Twafashe igeno ryacu mu biganza tubohora u Rwanda- Perezida Kagame

  • NTAWITONDA JEAN CLAUDE
  • Gashyantare 1, 2024
  • Hashize amezi 4
Image

Perezida wa Repubulika y’u Rwanda Paul Kagame, yagarutse ku butumwa bushimangira uko mu myaka isaga 30 ishize banze kuzasazira mu buhungiro, bagahitamo gufata ahazaza habo mu biganza bahitamo kubohora u Rwanda rwari ruzabiranyijwe n’igitungu gishingiye ku moko n’amacakubiri. 

Perezida Kagame yabigarutseho kuri uyu wa Kane tariki ya 1 Gashyantare, mu ijambo nyamukuru yagejeje ku bayobozi bagera ku 3,500 bitabiriye amasengesho yo gusabira Leta Zunze Ubumwe z’Amerika (USA Prayer Breakfast) yabereye i Washington DC. 

Ijambo rya Perezida Kagame muri iki gitondo ryakoze ku mitima ya benshi ku munsi u Rwanda rwanizihijeho Intwari z’u Rwanda ku nshuro ya 30, zirimo n’abasirikare bemeye kumena amaraso yabo mu rugamba rwo kubohora u Rwanda. 

Perezida Kagame yagize ati: “Uyu munsi, nyuma y’ibiturwanya byose, igihugu cyacu gifite amahoro, kiratera imbere, abantu barikorera kandi hejuru ya byose igihugu cyunze ubumwe.”

Perezida Kagame yasobanuye uburyo we n’abandi Banyarwanda batagira ingano bakuriye cyangwa bagasazira mu nkambi zo mu mahanga, batagira igihugu ndetse baranibagiranye kuri gakondo yabo. 

Iteka bahoraga bazirikana ko nta hantu na hamwe bafite bita iwabo, ati: “Twanabwirwaga ko u Rwanda rwuzuye, ko tudashobora kuzapfa dutashye.”

Yakomeje agira ati: “Mu 1990 twafashe igeno ryacu mu biganza, tujya kubohora u Rwanda igitugu gishingiye ku moko, maze twongera kurema u Rwanda rw’Abanyarwanda bose, ruzira ivangura iryo ari ryo ryose.”

Yavuze ko batari gukomeza kwihanganira gukomeza kubona hari abagundira ubutabera mu biganza byabo, kandi igihe cyari kigeze ngo karande y’ubwicanyi yazonze u Rwanda icike, maze gushaka kwihorera bigasimbuzwa gahunda y’ubumwe n’ubwiyunge. 

Ati: “Ubwiyunge burababaza, ariko ni ingenzi, kandi busaba kwiyoroshya no kwigirira icyizere mu buryo bungana. Ubwiyunge ni igikorwa cyo kwizera, kubera ko bisaba kureba kure: Kwizera ibyo utabona, kandi mu bigaragara ibyiyumviro byawe byose bikubwira ko bidashoboka.”

Perezida Kagame yashimangiye ko inshingano z’abayobozi ari uguha icyizere abo bayobora kugira ngo bahagarike kutizera kuko ari byo bifasha guhindura imyumvire idahwitse y’ibisekuru bikurikira. 

Ati: “Icyo ni igikorwa cy’ubwiyunge, mu buryo bumwe cyangwa ubundi, bugera aho bukongera kurema ibihugu, bigahindura abanyamahanga n’abanzi umuryango w’abaturage. Uwo ni wo murimo udacogora w’u Rwanda, uyu munsi n’iteka ryose.”

Perezida Kagame yitabiriye ayo masengesho ari kumwe na Madamu Jeannette Kagame, aho bifatanyije n’abagize Guverinoma y’Amerika, abagize Inteko Ishinga Amategeko, abahagarariye inyungu z’ibihugu byabo i Washington, Abadipolomate ba Loni, n’abayobozi b’ubucuruzi muri Amerika no hanze yayo. 

Amasengesho yo gusengera Leta zunze ubumwe z’Amerika aba buri mwaka, bikaba ari ibirori bihuriza hamwe abayobozi mu nzego zose kugira ngo bafatanye kuragiza Imana icyo gihugu Isi yose ihanze amaso.

  • NTAWITONDA JEAN CLAUDE
  • Gashyantare 1, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE