USA: Bashimye ubuyobozi bwiza Imana yihereye u Rwanda

  • NTAWITONDA JEAN CLAUDE
  • Mutarama 29, 2024
  • Hashize amezi 4
Image

“Impinduka zabaye mu Rwanda nyuma ya Jenoside yakorewe Abatutsi  mu 1994 zishingiye ku buyobozi bwiza. Ntabwo ari ukubera dufite igihugu kinini cyangwa gikize ahubwo ni urumuri, roho nziza mu gihugu cyacu, Umuyobozi wacu udasanzwe…”

Ubwo butumwa bwatanzwe n’Ambasaderi w’u Rwanda muri Leta Zunze Ubumwe z’Amerika (USA) Mukantabana Mathilde, mu masengesho yahuje Umuryango Nyarwanda n’inshuti z’u Rwanda yabereye i Washington muri USA, ku Cyumweru tariki ya 28 Mutarama 2024.

Ayo masengesho yari agamije gusengera abayobozi b’u Rwanda, kwishimira ibyo u Rwanda rwagezeho mu myaka 30 ishize uhereye ku bumwe n’ubwiyunge, amahoro, iterambere no kwisubiza agaciro Abanyarwanda bambuwe muri Jenoside yakorewe Abatutsi mu 1994.

Uretse Ambasaderi, Abanyarwanda bose bafashe ijambo bashimiye by’umwihariko ubuyobozi bwiza bwaranze u Rwanda mu myaka 30 ishize, bwatumye igihugu gihera ku busa kikaba intangarugero mu ruhando mpuzamahanga mu nzego zitandukanye.

Mu bandi batanze ubutumwa harimo Moses Ndahiro, Umuyobozi w’Ihuriro mu Bayobozi Bakuru Basengera Igihugu (Rwanda Leaders Fellowship), Dr. Anthony Turkson wo mu Itorero World Missions Ministries na Serge Gasore washinze Umuryango Gasore Faoundation.

Bose bagarutse ku buhamya bw’ubuzima bwabo ndetse bashimangira ko mu myaka 30 ishize u Rwanda rwaranze n’amahoro n’umutekano, kybera ubuyobozi bureba kure Imana yahaye Abanyarwanda mu myaka 30 ishize.

Serge Gasore, wari ufite imyaka umunani gusa mu gihe cya Jenoside yakorewe Abatutsi mu 1994, yagarutse ku rugendo rwe mu gihe cya Jenoside ndetse na nyuma yayo, ashimangira ko ubu yiyemeje gushyigikira ibikorwa byimakaza amahoro ubuzima bwe bwose.

Yagize ati: “Ibyambayeho igihe nari nkiri agahungu gatoya sinifuza ko byaba ku bana banjye.

Yashimangiye ko atazatezuka ku musanzu we mu kongera kubaka no kugarura amahoro  mu gace avukamo i Ntarama mu Karere ka Bugesera, harimo kubaka amashuri ndetse n’ibigo by’ubuvuzi.

Gasore Serge yakomeje agira ati: “U Rwanda rufite Imana! Ndashimira abayobozi muri Ambasade y’u Rwanda muri Leta Zunze Ubumwe z’Amerika ndetse n’abateguye aya masengesho ngarukamwaka ku bw’imitima yabo yubaha Imana n’urugwiro batwakiranye. Twumvise Mwuka Wera agenda mu bantu bayo.”

Kanyabutembo Antoinette watangije iyo gahunda ngarukamwaka y’amasengesho muri USA, yashimiye abitabiriye bose ku bw’inkunga n’ubufasha bwose batanga ngo ibyo bikorwa bigende neza buri mwaka.

Ambasaderi w’u Rwanda muri Leta Zunze Ubumwe z’Amerika Mathilde Mukantabana

Na we yashimangiye ko u Rwanda rwagaragayemo impinduka mu iterambere mu myaka ishize kubera ubuyobozi bwiza buyobowe n’Imana.

Dr. Rev. Anthony Turkson, yashimye ibyo u Rwanda rwagezeho mu myaka 30 ishize, agaragaza uburyo u Rwanda rumaze kuba intangarugero mu nzego zitandukanye ku Isi yose.

Yagize ati: “Jenoside yakorewe Abatutsi yashoboraga gukomeza [iyo hataboneka abayihagarika]. Ibi ntidukwiye kubifata nk’ibyoroshye.”

Ndahiro Moses na we yashimye ubuyobozi bw’u Rwanda ku iterambere bwagejeje ku gihugu, buyobowe n’ubuntu bw’Imana.

Ati: “Twiboneye Abanyarwanda babona uburezi bufite ireme n’ubuvuzi hatitawe ku bo bari bo. Twabonye abantu bava mu bwihebe bakagera ku cyizere, bava mu kwishingikiriza ku bandi bakagera ku kwigira, bava mu kimwaro bakagera ku kwihesha agaciro.”

Ambasade y’u Rwanda muri Leta Zunze Ubumwe z’Amerika, yaboneyeho gushishikariza Umuryango Nyarwanda n’inshuti z’u Rwanda baba muri icyo gihugu kuzitabira Rwanda Day izaba ari amahirwe yo guhura n’Abanyarwanda bagenzi babo baturutse mu bice bitandukanye ku Isi ndetse n’abayobozi bakuru muri Guverinoma.

Abasaga 7000 ni bo bamaze kumenyekana ko biyandikishije mu bazitabira ibyo biganiro bizarangwa no kwishimira ibyagezweho, ndetse no kuganira ku rugendo rw’iterambere ry’u Rwanda n’umusanzu wa buri wese kugira ngo igihugu kigere aho cyifuza.

Amasengesho y’uyu mwaka, yabaye umwanya mwiza wo  wo guhuza no gusuhuzanya, umwanya w’amasengesho no guhimbaza Imana, ndetse n’imbyino gakondo z’umuco nyarwanda.

  • NTAWITONDA JEAN CLAUDE
  • Mutarama 29, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE