U Rwanda rwasubije u Bufaransa burushinja gufasha M23 

  • NTAWITONDA JEAN CLAUDE
  • Gashyantare 20, 2024
  • Hashize amezi 2
Image

Guverinoma  y’u Rwanda yagize icyo ivuga ku byatangajwe n’u Bufaransa ku bibazo by’umutekano muke uri mu Burasirazuba bwa Repubulika Iharanira Demokarasi ya Congo (RDC), aho bwashinje u Rwanda gufasha inyeshyamba za M23. 

Umuvugizi wa Guverinoma Yolande Makolo, yavuze ko “nta muntu n’umwe uzi byinshi ku mpamvu shingiro n’amateka y’intambara zo mu Burasirazuba bwa RDC kurusha u Bufaransa.”

Ni nyuma y’itangazo ryasohowe na Guverinoma y’u Bufaransa rihamagarira inyeshyamba za M23 guhagarika imirwano, ariko isaba u Rwanda kureka gufasha uyu mutwe w’Abanyekongo bashaka ubwigenge mu gihugu cyabo. 

Madamu Yolande Makolo yakomeje agira ati: “Ikindi kandi, Umuyobozi uriho ushinzwe ibikorwa by’Umuryango w’Abibumbye byo kubungabunga amahoro avuga cyane kuri aya mateka, ndetse n’ibirimo kubera mu Burasirazuba bwa RDC, bityo ntihakabayeho urujijo.”

Yongeyeho ati: “Iyaba ibibazo nyakuri bishamikiye ku nkomoko y’intambara byari bikemuwe, ikibazo ubwacyo nticyari kubaho.”

Kuri uyu wa Kabiri, ni bwo u Bufaransa bwatangaje ko butewe inkeke n’ibirimo kubera mu Burasirazuba bwa RDC.

Nubwo bwasabye u Rwanda guhagarika gufasha inyeshyamba za M23, nta gihamya bwatanze ko ibyo birego bishingiye ku kuri kandi Leta y’u Rwanda idahwema gusobanura yeruye ko ikibazo cya M23 ari icy’Abanyekongo, nta nyungu u Rwanda rufite mu kucyivangamo. 

Ku rundi ruhande, u Rwanda rutewe inkeke n’imyitwarire ya Guverinoma ya RDC ikomeje kwirengagiza amasezerano ya Luanda na Nairobi ndetse n’imyitwarire ya ntibindeba ikomeje kugaragazwa n’Umuryango Mpuzamahanga ku bikorwa by’ubushotoranyi bya RDC.

Mu minsi ishize, RDC yongereye ku buryo bugaragara ibikorwa bya gisirikare mu ntara ya Kivu y’Amajyaruguru, binyuranyije n’imyanzuro yemejwe mu nama zitandukanye zo mu karere, kandi bigaragara ko intego y’ibyo bikorwa ari ukwirukana ku butaka bwa RDC umutwe wa M23 n’abasivili b’Abanyekongo bavuga Ikinyarwanda, bagatatanira mu bihugu byo mu karere. 

Ibi bikorwa, RDC ibifatanyamo n’umutwe w’iterabwoba wa FDLR wagize uruhare muri Jenoside yakorewe Abatutsi mu Rwanda mu 1994.

Ibitero by’umutwe wa M23 byo mu minsi ishize byatewe n’umwanzuro wa Leta ya RDC wo kwirukana ku butaka bwayo ingabo z’Afurika y’i Burasirazuba mu Kuboza 2023, zari zifite inshingano zo guhagarikira ishyirwa mu bikorwa ry’amasezerano y’agahenge no gusubiza ibice bimwe byari bifitwe n’uyu mutwe.

Ni inshingano ya Guverinoma ya Repubulika Iharanira Demokarasi ya Congo kurinda no kubungabunga  ubuzima n’uburengazira bw’Abanyekongo bavuga Ikinyarwanda. 

Ukwirengagiza iyi nshingano kwa Leta ya RDC byateje Akarere kose ibibazo by’umutekano bigiye kumara imyaka 30. 

Amagana y’ibihumbi by’Abanyekongo bamaze imyaka ari impunzi mu bihugu byo mu Karere, basa n’abibagiranye. 

Imvugo zihembera urwango n’ivanguramoko bikomeje kuba iturufu y’abanyapolitiki ba Leta iyobowe na Perezida Félix Tshisekedi, kandi ibikorwa by’ivanguramoko, itoteza, ifunga, n’ubwicanyi bikomeje kuba akamenyero. 

Umutwe wa FDLR ukorana byeruye n’ingabo za RDC   (FARDC), nk’uko byakomeje kugaragazwa na raporo z’impuguke za Loni. Ibi byose bibangamiye umutekano w’ u Rwanda. 

Kubera ibyo bibazo byose kandi, u Rwanda ntirwahemye kugaragaza aho ruhagaze ku kibazo cya M23, ko kigomba gukemurwa binyuze mu nzira za politiki, bigakorwa n’Abanyekongo ubwabo. 

Ntabwo u Rwanda ruzongera kwemera ko ikibazo cya RDC cyambuka imbibi kikaza ku butaka bw’u Rwanda.

Abayobozi ba Leta n’aba gisirikare muri RDC, harimo na Perezida Félix Tshisekedi ubwe, ntibahwemye gutangaza ku mugaragaro icyifuzo cyabo cyo gutera u Rwanda bagahindura ubuyobozi bakoresheje imbaraga. 

Mu gutegura ubwirinzi, hafashwe ingamba zo guteza imbere uburinzi bw’ikirere cy’u Rwanda, no gucungira hafi ibikorwa bya gisirikare byo mu kirere ku rundi ruhande, nyuma y’aho hagaragaye ko RDC yakoresheje drone zikorerwa mu Bushinwa zo mu bwoko bwa CH-4 mu bitero byabaye mu 2023, ndetse hakanabaho ibikorwa byo kuvogera ikirere cy’u Rwanda bikozwe n’indege z’ intambara za Congo.

Hashingiwe ku mikoranire yeruye ya Leta ya RDC na FDLR, u Rwanda rwemeje ko rufite uburenganzira busesuye bwo gufata ingamba zo kurinda umutekano n’ubusigire byarwo, igihe icyo ari cyo cyose ibishaka kubihungabanya bikigaragara.

U Rwanda rurashimira, kandi rushyigikiye byimazeyo ibikorwa by’ubuhuza by’abayobozi bo mu Karere, barimo Perezida João Lourenço wa Angola. 

U Rwanda nanone kandi rwiyemeje kugira uruhare rufatika mu bikorwa bituma habaho amahoro n’umutekano mu Karere, hibandwa ku gusuzuma no gukemura ibituma habaho amakimbirane.

  • NTAWITONDA JEAN CLAUDE
  • Gashyantare 20, 2024
  • Hashize amezi 2
TANGA IGITEKEREZO
Abdoul says:
Gashyantare 21, 2024 at 1:42 pm

Nimureke guhungabanya umutekano wayandi mahanga mbe nkubu vyogera iwanyu vyogenda gute ? Ntimwobabara nkuko Congo mbabaye?

Andika igitekerezo

AMATEGEKO AGENGA IYANDIKA RY'IGITEKEREZO CYAWE