U Rwanda rwemeye gushyigikira amasezerano mpuzamahanga y’uburobyi

  • NTAWITONDA JEAN CLAUDE
  • Gashyantare 26, 2024
  • Hashize amezi 2
Image

Leta y’u Rwanda yemeye gushyigikira amasezerano Mpuzamahanga y’Uburobyi agamije kugabanya inkunga iterwa uburobyi bigatuma bukorwa mu buryo bukabije, yateguwe n’Umuryango Mpuzamahanga w’Ubucuruzi (WTO).

Minisiteri y’Ubucuruzi n’Inganda (MINICOM) yatangaje ko yiteguye gutangaza inyandiko yemera gushyigikira ayo masezerano kuri uyu wa Mbere tariki ya 26 Gashyantare, mu Nama ya 13 yo ku Rwego rw’Abaminisitiri ya WTO iteraniye i Abu Dhabi kugeza ku ya 29 Gashyantare 2024.

Minisitiri w’Ubucuruzi n’Inganda Prof. Ngabitsinze Jean Chrysostome, ni we wahagarariye u Rwanda muri iyo nama y’iminsi ine yatangiye uyu munsi.

Prof. Ngabitsinze ahagarariye u Rwanda mu bindi bihugu bitanga inyandiko zishyigikira ayo masezerano agamije gukuraho nkunganire zitangwa mu burobyi bigatuma abarobyi barenza ubushobozi bw’ibiri mu mazi.

Amasezerano Mpuzamahanga ku nkunga zigenerwa uburobyi yemejwe mu Nama ya 12 yo ku rwego rw’Abaminisitiri ya WTO yabereye i Geneva mu Busuwisi ku ya 17 Kamena 2022.

Ni intambwe ikomeye mu kwimakaza uburobyi buramba binyuze mu guhagarika inkunga zidakenewe zituma hakorwa uburobyi butaboneye buhungabanya uruhererekane rw’urusobe rw’ibinyabuzima byo mu mazi.

Gukora uburobyi ku buryo bukabije byatumye amafi agabanyuka cyane mu mazi yo ku Isi, ku buryo hari impungenge ko hatagize igikorwa amafi yazaba yarashize mu mazi bitarenze mu mwaka wa 2048.

Bivugwa ko kugeza ubu 80% by’uburobyi bubyazwa umusaruro ku rwego rwo hejuru, rukabije, amafi yarashize cyangwa ari mu nzira zo gukendera burundu.

Ku Isi yose, bivugwa ko hejuru ya 90% by’amafi ahiga nk’azwi nka shark, tuna, marlin na swordfish yamaze gukendera, mu gihe mu Nyanja no mu biyaga hasigaye hiberamo imyanda ikomoka kuri pulasitiki isumba ingano y’amafi.

Ayo masezerano yashyiriweho kurengera uburobyi, ni intambwe y’amateka itewe n’ibihugu byo ku Isi igamije kugera ku Ntego ya mbere y’Iterambere Rirambye ku buryo bwuzuye yo kurandura ubukene mu nzego zose kandi ahantu hose.

Ayo masezerano ya mbere ya WTO yibanda ku kurengera ibidukikije by’umwihariko akaba asigasira uburambe bw’inyanja, akanaba ari yo masezerano ya kabiri atangijwe n’uyu muryango kuva washingwa mu mwaka wa 1995.

Kugira ngo ayo masezerano atangire gushyirwa mu ngiro ni uko nibura bibiri bya gatatu by’ibihugu bihuriye mu Muryango byaba byamaze gutanga inyandiko ziyemeza.

Mu nama yabaye ku nshuro ya 12 mu mwaka ushize, ibihugu bihuriye muri uyu Muryango byari byiyemeje gukomeza kuganira ku bibazo bikomeye cyane bifite aho bihuriye n’urwo rwego, hagamijwe gushaka izindi ngingo zakongerwa muri ayo masezerano mu rwego rwo kuyashyigikira.


Biteganyijwe ko iyo nama igaruka no ku bindi bibazo bibangamiye ubucuruzi mpuzamahanga, harimo  n’ibishamikiye ku ngaruka z’icyorezo cya COVID-19, imihindagurikire y’ibihe, kwimakaza ubucuruzi bukorerwa ku ikoranabuhanga, ubuhinzi ndetse n’ibirebana no gukemura amakimbirane mu bucuruzi.

Nanone kandi abitabiriye bazanaganira no ku gushyiraho amasezerano arebana no koroshya ishoramari.

Binateganyijwe kandi ko ibihugu bihuriye muri uyu muryango byemeza ibihugu bibiri ari byo Comoros na Timor-Leste nk’abanyamuryango bashya, bituma umubare w’ibihugu biwuhuriyemo ugera ku 166.

  • NTAWITONDA JEAN CLAUDE
  • Gashyantare 26, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE