U Rwanda rwashoye miliyari 382 Frw mu guhangana n’imyuzure y’umugezi wa Mukungwa

  • ZIGAMA THEONESTE
  • Gashyantare 26, 2024
  • Hashize amezi 2
Image

Guverinoma y’u Rwanda yatangaje ko abaturage bangirizwa n’imyuzure ituruka mu  mugezi wa Mukungwa, bagiye kubona ubutabazi vuba aha, binyuze mu mushinga uzatwara miliyoni 300 z’amadolari y’Amerika ni ukuvuga miliyari 382 z’amafaranga y’u Rwanda.

Umugezi wa Mukungwa uherereye mu Ntara y’Amajyaruguru n’iy’Iburengerazuba, muri Gicurusi 2023 wangirije abaturage mu buryo bukomeye bituma Leta y’u Rwanda ifata ingamba zo gukumira imyuzure iwuturukaho.

Biteganyijwe ko ibikorwa byo kubakira uwo mugezi bigiye gutangira vuba.

Umugezi wa Mukungwa ni isoko y’Umugezi wa Nyabarongo na yo yisuka mu Kiyaga cya Victoria muri  Uganda, ugakomeza wisuka mu mugezi wa Nili  na wo usuka  mu nyanja  ya Mediteranee.

Biturutse ku mvura nyinshi y’Itumba iteganyijwe hagati ya Werurwe na Gicurasi 2024), Ikigo cy’u Rwanda gishinzwe Ubumenyi bw’Ikirere (Meteo Rwanda) giherutse gutangaza ko iyo mvura ishobora kuzateza ibiza mu Rwanda no mu karere ruherereyemo.

Biteganyijwe ko imvura iri hagati ya milimetero 700 na 800 izagwa mu Turere twa Musanze na Nyabihu, mu majyaruguru no mu Burengerazuba ndetse no mu bice bya  Gakenke na Burera  ndetse no mu majyaruguru y’iburasirazuba bw’Akarere ka Rubavu.

Bugingo Davis, Umuyobozi Mukuru ushinzwe Gukumira imyuzure n’Ububiko bw’Amazi mu kigo gishinzwe Umutungo Kamere w’Amazi (RWB), ati  “Uyu mushinga ugamije gukoresha ingamba zitandukanye zo kugabanya umwuzure ku mugezi wa Mukungwa.

Tuzatangirana n’ibikorwa byo gufata amazi atemba mu Majyaruguru, harimo no gukumira imyuzure kugira ngo tugabanye amazi atemba ajya mu migezi n’inzuzi.”

Gutangiza umushinga, hazakorwa ubushakashatsi bwimbitse hirya no hino ku gice cy’Imisozi y’Ibirunga no mu gace ka Vunga, kugira ngo hategurwe ibishushanyo mbonera byerekana ingamba zikenewe, aho ibikorwa bizakorerwa  n’amafaranga akenewe kugira ngo bikorwe.

Mu ngamba zo guhangana  n’aya mazi ateza imyuzure harimo kubaka ingomero z’amazi, kwagura imihanda, gusibura inzuzi, gucunga imyanda ndetse no kubakira imigezi.

Bugingo yashimangiye ko mu gihe inyigo yagaragaza ko izindi ngamba zakongerwamo mu gukumira amazi yangiriza abaturage aturuka mu mugezi wa Mukungwa, na zo zashyirwamo umushinga ukagurwa.

Umushinga wa Volcanoes Community Resilience Project (VRP) wo gukumira imyuzure, uzaterwa inkunga na Banki y’Isi ifatanyije n’izindi nzego za Leta zitandukanye.

Muri izo nzego harimo Ikigo cy’Igihugu gishinzwe kubungabunga Ibidukikije (REMA), Urwego rw’Igihugu rw’Iterambere (RDB), Ikigo cy’Igihugu gishinzwe Amashyamba (RFA), Ikigo gishinzwe Imiturire (RHA) n’abandi bose bayobowe  na Minisiteri y’Ibidukikije.

Mu gutangiza uyu mushinga kandi ni muri gahunda yo guhangana n’imihindagurikire y’ibihe, mu gukumira ingaruka zituruka ku myuzure ndetse no kubungabunga umutungo kamere no kwita ku bikorwa by’Ubukerarugendo biri mu gice cy’imisozi y’ibirunga.

Mu ishoramari rizashyirwa muri uyu mushinga uzamara imyaka 5, hakenewe miliyoni 300 z’amadolari y’Amerika azatangwa na Banki y’Isi, Banki y’Ishoramari y’Umuryango w’Ubumwe b’Ibihugu by’Iburayi, ikigo cya NDF ndetse n’icyo guhangana n’imihindagurikire y’ibihe (Climate Green Fund).

Bugingo yavuze ko abaturage baturiye umugezi wa Mukungwa bazungukira muri uyu mushinga ndetse n’ingamba zo kubungabunga amazi aturuka muri uyu mugezi, bityo biteza imbere urwego rw’ibikorwa by’Ubukerarugendo bigenzurwa na REMA.

  • ZIGAMA THEONESTE
  • Gashyantare 26, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE