U Rwanda rwifatanyije n’Isi kwizihiza Umunsi Mpuzamahanga w’Abantu bafite Ubumuga

  • KAYITARE JEAN PAUL
  • Ukuboza 3, 2023
  • Hashize amezi 3
Image

Tariki 03 Ukuboza buri mwaka, u Rwanda rwifatanya n’Isi kwizihiza Umunsi mpuzamahanga w’Abantu bafite Ubumuga, bityo kuri iki Cyumweru na bwo u Rwanda rwawizihije rwishimira ibyagezweho mu kubaka sosiyete itagira n’umwe iheza inyuma.  

Ni umunsi wizihirijwe mu Karere ka Ngoma mu Ntara y’Iburasirazuba. Witabiriwe na Musabyimana Jean Claude, Minisitiri w’Ubutegetsi bw’Igihugu, Depite Musoline Eugene, inzego z’umutekano n’imiryango itari iya Leta irimo USAID, UNDP, UNICEF n’indi miryango Nyarwanda. 

Minisitiri w’Ubutegetsi bw’Igihugu Musabyimana yabwiye itangazamakuru ko uyu munsi hishimirwa intambwe imaze guterwa mu kwita ku bantu bafite ubumuga.

Agaragaza ko nubwo hakiri ibibazo ariko hari intambwe imaze guterwa cyane cyane mu kudaheza abantu bafite ubumuga ndetse no kubashakira uburyo bwo kwinjira neza muri sosiyete kugira ngo bagire uruhare mu iterambere ry’igihugu.

Agira ati: “Kuva u Rwanda rwakwibohora, mu ngamba zafashwe ni ukutagira Umunyarwanda n’umwe uhezwa mu buzima bw’igihugu harimo n’abantu bafite ubumuga.

Uyu munsi dufite uburezi budaheza bufasha ku buryo bwose bushoboka abana bose kugira ngo bagere ku ishuri. Dufite uburyo twubaka ibiro ku buryo abantu bose babigeraho”.

Yakomoje ku nkoranyamagambo y’ururimi rw’amarenga, avuga ko yakozwe mu rwego rwo gukomeza gukuraho imbogamizi mu nzego zihuza abantu bafite ubumuga mu kugira uruhare mu buzima bw’igihugu.

Mu Karere ka Ngoma amakoperative 4 agizwe n’abantu bafite ubumuga aterwa inkunga buri mwaka n’Akarere kandi bagashishikarizwa kwizigamira.

Imirenge yose irimo amatsinda y’abantu bafite ubumuga bakora ubuhinzi n’ubworozi bagaterwa inkunga na USAID binyuze mu mushinga Hinga Wunguke.

Bakangurirwa kandi kubona inyongeramusaruro bakoresheje ikoranabuhanga rya smart nkunganire.

Umuyobozi w’Akarere ka Ngoma wungirije ushinzwe iterambere ry’ubukungu Mapambano Nyiridandi Cyriaque, avuga ko ku bufatanye n’Akarere ka Ngoma abafite ubumuga batishoboye babasha kubona inyunganirangingo ndetse n’insimburangingo.

Akarere ka Ngoma gatangaza ko abatishoboye bafashwa kuvuzwa kandi bagahabwa inkunga y’ingoboka.

Mapambano yavuze ko abantu 135 bahawe ibikoresho birimo inkoni yera n’amagare.

Zimwe mu mbogamizi ziboneka muri aka Karere ngo ni uko inyubako za kera zidafasha abafite ubumuga.

Inama y’Igihugu y’Abantu bafite ubumuga (NCPD) itangaza ko bishimiye intambwe imaze guterwa mu gushyigikira abantu bafite ubumuga.

Mbabazi Olivia, Perezida w’Inama y’Igihugu y’Abantu bafite ubumuga (NCPD), avuga ko abantu bafite ubumuga bishimira ko Leta yemeje politiki y’abantu bafite ubumuga.

NCPD yishimira ko mu gihugu hose hatangiye ibikorwa byo gukusanya amakuru hagamijwe gukemura ikibazo cya burundu cyo kumenya umubare w’abantu bafite ubumuga no kubashakira ibisubizo.

Bashimira Leta kandi kuba yarabashyiriyeho uburezi budaheza.

Agira ati: “Ubuvugizi bumaze kugera ku rwego rushimishije, bigaragarira mu nyandiko zigaragaza igenamigambi ry’igihugu nka NST1 hakazirikanwa kandi abantu bafite ubumuga”.

Hongerewe umubare w’ibitaro bitanga serivisi z’abantu bafite ubumuga.

Madamu Mbabazi yashimiye Leta y’u Rwanda yongeye guha agaciro abantu bafite ubumuga anabashimira ubushobozi bakomeje kugaragaraza biteza imbere.

Yasabye Leta kongera ibigo n’ubushobozi byakira abana bafite ubumuga buremereye kuko bihenze cyane, ko ubuvuzi bw’abantu bafite ubumuga bwose bwashyirwa mu bwisungane kuko buhenze ndetse n’inzego zitandukanye zigashyira mu bikorwa umusaruro witezwe mu ibarura riri gukorwa.

Ku rundi ruhande, haracyari imbogamizi zo kuba insimburangingo n’inyunganirangingo zitakiboneka ku bigo bitanga ubuvuzi.

Ikindi ni uko serivisi zo kubaga amagufwa zitishingirwa na Mituweli kandi ikiguzi kikaba kiri hejuru.

  • KAYITARE JEAN PAUL
  • Ukuboza 3, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE