Rwanda Day irimo inyungu nyinshi ku Banyarwanda n’abatuye Isi

  • NYIRANEZA JUDITH
  • Gashyantare 3, 2024
  • Hashize amezi 4
Image

Umuvugizi wungirije wa Guverinoma y’u Rwanda, Alain Mukuralinda avuga ko Rwanda Day ihuriza hamwe Abanyarwanda baba mu mahanga birimo inyungu nyinshi kuri bo ubwabo no ku gihugu ndetse n’Isi yose muri rusange, kuko habamo kumenya neza amahirwe aboneka mu Rwanda mu nzego zitandukanye, by’umwihariko mu rwego rw’ishoramari.

Avuga kandi ko Rwanda Day ari urubuga ruhuza by’umwihariko Abanyarwanda baba mu mahanga n’Ubuyobozi Bukuru bw’Igihugu, uyu ukaba ari umurongo w’amahitamo Abanyarwanda bafashe nyuma ya Jenoside yakorewe Abatutsi mu 1994.

Ku munsi wa mbere wa Rwanda Day i Washington D.C, ba rwiyemezamirimo, abayobozi mu rwego rw’imari n’abashoramari bahuriye mu nama yiga ku Bukungu yateguwe n’Urwego rw’Igihugu rw’Iterambere RDB.

Iyi nama yagarutse ku mikorere y’urwego rw’abikorera mu Rwanda n’amahirwe y’ishoramari arurimo.

Umuyobozi Mukuru wa RDB Francis Gatare yagaragaje ko ubukungu bw’u Rwanda buzamuka neza ahanini bishingiye ku ishoramari rishyirwa mu bikorwa remezo.

Francis Gatare, Umuyobozi Mukuru wa RDB

Yavuze ko nubwo Covid-19 yahungabanyije ubukungu bw’u Rwanda ariko bwongeye kuzahuka ndetse buhagaze neza.

Abitabiriye iyi nama bahawe ikiganiro ku kubaka ishoramari n’ubushobozi hagati y’Abanyarwanda baba muri Diaspora n’abo mu Rwanda. Cyatanzwe n’abarimo Charity Kabango washinze Entrepreneurial Solutions Partners, Pascal Murasira uyobora Ikigo gishinzwe guteza imbere ibitekerezo Norrsken Africa, Jeanne Françoise Mubiligi uyobora PSF na Shawn McCormik wo muri Trinity- Metals.

Abantu batandukanye kandi bagaragaza ishusho ya Rwanda Day. Uyu mwaka ikaba ibaye ku nshuro ya 11.

Ambasaderi w’u Rwanda mu Buholandi, Nduhungirehe Olivier, yavuze ko Rwanda Day zatanze umusaruro ukubiye mu nkingi eshatu zirimo kwihesha agaciro, kwirinda amacakubiri no gukunda igihugu.

Ati “Hari byinshi byakozwe. Hari ibyo byo kurwanya amacakubiri, hari urubyiruko rwagiye rwigobotora ingoyi rwashyizweho n’ababyeyi babo.”

Yagaragaje ko Rwanda Day ari umwihariko w’u Rwanda utuma abarukomokamo begera igihugu cyabo.

Ati “Ni iby’agaciro kugira Guverinoma itekereza ku Banyarwanda ikajya kubashakisha aho bari.”

Senateri Uwizeyimana Evode yavuze ko muri Rwanda Dy i Washington D.C Perezida Kagame ari buhakure amajwi nubwo atari kwiyamamaza. Ati “Ni igihe cyiza cyo kureba urugendo rw’imyaka 30 no kureba ngo icyerekezo ni ikihe. Hararebwa ibyakozwe, aho abantu bagize intege nke cyangwa ahabaye ingorane.’’

Yongeyeho ko Rwanda Day ari ubukwe Abanyarwanda bose bahuriramo, bakaganira ku gihugu cyabo.

Ati “Ni umwihariko w’u Rwanda. Nta handi nabonye ubuyobozi bw’igihugu bujya kuganira n’abaturage.’’

Senateri Uwizeyimana Evode yavuze ko Rwanda Day yamubereye inzira yo kugira amahirwe yo gutanga umusanzu we mu kubaka igihugu.

Ati “Nagiye muri Rwanda Day yabereye i Toronto muri Canada mu 2013. Nanjye ndi umusaruro wa Rwanda Day. Ndi umuntu wahagarara ku maguru abiri nkakubwira ngo birakora. Ni amahirwe igihugu kiguha, kikagufungurira amaboko.’’

Umuyobozi Mukuru wa BPN Rwanda, Nkulikiyinka Alice, yavuze ko Rwanda Day itanga umusaruro mu ngeri zitandukanye.

Ati “Buri Rwanda Day ihindura intekerezo z’abantu benshi batabona amakuru asobanutse. Idufasha guhindura imyumvire.”

Yavuze ko ari na yo ishibukamo ba mukerarugendo basura u Rwanda kuko higanjemo abava muri Diaspora.

  • NYIRANEZA JUDITH
  • Gashyantare 3, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE