwa bigizwe n’Ibigori, Ibirayi, iIbishyimbo, Umuceri, Ingano, Soya, Imyumbati, Urutoki, Imboga ndetse n’Imbuto.

Agira ati “Ibyo, twiteze ko bizazamura umusaruro w’ibihingwa byose”.

Dr Anxious Jongwe Masuka, Minisitiri w’Ubuhinzi n’Ubworozi muri Zimbabwe ari kumwe na Minisitiri Dr Musafiri Ildephonse

Minisitiri w’Ubuhinzi n’Ubworozi muri Zimbabwe, Dr Anxious Jongwe Masuka witabiriye imurikabikorwa ry’ubuhinzi n’ubworozi ririmo kubera ku Mulindi mu Mujyi wa Kigali, yavuze ko umwaka ushize babashije kwinjiza ndetse no kwihaza mu ngano.

Yagaragaje ko bahinze ingano zihagije igihugu cyabo gikeneye. Kuba barashoboye kubikora ngo n’ahandi hose babigeraho.

Yavuze ko abantu bakwiye gufatanya, ubuhinzi n’ubworozi bukareka kuba ubwo gutunga umuntu ku giti cye ahubwo bukaba igikorwa kinjiriza igihugu bukanateza imbere cyane ababukora.

Nsengiyumva Innoncent, umuhinzi wo mu Karere ka Nyanza mu Murenge wa Busasamana, yavuze ko yabaye umuzunguzayi imyaka 10 mu Mujyi wa Kigali akabuvamo ajya guhinga mu cyaro.

Yavuze ko yatangiye ahinga imboga za Dodo, azikuramo ibihumbi 400. Kuri ubu ahinga ibigori kuri hegitari eshatu.

Ubuhinzi akora bumaze kumugeza kuri byinshi kuko ngo yaguze ubutaka bwa Miliyoni 5.1 kandi yujuje n’inzu ya miliyoni 11.

Kuri we ahamya ko nta kindi yakora kitari ubuhinzi. Ati “Ubu nta wundi murimo wampa ngo nywukore. Abana ndabigisha ndetse hari n’ugiye kujya kwiga muri Canada”.

Intego afite, ni uko mu minsi iri imbere azigurira imodoka izajya itwara umusaruro we ku isoko.

Twibutse ko imurikabikorwa ry’Ubuhinzi n’Ubworozi ririmo kuba ku nshuro ya 16 rikaba ribera ku Mulindi. Ryitabiriwe n’abahinzi n’aborozi 400, harimo n’abavuye mu bihugu 16.

Bamwe mu baje kumurika ibikorwa by’ubuhinzi bakora, bavuga ko bakoresha ikoranabuhanga no guhanga udushya mu kongera umusaruro w’ubuhinzi

Yanditswe na KAYITARE JEAN PAUL

  • Imvaho Nshya
  • Nyakanga 22, 2023
  • Hashize amezi 10
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE