Umuhanda ukoreshwa n’abasura Pariki y’Igihugu y’Ibirunga umaze amezi 8 warangiritse

  • NGABOYABAHIZI PROTAIS
  • Mutarama 3, 2024
  • Hashize amezi 2
Image

Bamwe mu bakoresha umuhanda Kansoro–Ninda mu Karere ka Musanze, bavuga ko babangamiwe n’iyangirika ryawo ryatewe n’ibiza byabaye muri Gicurasi 2023, bikaba byaratumye ibiciro by’ingendo byiyongera.

Uyu muhanda Kansoro-Ninda ufite ibilometero 6.3, ukaba wubakishijwe amapave; kuri ubu harangwamo ibinogo bavuga ko bimaze amezi arenga 8 biteza ibihombo abawugendamo.

Ni umuhanda uhuza ba mukerarugendo bagiye gusura Pariki y’Igihugu y’Ibirunga na Santeri ya Ninda, aho basanga akandi kayira bazamukiramo bagiye muri Pariki y’Igihugu y’Ibirunga.

Nanone kandi uwo muhanda uhuza Umujyi wa Musanze na zimwe muri hoteli zigezweho zibarurwa muri ako gace nk’uko byemezwa n’abahaturiye.  

Bavuga ko icyiza ari uko uriya muhanda wasanwa kuko ufitiye akamaro abakatuye cyane ko ukoreshwa na ba mukerarugendo bajya gusura Pariki y’Igihugu y’Ibirunga ndetse n’abajya gucumbika muri za Hoteli zigezweho ziri muri kariya gace.

Nshimiyimana Celestin wo mu Kagari ka Ninda Umurenge wa Nyange, avuga ko bakimara gukora uwo muhanda, ibihingwa byabo byari byagize agaciro kubera ko imodoka zari zatangiye kuhaza ku bwinshi.

Yagize ati: “Uyu muhanda wari utangiye kuzamura iterambere ryacu hano kuko urabona hari hamaze kuba nyabagendwa, ba mukerarugendo, abashoramari n’abandi. Hano tweza imyaka myinshi, abacuruzi rero bazaga kwikorera ibirayi bakabijyana i Kigali none abakire bavuga ko batapfa kuzana hano imodoka zabo kuko ngo zirangirika. Ubu rero na bo bahise bazamura ibiciro, bituma natwe duhitamo kugurisha n’abamamyi.”

Nshimiyimana akomeza avuga ko n’igiciro ku bagenda na moto cyari cyagabanyutse ariko kuri ubu ngo cyarongeye kirazamuka.

Yagize ati: “Ubundi kuva mu isantere ya Kinigi, twari tumaze kumenyera ko ari amafaranga 500 none kuva umuhanda watangira kwangirika umumotari aguca amafaranga 1200. Urumva ko iyangirika ry’uyu muhanda ryongeye kuzamura ibiciro, turasaba ubuyobozi ko bwakoresha uko bushoboye  bukongera gushyira amapave aho yari ari kuko andi ibiza byarayatwaye.”

Umuhanda unyurwamo n’abagiye gusura Pariki y’Igihugu y’Ibirunga wangijwe n’ibiza ubangamiye imigenderanire

Mardad Muhire ni umwe mu bashoferi bakoresha umuhanda Kansoro–Ninda, avuga ko abashoferi batinya kujya muri kiriya gice kubera ko ibinogo birimo bibangiriza imodoka.

Yagize ati: “Uriya muhanda warangiritse ku buryo nk’iyo ugiye gupakirayo ibirayi bucya ujya mu igaraje kuko amarasoro n’ibindi byuma bimwe byo mu modoka birangirika cyane. Aha rero iyo umuhinzi ashaka ko umupakirira ibirayi nawe umuca amafaranga menshi kuko uba witeguye kujya gukoresha.”

Ubuyobozi bw’Akarere ka Musanze bushimangira ko iki kibazo bukizi ariko ngo babanje gukemura ibibazo bimwe byihutirwa mu byatewe n’ibiza byo muri Gicurasi 2023.

Umuyobozi w’Akarere ka Musanze Nsengimana Jean Claude, yavuze ko icyo kibazo bakiganirijeho ubuyobozi bw’Ikigo cy’Igihugu Gishinzwe Iterambere rya Taransiporo (RTDA) kugira ngo harebwe uko uwo muhanda wasanwa.

Yagize ati: “Hari gahunda yo gusana ibyangijwe n’ibiza. Twahereye ku byihutirwa nko gusana inzu, kubonera inzu abasenyewe n’ibiza, ubu rero mu cyiciro gikurikiyeho ni ugusana umuhanda. Ibi tuzabikoranaho na RTDA ku buryo mu minsi iri mbere uriya muhanda uba watangiye gusanwa.”

Ibiza byo mu muri Gicurasi byasenye inzu n’ibindi bikorwa remezo bihitina n’abantu 135 abandi 111 barakomereka, hapfa amatungo arenga 4,255 cyane cyane mu Turere tw’Intara y’Iburengerazuba, iy’Amajyaruguru n’iy’Amajyepfo.

Hasenyutse inzu 3,000 ndetse n’imyaka yari iteye ku buso bungana na hegitari 3,100 irangirika, bikaba bivugwa ko yangije imitungo ifite agaciro ka miliyari 222 z’amafaranga y’u Rwanda.

Abashoferi bavuga ko igice cy’umuhanda cyangiritse cyangiza n’imodoka zabo
Umuhanda kansoro igice kimwe cyashizemo amapave
Umuhanda Kansoro igice kitatwawe n’ibiza cyishimirwa n’abaturage
  • NGABOYABAHIZI PROTAIS
  • Mutarama 3, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE