Volleyball: REG VC na APR VC zegukanye irushanwa ry’Intwari 2023

Ikipe ya REG VC mu bagabo na APR VC mu bagore ni zo zegukanye irushanwa rya Volleyball ryahariwe kuzirikana Intwari z’Igihugu  “National Heroes Volleyball Tournament 2023” ryabaye taliki 28 na 29 Mutarama 2023.

Iri rushanwa  ritegurwa n’ishyirahamwe ry’umukino wa Volleyball mu Rwanda  “FRVB” ku bufatanye n’Urwego rushinzwe Intwari z’Igihugu, Imidali n’Impeta by’Ishimwe “CHENO” ryaherukaga kuba muri 2020 aho  muri 2021 na 2022 ritabaye kubera COVID-19.

Muri uyu mwaka wa 2023 iri rushanwa ryitabiriwe n’amakipe  4 ya mbere mu cyiciro cy’abagabo  ari yo REG  VC, Gisagara VC, APR VC na ForeFront VC. Mu bagore   hitabiriye APR VC, ForeFront VC, RRA VC na Ruhango VC.

Imikino yatangiriye muri ½ aho mu  bagabo,  ikipe ya REG VC yatsinze ForeFront VC amaseti 3-2 (25-23, 15-25, 25-23, 23-25 na 18-16).

Ikipe ya Gisagara VC yatsinze ikipe ya APR VC amaseti 3-0 (25-18, 25-16 na 27-25).

Mu guhatanira umwanya wa 3, ikipe ya  ForeFront VC yitwaye neza itsinda APR VC amaseti 3-0 (25-22, 25-22 na 25-12).

Ku mukino wa nyuma, ikipe ya  REG VC  yatsinze Gisagara VC amaseti 3-2 (25-17, 25-18, 17-25, 20-25  na 15-10).

Umutoza wa REG VC, Kwizera Pierre Marshal nyuma yo kwegukana iki gikombe  yatangaje ko  ari ibyishimo kuko ari igikombe cya kabiri begukanye mu byumweru bibiri nyuma yo kwegukana igikombe cya shampiyona.

Agaruka kuri uyu mukino wa nyuma, Kwizera yagaragaje ko Gisagara VC  ari ikipe ikomeye ari yo mpamvu yabagoye cyane ariko ashimira abakinnyi be uburyo bitwaye bakabasha kwegukana intsinzi.

Ikipe ya UTB VC ni yo yari yegukanye iki gikombe ubwo cyaherukaga  muri 2020 itsinze ku mukino wa nyuma REG VC amaseti 3-1( 25-20, 25-19, 14-25  na  25-22).

Mu  bagore, APR VC ni yo  yegukanye igikombe

Mu  mikino ya ½,  ikipe ya APR VC yatsinze Ruhango VC amaseti 3-0 (25-18, 25-22 na 25-11) naho ikipe ya ForeFront VC itsinda RRA VC amaseti 3-2 (25-21, 23-25,21-25, 25-22 na 15-8).

Mu guhatanira umwanya wa 3, ikipe ya RRA VC yatsinze  Ruhango VC amaseti 3-0 (25-21,25-23 na 25-18).

Ku mukino wa nyuma, ikipe ya APR VC yatsinze ForeFront VC amaseti  3-2  (25-20, 25-27, 25-20, 20-25  na  15-12).

Umutoza mukuru wa APR VC, Siborurema Florien yatangaje ko bishimiye kwegukana igikombe gusa umukino wabagoye cyane kuko amakipe yose muri iyi minsi akomeye. Akomeza avuga ko icyamufashije ari uko abakinnyi be bari ku rwego rwiza ndetse banashoboye gukurikiza  mu kibuga amabwiriza  yabahaye nk’umutoza.

Ikipe ya UTB VC ni yo yari yegukanye iki gikombe ubwo cyaherukaga  muri 2020 itsinze ku mukino wa nyuma APR VC  amaseti 3-0 (26-24, 25-16 na  28-26).

Nyuma y’iri rushanwa, Umunyamabanga Nshingwabikorwa wa CHENO Nkusi Déo yatangaje ko bishimiye uko irushanwa rya Volleyball ryagenze.

Yakomeje avuga ko impamvu nyamukuru y’aya marushanwa ari  ugukangurira Abanyarwanda cyane cyane urubyiruko umuco w’ubutwari, indangagaciro z’ubutwari kandi ko izi ndangagaciro zifite aho zihurira n’iziranga abantu mu marushanwa zirimo gushaka gutsinda, gufatanya, kugira intego imwe  gukorana  ishyaka, ubwitange no gukina neza.

Nkusi yibukije ko indagagaciro remezo ku rwego rw’igihugu  zirimo gukunda igihugu kandi igihugu  akaba ari  abantu, ibintu , ubuyobozi n’ibirago by’igihugu.

Ikindi ni ukunga ubumwe kuko nta mukino abantu batsinda badafatanyije, batunze ubumwe, batitoje, badafite intego imwe isobanutse ngo bayikurikire bose .

Ati : «Kunga ubumwe, gufatanya,  kugira intego imwe , kugira ishyaka n’ubwitange ni ikintu cy’ingenzi ».

Yakomeje agira ati : «Kwitwara neza mu mukino no  hanze y’umukino, kurangwa n’ubupfura,  kubaha uwo mukinana, kumufata neza  bitabujije ko murushanwa kuko birangwa no kwitwara neza, turifuza ko bigaragara no mu mikino ».

Nkusi yibukije abakinnyi ko bagomba kugira ubumuntu. Ati : «Mugomba gushyira imbere umuntu mbere y’ibintu, gukunda abantu n’abo mukinana kuko atari abanzi, murahangana mu mukino ariko iyo urangiye  muba inshuti mugakomeza ubuzima hamwe».

Iyi mikino yabaye mu rwego rwo kwizihiza umunsi w’Intwari z’Igihugu ku nshuro ya 29  uzaba ku wa Gatatu taliki 01 Gashyatare 2023 ku nsanganyamatsiko igira iti : “Ubutwari mu Banyarwanda, agaciro kacu”.