U Rwanda rwiteguye inama ku hazaza h’ikoranabuhanga mu burezi bw’Afurika

  • NTAWITONDA JEAN CLAUDE
  • Mata 23, 2024
  • Hashize ibyumweru 4
Image

Guverinoma y’u Rwanda yiteguye kwakira inama ngarukamwaka ya 17 yiga ku ihuriro ry’uburezi no guhanga udushya, ndetse n’akamaro k’ishoramari mu burezi bwifashisha ikoranabuhanga (eLearning Africa Summit).

Iyo nama y’iminsi itatu itegerejwe hagati y’itariki ya 29 kugeza ku ya 31 Gicurasi mu Mujyi wa Kigali, ni iya mbere yo ku rwego rw’Afurika yiga ku ikoranabuhanga mu burezi butangwa kuri uyu mugabane.

Ihuriza hamwe abahagarariye inzego zifata ibyemezo, abarimu ba kaminuza n’abashakashatsi, abayobozi b’ibigo, abashoramari n’abayobozi b’ubucuruzi butandukanye ku Isi, by’umwihariko abo muri Afurika.

Biteganyijwe ko abazitabira iyo nama bazasuzumira hamwe ingingo zirimo iterambere ry’ikoranabuhanga mu burezi bwo muri Afurika, gukoresha ikoranabuhanga rikusanya imibare, integanyanyigisho zifashisha ikoranabuhanga ry’ubwenge muntu buhangano, guhanga udushya tugamije gutanga ibisubizo ku bibazo bihari birimo no guhangana n’ubushomeri, ubufatanye bw’uburezi n’inganda n’amashuri y’imyuga, guhuza abadafite ihuzanzira rya internet, guhindura ubuyobozi bw’inzego z’uburezi n’ibindi.

Minisitiri w’Uburezi Dr. Twagirayezu Gaspard, yavuze ko inzego zikomeye z’uburezi ari izishobora kubyaza umusaruro imbaraga zo gukoresha ikoranabuhanga rigezweho.

Yagize ati: “Icyorezo cya COVID-19 cyagaragaje akamaro gakomeye k’ikoranabuhanga mu kubaka inzego z’uburezi twifuza kugeraho. Abihutiye gukoresha ikoranabuhanga icyo gihe ni bo babashije gukomeza gutanga uburezi. Nejejwe no kwakira Abaminisitiri bagenzi banjye n’intumwa ziturutse ku mugabane tuganira ku buryo dushobora kubaka izo nzego zikomeye zishyigikira uburezi bw’ahazaza.”

Agaruka ku gaciro k’iyo nama, Rebecca Stromeyer washinze eLearning Africa yavuze ko ishimangira ukwoyemeza k’umugabane mu kwimakaza ikoranabuhanga rigezweho nk’umusingi w’uburezi no guteza imbere ubumenyi.

Yagize ati: “Mu kwimakaza ubufatanye mu nzego zitandukanye, tugamije kwihutisha uguhanga udushya mu burezi bwifashisha ikoranabuhanga, kongerera imbaraga urubyiruko rw’Afurika rugomba kuba nyambere muri iyi myaka iyobowe n’ikoranabuhanga rigezweho.”

Biteganyijwe ko iyo nama izarangwa n’ibyiciro bibiri bidasanzwe bizaba bigamije kugaragaza umumaro ikomeye wo guhuza ikoranabuhanga n’uburezi.

Gahunda ifungura izafasha mu kugaragaza uko ishoramari rikozwe neza mu burezi rishobora gufungura amahirwe yo guhanga udushya no kongera ubumenyi, bigatanga umusanzu mu Cyerekezo 2063 cy’Umuryango w’Afurika Yunze Ubumwe (AU) ndetse n’Intego z’Iterambere Rirambye (SDGs).

Gahunda ya kabiri izibanda cyane ku ngamba mpinduramatwara mu burezi, mu mahugurwa no guteza imbere ubumenyi, hibanwa cyane ku guhanga udushya mu ikoranabuhanga hagamijwe guha umurongo mushya imbaraga z’abakozi b’ahazaza.

Abayobozi bitezweho gutanga ibiganiro muri iyo nama harimo Minisitiri Twagirayezu Gaspard, Laila Macharia uhagarariye Aspen Institute Africa Initiative muri Kenya, Frank van Cappelle wo muri UNICEF na Michael Onyango wo mu Muryango The Forgotten Bottom Million (4BM).

Inama ngaruka waka eLearning Africa yatangijwe mu mwaka wa 2005, ikaba ari yon ama ya mbere nyunguranabitekerezo ndetse no gusangira ubumenyi n’ubunararibonye mu bumenyi, amahugurwa ndetse n’ubuhanga ku mugabane w’Afurika.

Mu myaka yose ishize, iyo nama yagize uruhare rukomeye mu mpinduramatwara mu burezi, amahugurwa, no kongerera ubushobozi abanyamwuga bafite ubuhanga bwo gukorera muri uru rwego rw’ikoranabuhanga rikomeje kunyaruka mu muvuduko.

  • NTAWITONDA JEAN CLAUDE
  • Mata 23, 2024
  • Hashize ibyumweru 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE