U Rwanda rwashoye miliyari 56 Frw mu kugarura abana bataye ishuri

  • NSHIMIYIMANA FAUSTIN
  • Gashyantare 27, 2024
  • Hashize amezi 2
Image

Leta y’u Rwanda yahishuye ko miliyoni 44 z’amadolari y’Amerika, ni ukuvuga miliyari zisaga 56 z’amafaranga y’u Rwanda, ari zo zashowe mu mushinga ugamije guhangana n’ikibazo cy’abana bata ishuri.

Ni mu mushinga wiswe “Zero Out Of School Children”, ugamije gufasha abana barenga 177 119 bo hirya no hino mu gihugu bavuye mu ishuri batarengeje imyaka 16 y’amavuko.

Minisiteri y’Uburezi yabikomojeho kuri uyu wa Kabiri tariki ya  27 Gashyantare 2024,  mu karere ka Kayonza, ahari hateraniye Inzego z’ubuyobozi n’abafatanyabikorwa mu gukemura ikibazo cy’abana batata ishuri.

Minisiteri y’Uburezi yavuze ko uyu mushinga watangiye tariki ya 08 Nzeri 2023 ukazarangira muri Nzeri 2028 ku bufatanye n’Igihugu cya Qatar, binyuze mu Kigenga cya Qatari cy’Iterambere.

Biteganywa ko inkunga zishorwa muri uwo mushinga zizatangwa binyuze mu kindi kigega cyitwa “Education Above All”, intego akaba ari uko hakurwaho inzitizi zose zituma abana batajya mu ishuri no gushyiraho bisubizo by’ibibazo byagaragaye bituma abana bava mu ishuri.

Umuyobozi Mukuru Ushinzwe Politiki y’Uburezi muri Minisiteri y’Uburezi, Rose Baguma, yavuze ko uyu mushinga ugamije gukemura no kuvanaho inzitizi abana bata ishuri bahura na zo, impamvu bata ishuri, n’icyakorwa kugira ngo bagaruke mu ishuri kandi bagahabwa uburezi bufite ireme.

Yagize ati: “Uyu mushinga ugamije kugarura umwana wese wavuye mu ishuri kandi yakagombye kuba aririmo. Uje kunganira izindi ngamba zose Leta y’u Rwanda n’ababyeyi bashyiramo kugira ngo abana bose babone uburezi bufite ireme kandi bige ntibate ishuri cyane cyane mu mashuri abanza. Tuzareba uterere twose uko ari 30 tubanze tubarure tumenye imibare y’abana bataye ishuri.”

Yakomeje agira ati: “Mu mibare fatizo twabonye mu myaka ibiri ishize twasanze abana 177 119 baravuye mu ishuri abandi batararigiyemo. Tugiye gusubira mu Mirenge turebe imibare ihari ubu ndetse tumenye impamvu n’icyadufasha gukuraho inzitizi abana bahura nazo kugira ngo abana aho bari hose barisubiremo.”

Umunyamabanga Nshingwabikorwa w’Intara y’Iburasirazuba, Dr Nyirahabimana Jeanne, yavuze ko muri iyi Ntara guta ishuri biri hagati ya 4 na 13%, bityo bakaba bizeye ko uyu mushinga ugiye kunganira inzego zose mu guhangana n’iki kibazo.

Yagize ati: “Uyu mushinga ni mwiza kandi biragaragara ko uhamye, ababyeyi n’inzego zose rero dukwiye kuwitaho yaba mwarimu, ababyeyi n’abandi bafatanyabikorwa dufite inshingano zo gukurikirana umwana wataye ishuri bikiba tudategereje ko azamara igihe yararivuye tukamugarura vuba kandi tugakora ibishoka byose akarigumamo. Uyu mushinga uradukebuye mu buryo bwuzuye.”

Umwizerwa Solange, Umuyobozi w’umushinga Zero Out Of School Children uzashyira mu bikorwa iyi gahunda, yavuze ko biteguye gukorana no gufatanya n’inzego zifite aho zihuriye n’iki kibazo, abafatanyabikorwa n’Inzego z’ibanze bakubakira ku byari bimaze gukorwa.

Yagize ati: “Turashaka ubufatanye n’inzego zose tukareba ibyari bisanzwe bikora tukabyubakiraho, noneho tugashimangira ko umwana wese wakagombye kuba ari mu ishuri aririrmo, kandi twiringiye tudashidikanya ko ubufatanye buzatuma intego z’uyu mushinga zigerwaho.”

Kugeza ubu Minisiteri y’Uburezi itangaza ko mu mwaka w’amashuri 2022/2023 imibare y’abana basibira iri kuri 14.5% mu mashuri yisumbuye, 24.6% mu mashuri abanza.

Abana bava mu ishuri bakaba ari 8.5% mu mashuri yisumbuye naho mu mashuri abanza akaba ari 9.8%. Izi zikaba na zo ziri mu mapvu zituma abana bo mu mashuri abanza bata ishuri.

Minisiteri y’Uburezi kandi itangaza ko miliyoni  zirenga 22 z’amadorari y’Amerika azatangwa na Leta y’u Rwanda naho izindi miliyoni zisaga 22 z’amadorari y’Amerika zigatangwa n’umushinga ukorera mu Kigo cya Qatar gishinzwe Iterambere.

  • NSHIMIYIMANA FAUSTIN
  • Gashyantare 27, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE