UEFA Champions League: Liverpool yagaritswe, Real Madrid na Chelsea zitwara neza

Liverpool yatsinzwe na Galatasaray, Real Madrid, Atletico Madrid na Bayern Munich zitsinda ibitego bitanu mu mikino y’Umunsi wa Kabiri wa UEFA Champions League wakinwe mu ijoro ryo ku wa Kabiri, tariki ya 30 Nzeri 2025.

Real Madrid ifite ibikombe 15 yari yasuye Kairat Almaty yo muri Kazakhstan. Uyu mukino warangiye yatsinze ibitego bitanu harimo bitatu byinjijwe na Kylian Mbappe na ho ibindi bitsindwa na Eduardo Camavinga na Brahim Diaz buri wese watsinze igitego kimwe.

Indi kipe yanyagiye ibitego bitanu ni Atletico Madrid yatsinze Eintracht Frankfurt ibitego 5-1. Ibitego by’iyi kipe yo muri Espagne byatsinzwe na Giacomo Raspadori, Robin Le Normand, Antoine Griezmann, Giuliano Simeone na Julian Alvarez, mu gihe Jonathan Burkardt yatsinze icy’iyi kipe yo mu Budage.

Bayern Munich yo mu Budage na yo yatsinze Pafos FC yo muri Chypre ibitego 5-1. Harry Kane yatsinze ibitego bibiri, ibindi bishyirwamo na Raphael Guerreiro, Nicolas Jackson na Michael Olise. Ni mu gihe icya Pafos cyatsinzwe na Mislav Oršić.

Liverpool yo mu Bwongereza yatsinzwe na Galatasaray yo muri Turikiya igitego 1-0. Ni igitego cyatsinzwe na Victor Osimhen ku munota wa 16 w’umukino.

Uyu Rutahizamu w’Umunya Nigeria yabaye umukinnyi wo muri iki gihugu umaze gutsinda ibitego byinshi mu mateka ya Champions League (ibitego 10).

Indi mikino yabaye yasize, Atalanta yatsinze Club Brugge 2-1, Bodo Glimt yanganyije na Tottenham ibitego 2-2, Chelsea yatsinze Benfica igitego 1-0, Inter Milan yatsinze Slavia Praha ibitego 3-0 ni mu gihe Marseille yanyagiye Ajax ibitego 4-0.

Indi mikino y’umunsi wa Kabiri irakinwa kuri uyu wa Gatatu:

Qarabag vs København

USG vs Newcastle

AC Monaco vs Manchester City

Arsenal vs Olympiacos

FC Barcelona vs PSG

Bayern Leverkusen vs PSV

Borussia Dortmund vs Athetic Club

Napoli vs Sporting CP

Villareal vs Juventus