U Rwanda ruti: “Victoire Umuhoza ni umunyabyaha wanze kwihana”

  • NTAWITONDA JEAN CLAUDE
  • Werurwe 15, 2024
  • Hashize ibyumweru 4
Image

Guverinoma y’u Rwanda yashimiye ubutabera bwakoze akazi kabwo bukubahiriza amategeko nyuma yo gutesha agaciro ubusabe bwa Ingabire Victoire Umuhoza waregeye guhanagurwaho ubusembwa mu gihe yabaye “umunyabyaha wanze kwihana.”

Muri iki cyumweru, ni bwo Urukiko Rukuru rwasomye imyanzuro nyuma y’igihe cyari gishize rusuzuma ikirego cya Ingabire Victoire wasabaga guhanagurwaho ubusembwa kugira ngo yemererwe kwiyamamaza nk’umukandida mu matora ya Perezida wa Repubulika ateganyijwe muri Nyakanga.

Urukiko rwagaragaje ko ubusabe bw’uyu mubyeyi w’imyaka 55 nta gaciro bufite, birushimangira ko ibyo asabwa kubahiriza kuva yarekurwa nyuma yo guhabwa imbabazi na Perezida Paul Kagame mu mwaka wa 2018 bigikomeje.

Umuvugizi wa Guverinoma Yolande Makolo yashimiye ubutabera bwubahirije amategeko bugakumira imigambi ya Ingabire Victoire warekuwe yemeza ko agiye guhinduka ariko yagera hanze agahinduka undi muntu.

Nyuma yo kurekurwa mu mwaka wa 2018 ku mbabazi za Perezida, Ingabire Victoire yongeye kugaragara mu mugambi wo guhungabanya ubusugire bw’u Rwanda, aho yagaragaye mu bitangazamakuru bitandukanye yigaragaza nk’umuyobozi w’abatavuga rumwe na Leta mu gihe atitaye ku byo yasabwaga kubahiriza kugira ngo ahanagurweho ubusembwa.

Makolo yagize ati: “Ingabire Victoire si umuyobozi w’abatavuga rumwe na Leta cyangwa uharanira iyubahirizwa rya Demokarasi. Ni umunyabyaha wanze kwihana wigeze gufungirwa kugerageza guhirika ubutegetsi akoresheje intambara, ndetse akagerageza no guhembera amacakubiri ashingiye ku moko mu Rwanda. Ku bw’amahirwe ubutabera bw’u Rwanda bwongeye guhagarara ku iyubahirizwa ry’amategeko.”

Mu mwaka wa 2018 ni bwo Ingabire Victoire yahawe imbabazi za Perezida kimwe n’abandi bafungwa basaga 2000.

Abasesenguzi mu bya Politiki bashimangira ko Ingabire atari umuntu usanzwe utavuga rumwe na Leta nk’uko bamwe bashobora kubyibwira kuko afite amateka maremare yanze kumuvamo yo gukorana n’imitwe yitwaje intwaro igamije guhungabanya umutekano w’u Rwanda.

Nubwo yarekuwe agasubira hanze ariko hari amabwiriza y’ibyo byasabwaga kubahiriza, yaba atabishoboye imbabazi yahawe ni imfabusa.

Uretse n’ibyo amategeko y’u Rwanda ateganya ko abantu bakatiwe igifungo kiri hejuru y’amezi atandatu batemerewe kwiyamamaza cyangwa gukora imirimo ya Leta.

Nubwo hari amahirwe yo kumuhanaguraho ubusembwa bitewe n’imyitwarire myiza yari kuba yaragaragaje mu myaka ikabakaba itandatu amaze hanze y’uburoko, abasesenguzi mu bya Politiki bavuga ko kuba Ingabire yarafungiwe ibyaha birimo no gushinga imitwe yitwaje ari inzitizi ikomeye itamwemerera kwiyamamariza kuba Perezida w’Igihugu.

Ibindi byaha uyu mubyeyi yafungiwe harimo gupfobya no guhakana Jenoside yakorewe Abatutsi mu 1994 no gukangurira rubanda kwigomeka ku butegetsi. Nk’uko bigaragara mu gitabo cyanditswe na Alain B. Mukuralinda yise “Qui Manipule Qui? (Ni nde ubeshya Nde), hari ibihamya bifatika bishimangira uburyo Ingabire Victoire yigaragazaga nk’uharanira demokarasi n’uburenganzira bwa muntu nyamara mu ibanga atera inkunga imitwe yitwaje intwaro.

Hari ubwo yajyaga acikwa akavuga amagambo agaragaza ibimuri ku mutima nk’aho ku wa 23 Ugushyingo 2005, imbere y’Ibiro by’Umuryango w’Abibumbye, Ingabire Victoire yagize ati: “Turashaka kwigarurira ibyo twahereye kera dusaba. Ubutumwa bwacu ni uko nihatagira igikorwa ngo hashyirweho ubuyobozi buharanira ubutabera, hazongera kuvuka ibibazo bizamena amaraso arenze ayamenetse mu 1994.”

Imbere y’itangazamakuru, abayobozi batandukanye, Ingabire yavugaga ubutabera, demokarasi n’ibiganiro bya Politiki ariko yagera iwe aho yumvaga yisanzuye akagirana ibiganiro by’ibanga n’abo bahuje umugambi wo gushinga umutwe witwaje intwaro, guhungabanya umutekano no kugaba ibitero ku Rwanda.

Ingabire yoherezaga ubutumwa bwa email ndetse agakora ingendo muri Repubulika Iharanira Demokarasi ya Congo (RDC) aho yahuraga na bagenzi be bashinjwa ibyaha bimwe, ndetse ntibyarangiriraga aho kuko yanoherezaha inkunga zo kugura intwaro no kwivuza ku barwanyi n’inyeshyamba bitorezaga gutera u Rwanda.

Nyuma y’ubusabe bw’inzego z’ubutabera z’u Rwanda, bwo kumukoraho iperereza, Leta y’u Buholandi yagiye gusaka mu rugo rwe basangayo ibihamya bishimangira ibyo akekwaho.

Habonetse inyandiko yiswe “Tariki ya 24 Gashyantare”, mu rukiko Ingabire Victoire yemeje ko ari iye, ijyanye n’inama uyu mubyeyi yagiranye na bagenzi be.

Mu byigiwe muri iyo nama, harimo gusuzuma ishyirwaho ry’urwego rwa gisirikare mu kurema ingabo, kandi mu bagize izo ngabo harimo n’abarwanyi ba FDLR, abo yagiye asura akanaboherereza inkunga mu bihe bitandukanye.

Mu bikorwa by’ibanga yakoraga, Ingabire Victoire yakoranaga n’uwo yitaga nyirarume wari umurwanyi wa FDLR ufite ipeti rya Majoro ari we Vital Uwumuremyi, wiyitaga Dieudonne Muhima Muhindo.

Imbere y’ubutabera, Uwumuremyi yemereye urukiko ko Ngabire Victoire yamwohererezaga inkunga.

Ubwo yazaga mu Rwanda mu 2010, Ingabire Victoire yari yiteguye abasesenguzi mu bya Politiki bakaba basanga ari na yo mpamvu ajya gusura Urwibutso rwa Jenoside rwa Kigali, yarahavugiye amagambo ahembera ivangura n’amacakubiri ndetse akanapfobya Jenoside yakorewe Abatutsi mu 1994.

Nyuma y’ubusesenguzi bwakozwe na nyuna yo gufungwa imyaka 15, akarekurwa nyuma yo gutakambira Umukuru w’Igihugu, Ingabire yakomeje kuba wa wundi aho yakomeje kujya agerageza gushinga imitwe y’ibanga.

  • NTAWITONDA JEAN CLAUDE
  • Werurwe 15, 2024
  • Hashize ibyumweru 4
TANGA IGITEKEREZO
lg says:
Werurwe 15, 2024 at 9:40 am

Kumuhanaguraho ubusembwa!! uwahanagurwaho ubusembwa numuntu bigaragara ko yarenganye uyu kujya kubisaba yashakaga kujya gushimangira bimwe yavugaga nubu avuga ko yafunzwe arengana aho ubwenge bwe bucangira abantu nuko yitabaza nurwego rwubutabera atemera uyu uko nyina yarameze uko uyu yonkeje ingengabitekerezo ameze uretse nubusembwa umutima mubi wubugome yonse mumashereka yinerahamwe nyina azarinda ajya mugitaka akibifite nubu nuko ntacyo avuze ugiye nomunyo nyuma yo gusomerwa avuga ntiwabura mo ibyaha harya ubwo uwo ngo niwe ushaka gusimbura ba Gitera na Kayibanda ngo banyamwinshi bazamutora ibyanyamwinshi ibyo abanyarwanda barabirenenze icyo bakeneye nibikorwa nimiberehomyiza uwayobora wese ali umunyarwanda ibyo sikibazo ubu rero yataye abana numugabo ngo bazagaruke ali perezida yaguma mubuhorandi se akaba perezida nahimana we si perezida !!naho kurota kumanwa akabireka

Andika igitekerezo

AMATEGEKO AGENGA IYANDIKA RY'IGITEKEREZO CYAWE