Rwamagana: Urugendo rw’Inkotanyi barubonamo umusingi w’iterambere

  • KAYITARE JEAN PAUL
  • Werurwe 24, 2024
  • Hashize ibyumweru 3
Image

Abaturage basaga 100 bo mu Murenge wa Karenge mu Karere ka Rwamagana mu Ntara y’Iburasirazuba ejo ku wa Gatandatu tariki 23 Werurwe 2024, basuye umuhora w’urugamba rwo kubohora igihugu, biyemeza kurushaho guharanira ejo heza hazaza.

Inzego z’ibanze mu Murenge wa Karenge, urubyiruko, ba Mutima w’urugo, Abikorera, inzego z’Umuryango n’abandi, basuye umupaka wa Kagitumba mu Karere ka Nyagatare, umusozi wa Nyamwishongwezi warasiweho Maj. Gen. Fred Gisa Rwigema, Gikoba na Shonga hafatwaga nk’Agasantimentero.

Bashana Medard, Umuyobozi Mukuru w’Ingoro y’Amateka y’Urugamba rwo guhagarika Jenoside yakorewe Abatutsi, asobanura ko agasanyimetero ari agace kafashwe n’Ikotanyi mu yahoze ari Komine Muvumba, mu gihe cy’urugamba rwo kubohora igihugu.

Inkotanyi zatangiye urugamba rwo kubohara igihugu tariki ya 01 Ukwakira 1990.

Tariki 02 Ukwakira 2024, ku mupaka wa Kagitumba Rwigema yasobanuriye abasirikare impamvu y’urugamba abasaba gukuramo amapeti y’ikindi gihugu bakayajugunya mu mugezi w’Umuvumba bakazambara ayabo nyuma yo gutsinda urugamba.

Yashyize abasirikare mu mitwe atanga amabwiriza, abasirikare bamwe bafata umuhanda Kagitumba – Kigali, abandi Kagitumba – Nyagatare. Yakurikiye abasirikare ajya kuyoborera urugamba ku musozi wa Nyabwishongwezi ari nawo yarasiweho.

Tariki 02 Ukwakira 1990 nibwo Gen Rwigema yarashwe ariko urugamba rurakomeza Nyagatare irafatwa n’Ikigo cya Gabiro bagikuramo.

Bashana agira ati: “Amakuru y’iraswa rya Rwigema yabanje kugirwa ibanga ariko agenda amenyekana, abasirikare bacika intege ikigo cya Gabiro ingabo za Leta zirakisubiza Inkotanyi ziratsindwa”.

Tariki 15 Ukwakira 1990, Perezida yageze mu Rwanda avuye muri Amerika bimusaba kongera kugarurira morale abasirikare, anahindura uburyo bw’imirwanire kandi intsinzi itaha i Rwanda.

Tuyisenge Olivier, umwe mu bahagarariye urubyiruko mu Murenge wa Karenge, urugendo rwamuteye kugira imbaraga no gukora adategereje indonke.

Ati: “Icyo twakwitaho nk’urubyiruko ni ukubanza kureba inyungu y’ejo hazaza dufite uyu munsi kandi tugasigasira ibyagenzweho.”

Asaba urubyiruko bagenzi be gukora ibituma bazagira imbere heza kuko hari ababiharaniye.

Ingabire Gloriose, isomo yavanye mu gusura umuhora w’urugamba rwo kubohora igihugu, ngo ni ukongera gutekereza ku nshingano afite kandi nubwo yahura n’ibizazane yabyihanganira.

Ati: “Hari abihanganye barongera barihangana babohora igihugu, mu nzira banyuzemo zitari ziboroheye mu buryo butandukanye batari bafitemo ubushobozi, ntabwo ari urugendo rwari rworoshye.”

Amateka yamwigishije gukomeza kwihangana kandi inshinago akora za buri munsi akazihagararamo neza.

Mukanyubahiro Marie Goreth, umukecuru w’imyaka 63, avuga ko icyo akuyemo ari uko Inkotanyi zavunitse kugira ngo zikure u Rwanda mu mwijima rwarimo.

Ikiganiro gito yahaye Imvaho Nshya, yagize ati: “Byanyeretse ukuntu baje, n’ukuntu babohoye igihugu. Uwayoboye urugamba ndetse n’abamufashaga baravunitse.

Natwe rero kugira ngo dukomeze kubakana igihugu, tugomba natwe kudatandukira tukamutera ingabo mu bitugu.”

Avuga ko buri wese yakubaka igihugu atirebyeho kandi ko azagira uruhare mu gushishikariza abato kwigira ku mateka y’urugamba rwo kubohora igihugu.

Uwituze Leatitia avuga ko nyuma yo gusobanurirwa amateka y’urugamba rwo kubuhora igihugu, aramutse afite ubushobozi, yakwandika igitabo.

Bahati Bonny, Umunyamabanga Nshingwabikorwa w’Umurenge wa Karenge, asobanura ko impamvu y’uru rugendo ari ukugira ngo umuturage muri uyu Murenge amenya amateka y’igihugu.

Avuga ko ubutumwa bukomeye ari ukumenya amateka y’aho igihugu cyavuye, bakamenya aho igihugu kigeze n’aho kirimo kwerekeza hashingiwe ku mateka y’urugamba rwo kubohora igihugu rwakozwe n’Inkotanyi.

Avuga ko guhuriza hamwe inzego z’umudugudu kugera ku rwego rw’umurenge hagamijwe kugira ngo zisobanukirwe.

Ati: “[…] zinadufashe kuzasobanurire abaturage cyane cyane ko turimo kwerekeza mu bihe byo tuzakenera ko abaturage bajya mu bihe by’amatora basobanukiwe neza aho igihugu cyavuye.”

Icyerekezo cy’Umurenge wa Karenge ni ushyira umuturage ku isonga, umuturage akabona icyo yifuza cyose binyuze mu miyoborere myiza iranga igihugu.

Inzego z’ibanze mu Murenge wa Karenge zifuzwaho kurangwa n’indangagaciro y’ubumwe, gukorera hamwe no gukoresha bikeya zifite bityo zigaha umuturage icyo yifuza.

Kagabo R. Rwamunono, Umuyobozi w’Akarere ka Rwamagana wungirije ushinzwe iterambere ry’ubukungu, avuga ko nk’ubuyobozi bizeye ko abasuye umuhora w’urugamba rwo kubohora igihugu bagiye kwigisha amateka bagenzi babo.

Ahamya ko ukuri kw’ibyabaye mu rugamba rwo kubohora igihugu babyiboneshereje n’amaso yabo.

Akomeza agira ati: “Igihugu cyacu baragikunda, baragikorera. Imirimo yabo iteza imbere igihugu ni nk’uruhare rw’abandi banyarwanda bose.

Icyo bakuyemo ni ukugira ngo bakore bivuye inyuma, bishimira yuko urugendo ababohoye igihugu bagenze ari na rwo rwabaye umusingi w’iterambere ryabo bagomba kubakiraho”.

Akarere ka Rwamagana kavuga ko urugamba rwo kubohora igihugu rwabaye kandi rukagira igihe cyarwo kugeza abanyarwanda bari mu rugamba rw’iterambere.

Bashana Medard, Umuyobozi Mukuru w’Ingoro y’Amateka y’Urugamba rwo guhagarika Jenoside yakorewe Abatutsi
Bageze Ryabega babanza gucinya akadiho
Bagize umwanya wo kwifotoreza ku mupaka wa Kagitumba aho urugamba rwatangiriye
Bifotoreje munsi y’iminyinya Ibiri Maj. Gen Fred Gisa Rwigema yatangiye amabwiriza y’urugamba rwo kubohora igihugu
Bifotoreje aho Affande PC yagiriraga inama n’abandi bayobozi bakuru b’ingabo
Bahati Bonny, Umunyamabanga Nshingwabikorwa w’Umurenge wa Karenge
François Xavier Habimana, umwe mu basuye umuhora w’urugamba rwo kubohora igihugu
Bazamutse agasozi ka Nyabwishongwezi karasiweho Maj. Gen. Fred Gisa Rwigema
Kagabo R. Rwamunono, Umuyobozi w’Akarere ka Rwamagana wungirije ushinzwe iterambere ry’ubukungu
Bageze mu Bukomane bwa Nyakayaga mu Karere ka Gatsibo basobanurirwa amateka yaho mu gihe cy’urugamba rwo kubohora igihugu
  • KAYITARE JEAN PAUL
  • Werurwe 24, 2024
  • Hashize ibyumweru 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE