Umwalimu SACCO wungutse miliyari 16.9 Frw mu mwaka ushize wa 2023

  • KAYITARE JEAN PAUL
  • Werurwe 26, 2024
  • Hashize ibyumweru 4
Image

Ubuyobozi bwa Koperative Umwalimu SACCO bwatangaje ko mu mwaka wa 2023 warangiye tariki 31 Ukuboza 2023 yungutse miliyari 16,900,797,297 Frw habariwemo imisoro, hagasigara inyungu ya miliyari 11,877,688,223 Frw.

Inyungu yazamutse ku gipimo cya 39% ugereranyije n’inyungu yari yabonetse mu mwaka wa 2022.

Muri uwo mwaka koperative yungutse miliyari 12.2 Frw hakubiyemo n’imisoro, hagasigara inyungu ya miliyari 8.5 Frw.

Byagarutsweho kuri uyu wa Kabiri tariki 26 Werurwe 2024 mu nama ya 28 isanzwe y’Inteko Rusange y’Umwalimu SACCO yateraniye i Kigali.

Yahuje ubuyobozi bw’Umwalimu SACCO n’abanyamuryango basaga 400 bahagarariye abandi mu Mirenge yose mu Rwanda.

Uwambaje Laurence, Umuyobozi Mukuru w’Umwalimu SaCCO, asobanura ko izo nyungu zagezweho bitewe na serivisi zahawe abanyamuryango b’iyi koperative mu mwaka wa 2023.

Avuga ko habayeho kugabanya amafaranga yakoreshwaga ku mirimo imwe n’imwe kuko imyinshi isigaye ikorwa n’ikoranabuhanga.

Ku bijyanye no gutanga inguzanyo, mu mwaka wa 2023 Koperative Umwalimu SACCO yahaye abanyamuryango inguzanyo zingana na miliyari 194.6 Frw, izo nguzanyo zikaba zariyongereye ku gipimo cya 34% ugereranyije n’inguzanyo zingana na miliyari 145.3 Frw zahawe abanyamuryango mu mwaka wa 2022.

Ubuyobozi buvuga ko inguzanyo zatanzwe muri rusange zishyuwe neza nk’uko byari biteganyijwe.

Igipimo cy’inguzanyo zitabashije kwishyurwa neza ntikirenga 1.1%. Izitarishyurwa Koperative yizeye ko zizagaruzwa mu gihe cya vuba kuko zimwe mu mpamvu zateraga kutishyura neza zigenda zikemuka.

Ku bijyanye na serivisi z’ubwizigame, mu mwaka ushize wa 2023 ubwizigame bw’abanyamuryango ba Koperative Umwalimu SACCO bwanganaga na miliyari 86.5 Frw.

Bisobanuye ko bwazamutse ku rugero rungana na 35.1% ugereranyije n’ubwizigame bwabonetse mu mwaka wa 2022 bwanganaga na miliyari 64 Frw.

Umuyobozi w’Inama y’Ubutegetsi y’Umwalimu SACCO Gaspard Hakizimana yashimiye abanyamuryango ba koperative uburyo bitabiriye serivisi za koperative yabo mu mwaka wa 2023, cyane ko abasabye inguzanyo biyongereye cyane mu mwaka wa 2023.

Ati: “Kuva umushahara wa mwarimu wakwiyongera, abanyamuryango benshi bitabiriye serivisi z’inguzanyo zitangwa n’Umwalimu SACCO.

Serivisi z’ikoranabuhanga cyane cyane ‘Mobile Banking’ na zo zafashije abanyamuryango gukomeza kwitabira serivisi za koperative batiriwe baza ku mashami y’Umwalimu SACCO.

Ibi byatumye ubwitabire bwabo budahwema kuba bwiza, kandi na serivisi koperative ibagezaho zirushaho kuba nziza.”

Umuyobozi Mukuru wa Koperative Umwalimu SACCO Laurence Uwambaje yavuze ko icyo bashyize imbere ari ugutanga serivisi nziza.

Yagize ati: “Nk’ubuyobozi bwa Koperative Umwalimu SACCO turajwe inshinga no kurushaho guha serivisi nziza abanyamuryango bacu no kwagura serivisi zacu z’ikoranabuhanga, kugira ngo tworohereze abanyamuryango kubona serivisi z’imari, gufata inguzanyo, kugura no kwishyura ibintu bitandukanye batagombye kubanza gutonda imirongo ku mashami yacu”.

Yongeyeho ati: “Abanyamuryango b’Umwalimu SACCO basanzwe bakoresha ‘Mobile Banking & Mobile App’ mu kubitsa, kubikuza no gusaba inguzanyo y ‘ingoboka bakoresheje telefoni.

Ibigo by’amashuri kandi bikoresha ‘internet banking’ mu kwishyura serivisi bahabwa na ba rwiyemezamirimo batandukanye”.

Umwaka wa 2023 warangiye Koperative Umwalimu SACCO ifite umutungo mbumbe wa miliyari 196.5 Frw, ukaba wariyongereye ku rugero rwa 45%, ugereranyije n’umutungo mbumbe yari ifite mu mwaka wa 2022 wanganaga na miliyari 135.8 Frw.

Koperative Umwalimu SACCO ni koperative y’abarimu yo kuzigama no kuguriza, ikaba yarashinzwe mu mwaka wa 2006 ku gitekerezo cya Perezida wa Repubulika Paul Kagame, itangira kwakira ubwizigame bw’abanyamuryango muri 2007.

Yatangiye guha inguzanyo abanyamuryango bayo mu mwaka wa 2008. Ni mu gihe abanyamuryango ba Koperative bageze kuri 134,848.

  • KAYITARE JEAN PAUL
  • Werurwe 26, 2024
  • Hashize ibyumweru 4
TANGA IGITEKEREZO
Emmanuel Niragire says:
Werurwe 26, 2024 at 2:06 pm

Abarimu bafite A0 bave kuri 3.5 million bashgirwe kuri 5 million Wenda mu myaka ine.mudufashe tuve mu makode pe!

Senani Jean Paul says:
Werurwe 26, 2024 at 2:58 pm

Mubyukuri nibyo kwishimira kuba cooperative yacu yungutse ikindi kandi nanashimira abakozi ba sacco baduha service neza.ariko igitecyerezo natanga nuko avance yava ku myaka 3 ikagera kuri itanu byafasha abanyamuryango benshi mu kwiteza imbere murakoze.

Habintwari venant says:
Werurwe 27, 2024 at 11:56 am

nibyiza pe. ndumva avance yava ku myaka 3 ikaba 4 tukabasha kuba mubukode

Andika igitekerezo

AMATEGEKO AGENGA IYANDIKA RY'IGITEKEREZO CYAWE