Ushinzwe Imiyoborere myiza mu Ntara y’Amajyepfo yaburanye ku gutanga ruswa ya 10,000 Frw

  • AKIMANA JEAN DE DIEU
  • Gashyantare 6, 2024
  • Hashize ibyumweru 4
Image

Kuri uyu wa Kabiri tariki 6 Gashyantare, Ubushinjacyaha bwasabiye gufungwa iminsi 30 Kabera Vedaste, Umuyobozi ushinzwe imiyoborere myiza mu Ntara y’Amajyepfo, ushinjwa guha indonke Umugenzacyaha wamubazaga ku byaha byo guhoza ku nkeke umugore we.

Mu iburanishwa ku ifungwa n’ifungurwa by’agateganyo ryabereye mu Rukiko rw’Ibanze rwa Nyamabuye, ubushinjacyaha bwahishuye ko Kabera yatawe muri yombi nyuma yo koherereza umugenzacyaha  amafaranga y’u Rwanda 10,000.

Kabera Vedaste we aburana avuga ko iki cyaha atacyemera, ko ajya kohereza ayo mafaranga kuri uyu Mugezacyaha yari amugiriye impuhwe z’umwanya muremure bari bicaranye.

Yavuze ko uwo Mugenzacyaha yamuhamagaje akamwitaba, agasanga yatangiye akazi mu gitondo, atangira kumubaza ahagana saa tatu n’iminota 40 (9:40) asoza kumubaza saa saba n’iminota 20 (13:20).

Akomeza avuga ko yabikoraga agira ngo uwo Mugenzacyaha abe yaguramo amazi mu masaha y’ikiruhuko kuko yari yakoze mu gitondo ubutaruhuka.

Nubwo mu nshingano z’uyu Muyobozi harimo no kurwanya ruswa, abona ibyo akurikiranyweho bitagize icyaha kandi azi neza uburyo bwinshi n’amayeri ruswa inyuzwamo ikaba ishobora gushyira mu kaga n’uyitanga.

Perezida w’Iburanisha yamubajije impamvu yatanze ayo mafaranga ubusanzwe ari umuntu usobanutse, uzi neza icyaha cya ruswa icyo ari cyo, nk’Umuyobozi usanzwe afite inshingano zo kuyobora urwego rw’imiyoborere runafite kurwanya ruswa mu nshingano.

Kabera we yakomeje gutsimbarara ku kuba yarabikoze agamije kugirira neza uwo Mugenzacyaha. Ubushinjacyaha bwamusabiye gufungwa by’agateganyo kubera ko icyaha cyo gutanga indonke ari icy’ubugome kandi gihanishwa igahano gihera ku myaka 5 kuzamura.

Ubushinjacyaha bunongeraho ko akwiye gukomeza gufungwa mu gihe bugiye gukomeza gukora iperereza, kugira ngo atazacika ubutabera cyangwa akabangamira iperereza.

Kabera Vedaste we avuga ko ifungwa rye ry’agateganyo ridakwiy, agasaba ko mu bushoshozi bw’urukiko rukwiye kubigenzura kuko aho atuye hazwi n’aho akora hazwi, bityo ko atagiye kwica iperereza cyangwa ngo atoroke ubutabera.

Me Joseph Mico Twagirayezu uburanira Kabera, avuga ku mpamvu zirindwi ubushinjacyaha butanga zatuma umukiriya akomeza gufungwa, harimo impamvu yuko yatanze indonke kandi batarigeze babiganiraho ngo babisezeraneho.

Akomeza avuga ko ntacyo bari basezeranyeho mbere yo kuvugana ku byo yabazwagaho. Yongeraho ko gutanga impano cyangwa ishimwe byemewe, gusa uwabona Kabera n’umugenzacyaha barimo basangira byaterwa n’amarangamutima yababonanye.

Yemeje ko Ubushinjacyaha bukwiye kwerekana impamvu butigeze buregera guhita umukiriya we aburanishwa hatabayeho iminsi 30, ariko ubushinjacyaha bwo bukavuga ko bukiri mu iperereza nk’uko bigenwa n’amategeko.

Yagize ati: “Mumuhaye amahirwe ashingiye ku mategeko n’ubutabera akarekurwa, ahubwo agasubira mu kazi ke kuko ibyo yahabwa kubahiriza yabikora, kandi no mu gihe cyose yakoze ku rwego rw’Intara nta kindi cyaha yigeze akora cyangwa agaragaramo.”

Ubushinjacyaha buvuga ko ibihumbi 10 by’amafaranga y’u Rwanda yoherereje umugenzacyaha yamaze gufatirwa, hakuweho amafaranga ya serivisi 275 Frw hakaba harrafatiriwe ibihumbi 9,725 Frw.

Urukiko rwemeje ko uru rubanza ruzasomwa tariki ya 09 Gashyantare 2024 saa 12:00′ z’amanywa.

Ku wa 21 Mutarama 2024 ni bwo Kabera yatawe muri yombi nyuma yo gushaka guha ruswa umugenzacyaha wamubarizaga kuri Sitasiyo ya RIB ya Nyamabuye Iherereye mu Kagari ka Gitarama, Umurenge wa Nyamabuye, Akarere ka Muhanga.

  • AKIMANA JEAN DE DIEU
  • Gashyantare 6, 2024
  • Hashize ibyumweru 4
TANGA IGITEKEREZO
lg says:
Gashyantare 6, 2024 at 7:53 pm

Uretse no gutanga ruswa halimo nagasuzuguro umuntu utinyuka gutanga ruswa yi 10 000 !! Ikindi akayatanga aruko yahamagawe ngo abazwe! gutinda kumugenza cyaha nubushake bwe ntategeko rimuhatira gukora amasaha yikiruhuko ahubwo yaramwubashye ngo amubaze yitonze ibaze ibihumbi 10 umuntu wumugabo

Andika igitekerezo

AMATEGEKO AGENGA IYANDIKA RY'IGITEKEREZO CYAWE