U Rwanda rwakiriye abimukira n’abasaba ubuhungiro 92 bavuye muri Libya 

  • NTAWITONDA JEAN CLAUDE
  • Werurwe 27, 2024
  • Hashize ibyumweru 2
Image

Kuri uyu wa Gatatu, u Rwanda rwakiriye irindi tsinda ry’abimukira n’abasaba ubuhungiro 92 baturutse muri Libya.

Iryo tsinda ritumye abamaze kwakirwa mu Rwanda guhera mu mwaka wa 2019 baturutse muri Libya bagera mu 2,242, bakaba biganjemo abamaze kubona ibihugu by’i burayi n’Amerika bibakira.

Imibare utanga n’ishami ry’Umuryango w’Abibumbye ryita ku mpunzi igaragaza ko kugeza uyu munsi abimukira n’abasaba ubuhungiro 1,621 ari bo bamaze kubona ibihugu bibakira. 

Iryo tsinda rigiye gicumbikirwa mu nkambi y’agateganyo ya Gashora iherereye mu Karere ka Bugesera aho bategerereza na bo kubona ibihugu bibakira. 

Guverinoma y’u Rwanda, UNHCR na AU byashyizeho uburyo bw’ubutabazi bw’agateganyo (ETM) bugamije guha uburinzi, ubufasha bw’imibereho ndetse n’ibisubizo birambye ku mpunzi n’abasaba ubuhungiro bari baraheze muri Libya.

Ku wa 10 Nzeri 2019 ni bwo izo mpande uko ari eshatu zashyize umukono ku masezerano y’ubufatanye, yatumye rwakira impunzi zaturutse muri Libya, aho zageze zishakisha inzira yazambutsa izijyana muri Méditerranée zikagera i Burayi.

Aya masezerano yavugaga ko u Rwanda ruzakira impunzi 500 yasinyiwe i Addis Ababa ku cyicaro cya AU, nyuma y’uko Perezida wa Repubulika y’u Rwanda Paul Kagame agaragaje ubushake bw’uko u Rwanda rwakwakira izi mpunzi z’Abanyafurika bari barabuze icyerekezo.

Ku wa 14 Ukwakira 2021 ayo masezerano yaravuguruwe, u Rwanda rwemera gukomeza gukoresha Inkambi y’agateganyo ya Gashora iri mu Karere ka Bugesera mu kwakira impunzi, n’ubushobozi bwayo bukongerwa bukava ku kwakira abantu 500 icya rimwe bakaba 700.

Muri aya masezerano, u Rwanda rukomeje kwakira no kurinda impunzi n’abimukira ndetse n’abandi bari mu kaga bafungiye mu bigo byo muri Libya.

Muri bo ababishaka ni bo boherezwa mu Rwanda, bagakomeza gufashwa na UNHCR no gushakirwa ibisubizo birambye birimo no gufashwa kujya mu bindi bihugu, abandi bagasubizwa aho bakomoka.

  • NTAWITONDA JEAN CLAUDE
  • Werurwe 27, 2024
  • Hashize ibyumweru 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE